• ເລີ່ມແລ້ວ ການແຂ່ງຂັນນຳໃຊ້ພາສາອັງກິດ ຄັ້ງທີ່ V

ໂດຍ: ແມວດຳ 08 ມັງກອນ 2019 (16.42 ນ.) Read : 202

ສູນປະກັນຄຸນນະພາບການສຶກສາ ກະຊວງສຶກສາທິການ ແລະກີລາ (ສສກ) ຮ່ວມກັບບໍລິສັດ ໄອໄອຈີ ສຶກສາລາວ ຈັດການແຂ່ງຂັນວັດຄວາມສາມາດດ້ານການນຳໃຊ້ພາສາອັງກິດ TOEFL Junior Challenge ສໍາລັບນັກຮຽນອາຍຸ 11-15 ປິ ແລະ TOEIC Challenge ສຳລັບນັກສຶກສາອາຍຸ 16-22 ປີ ຄັ້ງທີ 5 ໃນຕົ້ນປີ 2019.

ທ່ານ ປັນຍາ ຈັນທະວົງ ຜູ້ອຳນວຍການ ສູນປະກັນຄຸນນະພາບການສຶກສາ ກະຊວງສຶກສາທິການ ແລະກີລາ ໄດ້ກ່າວວ່າ: ການແຂ່ງຂັນນຳໃຊ້ພາສາອັງກິດສຳລັບນັກຮຽນ, ນັກສຶກສາຄັ້ງທີ່ V ໄດ້ຈັດຂຶ້ນທີ່ ນະຄອນຫຼວງວຽງຈັນ, ແຂວງວຽງຈັນ, ຊຽງຂວາງ, ໄຊຍະບູລີ, ອຸດົມໄຊ, ສະຫັວນນະເຂດ, ຈຳປາສັກ ແລະແຂວງອັດຕະປື ໃນຕົ້ນປີ 2019 ນີ້. ທັງນີ້ກໍເພື່ອແນໃສ່ວັດລະດັບຄວາມສາມາດດ້ານພາສາອັງກິດຂອງນັກຮຽນມັດທະຍົມສຶກສາຕອນຕົ້ນ, ຕອນປາຍ, ນັກສຶກສາລະດັບມະຫາວິທະຍາໄລ, ວິທະຍາໄລທັງພາກລັດ ແລະເອກະຊົນ, ພ້ອມທັງເປັນການຊຸກຍູ້ສົ່ງເສີມການຮຽນ-ການສອນພາສາອັງກິດ ໃນສະຖາບັນການສຶກສາຕ່າງໆຂອງລາວໃຫ້ສາມາດນຳໃຊ້ເຂົ້າໃນຊີວິດປະຈຳວັນ ແລະໄດ້ມາດຕະຖານສາກົນ.

ການແຂ່ງຂັນດັ່ງກ່າວຈະໄດ້ຈັດຂຶ້ນ 2 ຮອບ ຄື: ຮອບທຳອິດ ໃນລະຫວ່າງວັນທີ 4-21 ມັງກອນ 2019. ໃນນີ້ ວັນທີ 5 ມັງກອນ 2019 ຈະຈັດຂຶ້ນທີ່ສູນ ໄອຊີທີ ນະຄອນຫຼວງວຽງຈັນ ແລະແຂວງວຽງຈັນ; ວັນທີ 12 ມັງກອນ ທີ່ສູນໄອຊີທີ ແຂວງຊຽງຂວາງ, ໄຊຍະບູລີ ແລະອຸດົມໄຊ; ວັນທີ 19 ມັງກອນ ທີ່ສູນໄອຊີທີ ແຂວງສະຫວັນນະເຂດ, ຈຳປາສັກ ແລະແຂວງອັດຕະປື.
ສຳລັບຮອບ 2 ຫຼືຮອບຊີງຊະນະເລີດ ແມ່ນຈະຈັດຂຶ້ນໃນລະຫວ່າງວັນທີ 7-25 ມີນາ 2019 ສ່ວນສູນກາງສອບເສັງແມ່ນຈະຈັດຂຶ້ນຕາມສະຖານທີ່ ທີ່ມີຜູ້ແຂ່ງຂັນຜ່ານເຂົ້າຮອບ.

ທີ່ມາ: MUAN.LA
  • ແທັກທີ່ກ່ຽວຂ້ອງ