• ຄອບຄົວສຸກສັນຂອງ ໄກ່ Overdance

ໂດຍ: Admin Mahason 20 ກັນຍາ 2017 (00.00 ນ.) Read : 1,726

     ເປັນອີກໜຶ່ງຄົນບັນເທີງທີ່ປະສົບຜົນສຳເລັດໃນໜ້າທີ່ການງານ ສຳລັບສາວ ມະນີລາ ສຸວັນດວນ ຫຼືຫຼາຍຄົນຮູ້ຈັກໃນນາມຂອງ ໄກ່ ໂອເວີແດນ ນັກຮ້ອງ ແລະພິທີກອນຄິວທອງ ຈົນໄດ້ຮັບສາຍາ “ນາງພະຍາວົງການບັນເທີງ”. ນອກຈາກເລື່ອງວຽກແລ້ວ ເລື່ອງຄອບຄົວຂອງສາວເກັ່ງຄົນນີ້ກໍປະສົບຜົນສຳເລັດໄປບໍ່ໜ້ອຍເຊິ່ງດຽວກັນ ເພາະປັດຈຸບັນໄກ່ ໄດ້ແຕ່ງງານກັບໜຸ່ມນັກທຸລະກິດ ແລະມີລູກສາວລູກຊາຍທີ່ໜ້າຮັກ 2ຄົນ. 

     ໄກ່ໄດ້ເປີດເຜີຍເລື່ອງລາວຊີວິດຄອບຄົວໃນງານສຳມະນາ “ພາສາໃຈ ງາມພາຍໃນສູ່ພາຍນອກ” ກ່ອນໜ້ານີ້ໄກ່ກໍເປັນແມ່ຍິງຄົນໜຶ່ງທີ່ມີເສັ້ນທາງຄວາມຮັກບໍ່ໄດ້ໂຮຍໄປດ້ວຍກີບກຸຫຼາບ ເພາະເຄີຍຈົບຄວາມສຳພັນກັບອາດີດຄົນຮັກທີ່ມີມາຍາວນານເຖິງ 7ປີ ຈົນກະທັ້ງມາພົບກັບຜູ້ຊາຍຂີ້ອາຍຄົນໜຶ່ງ ທີ່ມີບຸກຄະລິກແຕກຕ່າງກັບສາວທັນສະໄໝສຸດໝັ້ນໃຈຄືໄກ່ ແຕ່ກໍບໍ່ໜ້າເຊື່ອວ່າຜູ້ຊາຍຄົນນີ້ຄືຄົນທີ່ສາມາດຍອມຮັບຕົວຕົນທຸກຢ່າງຂອງໄກ່ ໃນທີ່ສຸດຜູ້ຊາຍຄົນນີ້ກໍໄດ້ກາຍມາເປັນສາມີທີ່ແສນດີ ແລະພໍ່ຂອງລູກ. ຫຼັງຈາກໃຊ້ຊີວິດຄອບຄົວຮ່ວມກັນມາຫຼາຍປີ ແຕ່ຄວາມຮັກກໍບໍ່ໄດ້ຈືດຈາງໄປຕາມວັນເວລາທີ່ເລີຍຜ່ານ ສິ່ງໜຶ່ງທີ່ໄກ່ເຊື່ອວ່າເປັນຕົວຍຶດໜ່ຽວຄວາມສຳພັນໃຫ້ຍືນຍາວຄືຄວາມຈິງໃຈ ແລະຊື່ສັດທີ່ຕົນເອງໄດ້ມອບໃຫ້ສາມີ ລວມໄປເຖິງຄອບຄົວຂອງສາມີ ແລະຄອບຄົວຂອງຕົນເອງ. 

