• ອາໝີ ເມັກອັບ ຊ່າງແຕ່ງໜ້າຄິວທອງ ນ້ອງໃໝ່

ໂດຍ: ສີເປື້ອນມື 26 ທັນວາ 2018 (10.59 ນ.) Read : 583

ກ່ອນຈະມາເປັນຊ່າງແຕ່ງໜ້າມືອາຊີບໄດ້ ຕ້ອງໄດ້ພົບກັບອຸປະສັກຫຼາຍຢ່າງ ບໍ່ວ່າຈະເປັນເລື່ອງຄອບຄົວບໍ່ເຫັນດີນໍາ, ຕົນເອງບໍ່ມີຄວາມພ້ອມ ແລະບໍ່ມີພອນສະຫວັນ ຕ້ອງໄດ້ໄປຊອກສະແຫວງຮຽນຮູ້ ເພື່ອຢາກເຮັດໃນສິ່ງທີ່ມັກ ເຖິງແມ່ນວ່າຈະບໍ່ກົງກັບສິ່ງທີ່ຮຽນຈົບມາກໍຕາມ. ບໍ່ວ່າຈະມີອຸປະສັກຫຼາຍປານໃດ ແຕ່ລາວກໍຍັງກ້າວຜ່ານມັນມາໄດ້ ຈົນສ້າງຝັນຂອງຕົນເອງສໍາເລັດຕາມເປົ້າໝາຍທີ່ວາງໄວ້.

ທ່ານ ອາໝີ ສີຊົມພູ ເຈົ້າຂອງຮ້ານ ເສີມຄວາມງາມ ອາໝີ ຫຼື “Armee Make Up” ໄດ້ໃຫ້ສໍາພາດວ່າ: ຕົນເອງໄດ້ສຶກສາຈົບສາຂາ ສັດຕະວະແພດ ແຕ່ບໍ່ໄດ້ເຮັດວຽກຕາມສາຂາທີ່ຮຽນມາ. ພາຍຫຼັງທີ່ຮຽນຈົບຕົນເອງ ຈຶ່ງໄດ້ສານຕໍ່ຄວາມຝັນທີ່ຢາກເຮັດ ໂດຍການໄປຮຽນເສີມຄວາມງາມ ທີ່ ປະເທດໄທ ແລະໃຊ້ເວລາໃນການເຝິກຝົນສີມືຕົນເອງ ເປັນເວລາ 1 ປີກວ່າ ຈົນເກືອບຈະບໍ່ມີເວລາພັກຜ່ອນ ແຕ່ກໍບໍ່ເຄີຍທໍ້ຖອຍ ຍ້ອນວ່າໄດ້ຮັບແຮງບັນດານໃຈຫຼາຍຈາກຊ່າງແຕ່ງໜ້າມືອາຊີບຫຼາຍຄົນ ທີ່ເຫັນເຂົາເຈົ້າມີຊີວິດການເປັນຢູ່ທີ່ດີຂຶ້ນ ຕົນເອງຈຶ່ງຢາກເປັນຊ່າງແຕ່ງໜ້າຄິວທອງຄືເຂົາ.

ປັດຈຸບັນ ໄດ້ຮັບກະແສຕອບຮັບທີ່ດີຈາກລູກຄ້າທີ່ມາໃຊ້ບໍລິການ ສ່ວນຫຼາຍແມ່ນ ມາຈາກການບອກຕໍ່ກັນ ແລະຮູ້ຈັກການລີວິວຜ່ານທາງອອນລາຍ ໂດຍສະເພາະແມ່ນກຸ່ມລູກຄ້າໄວໜຸ່ມທົ່ວໄປ, ນາງແບບ, ນາງສາວ ແລະນັກທຸລະກິດ. ໃນໄລຍະຜ່ານມາຕົນເອງໄດ້ເປັນຊ່າງແຕ່ງໜ້າປະຈໍາກອງປະກວດນາງສາວນະຄອນຫຼວງ ປະຈໍາປີ 2018 ແລະກອງປະກວດນາງສາວລາວ 2018 ພ້ອມທັງໄດ້ເປັນຊ່າງແຕ່ງໜ້າປະຈໍາກອງປະກວດນາງສາວເຜົ່າມົ້ງລາວ 2019 ທີ່ຈະມາເຖິງນີ້. ນອກຈາກການຮັບແຕ່ງໜ້າອອກງານ, ແຕ່ງໜ້າເຈົ້າສາວ ແລະອື່ນໆແລ້ວ ຍັງໄດ້ເປີດຄອດສ໌ຮັບສອນວິທີການແຕ່ງໜ້າໃຫ້ກັບຜູ້ທີ່ມີໃຈມັກຮັກ ແລະສົນໃຈໃນດ້ານນີ້ ບໍ່ວ່າຈະເປັນການຮຽນແຕ່ງໜ້າຕົນເອງ ຫຼືເປັນຊ່າງມືອາຊີບ.

ບັນຫາທີ່ພົບໃນທຸລະກິດເສີມຄວາມງາມ ຈະແມ່ນເລື່ອງຂອງການຈັດຄິວໃຫ້ກັບລູກຄ້າ ບາງເທື່ອໃນກໍລະນີທີ່ລູກຄ້າໂທມາຈອງຄິວຕອນທີ່ກໍາລັງເຮັດວຽກ ແລ້ວເຮົາລືມບັນທຶກໄວ້ ເຊິ່ງອາດຈະເຮັດໃຫ້ຄິວງານຊ້ອນກັນ ແຕ່ພວກເຮົາກໍສາມາດແກ້ໄຂໄດ້ ແລະການທີ່ຈະເປັນຊ່າງແຕ່ງໜ້າທີ່ດີນັ້ນ ຈະຕ້ອງມີໃຈມັກສະເພາະດ້ານ, ມີອາລົມສິນ, ຈິນຕະນາການ ແລະຈະຕ້ອງນໍາເທຣນຕ່າງໆຕາມກະແສ ເພື່ອສ້າງສັນຜົນງານໃຫ້ເປັນທີ່ເພິ່ງພໍໃຈຂອງລູກຄ້າ.

ຮ້ານ ເສີມຄວາມງາມ ອາໝີ ຫຼື “Armee Make Up” ຕັ້ງຢູ່ບ້ານ ໜອງໜ່ຽງ ເມືອງ ໄຊເສດຖາ ນະຄອນຫຼວງວຽງຈັນ. ເບີໂທຕິດຕໍ່ 020 5999 4618 ແລະສາມາດຕິດຕາມການອັບເດດຂໍ້ມູນໄດ້ທີ່ ເຟດບຸກ: Armee Make Up.

ໂດຍ: ສີເປື້ອນມື




ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