     ຄວາມຈິງໃຈທີ່ວ່ານີ້ຄືຄວາມຈິງໃຈໃນການດູແລເອົາໃຈໃສ່ຄອບຄົວ, ມອບຄວາມເປັນພັນລະຍາທີ່ສັດຊື່, ປະຕິບັດໜ້າທີ່ແມ່ທີ່ດີໃຫ້ກັບລູກໆ ສິ່ງເຫຼົ່ານີ້ຈະຊ່ວຍໃຫ້ເຮົາມີຄຸນຄ່າແຫ່ງຄວາມດີງາມຢ່າງແທ້ຈິງ. ທາງດ້ານການດູແລລູກໆ ເຖິງວ່າໄກ່ຈະເຮັດວຽກໜັກ, ມີຄິວຮັບງານອີເວັ້ນແບບບໍ່ຂາດສາຍ ແຕ່ກໍບໍ່ລືມທີ່ຈະແບ່ງເວລາໃຫ້ຄວາມອົບອຸ່ນກັບພວກເຂົາ ໄກ່ເປີດເຜີຍວ່າຄວາມສຸກຂອງຄອບຄົວເກີດຂຶ້ນໄດ້ໂດຍເລີ່ມຈາກທຸກໆຄົນໃນຄອບຄົວເວົ້ານົວຫົວໃສ່ກັນ ດັ່ງນັ້ນ, ໄກ່ພະຍາຍາມສອນລູກໃຫ້ເປັນຄົນເວົ້າຈາສຸພາບອ່ອນໂຍນຢູ່ສະເໝີ. 

     ສຳລັບອີກໜຶ່ງເລື່ອງສຳຄັນໃນຄອບຄົວນັ້ນກໍຄືການບໍລິຫານເງິນຄຳ ໄກ່ຈະນຳໃຊ້ຮູບແບບຄອບຄົວຍຸກໃໝ່ ທີ່ບໍ່ຈຳເປັນຕ້ອງໃຫ້ແມ່ເຮືອນກຳເງິນທຸກກີບຂອງຜົວ ແຕ່ທັງສອງຈະມີອິດສະຫຼະໃນການໃຊ້ຈ່າຍສ່ວນຕົວຖືວ່າເປັນການໃຫ້ກຽດ ແລະເຄົາລົບເຊິ່ງກັນ ແລະກັນ ແຕ່ຈະມີເງິນກອງກາງໃນການບໍລິຫານຄອບຄົວ ແລະເພື່ອອະນາຄົດຂອງລູກໆ ວິທີນີ້ໃຜຢາກເອົາໄປນຳໃຊ້ກໍບໍ່ວ່າກັນ.  

     ໃນຕອນທ້າຍໄກ່ຍັງຝາກເຖິງແມ່ຍິງທັງຫຼາຍເຖິງເຄັດລັບການຄອງເຮືອນ ນອກຈາກເຮົາຈະປະຕິບັດໜ້າທີ່ການເປັນແມ່ຂອງລູກ ແລະການເປັນພັນລະຍາທີ່ດີແລ້ວ ກໍຈຳເປັນຕ້ອງໄດ້ມີຄວາມເຂົ້າອົກເຂົ້າໃຈເຊິ່ງກັນ ແລະກັນລະຫວ່າງສາມີ-ພັນລະຍາ ທີ່ສຳຄັນແມ່ຍິງຍຸກໃໝ່ກໍຢ່າລືມດູແລຕົນເອງໃຫ້ດູດີມີສະເໜ່ຢູ່ສະເໝີ. 

     ຖືເປັນແບບຢ່າງທີ່ດີຂອງຄອບຄົວຍຸກໃໝ່ ທີ່ຫຼາຍຄົນສາມາດນຳໄປເປັນແນວທາງໃນການປະຕິບັດໄດ້ ຢ່າລືມວ່າຄອບຄົວຄືຮາກຖານຂອງການໃຊ້ຊີວິດ ແລະເປັນຫົວໜ່ວຍພື້ນຖານສຳຄັນຂອງສັງຄົມ ຫວັງຢ່າງຍິ່ງວ່າທຸກຄົນຈະມີຄອບຄົວທີ່ຜາສຸກຄືດັ່ງຄອບຄົວຂອງສາວເກັ່ງຄົນນີ້.



ທີ່ມາ:
  • ແທັກທີ່ກ່ຽວຂ້ອງ