• ເພັດພະໄທ ໃສ່ໃຈທຸກລາຍລະອຽດຂອງເພັດ

ໂດຍ: ສີເປື້ອນມື 24 ທັນວາ 2018 (11.04 ນ.) Read : 952

ບາງເທື່ອການເຮັດທຸລະກິດກໍເກີດຂຶ້ນຈາກຄວາມມັກຮັກໃນສິ່ງນັ້ນ ເຊິ່ງຈະເຮັດໃຫ້ເຮົາປະສົບຜົນສໍາເລັດ ຄືກັນກັບຜູ້ຍິງຕົວນ້ອຍໆຄົນໜຶ່ງ ທີ່ຢາກເປີດຮ້ານຂາຍເຄື່ອງປະດັບ ຍ້ອນການຊອກຫາແຫວນແຕ່ງງານ ທີ່ບໍ່ມີແບບທີ່ຖືກໃຈຕົນເອງ ຈົນສຸດທ້າຍຈຶ່ງໄດ້ຕັດສິນໃຈໄປສຶກສາເລື່ອງຂອງການອອກແບບ ແລະຫຼັກການຕ່າງໆຂອງເພັດ ເພື່ອມາເປີດຮ້ານເປັນຂອງຕົນເອງ.

ທ່ານ ນາງ ຈັນໂສ ຈິດຕິວົງ ເຈົ້າຂອງຮ້ານເຄື່ອງປະດັບ ເພັດພະໄທ ຈິວເວີລີ້ (Phetphathai Jewelry) ໄດ້ໃຫ້ສໍາພາດວ່າ: ຮ້ານ ເພັດພະໄທ ໄດ້ເລີ່ມເປີດຢ່າງເປັນທາງການ ໃນວັນທີ 21 ມີນາ 2017 ເຊິ່ງກ່ອນໜ້ານີ້ ໄດ້ມີການເປີດທົດລອງມາເປັນເວລາ 3 ເດືອນ ເພື່ອຈໍາໜ່າຍເພັດທາງອອນລາຍ ແລະເປັນການສໍາຫຼວດເບິ່ງກຸ່ມລູກຄ້າ. ແຕ່ເຖິງວ່າຈະມີການໂຄສະນາຜ່ານທາງອອນລາຍກໍຕາມ ເພື່ອເຮັດໃຫ້ມັນມີຄວາມເຊື່ອຖື ແລະເຮັດໃຫ້ລູກຄ້າເຊື່ອໝັ້ນ ພວກເຮົາຈຶ່ງຈັດການຊື້-ຂາຍ ຢູ່ທາງໜ້າຮ້ານ ເພື່ອໃຫ້ລູກຄ້າໄດ້ສໍາພັດກັບສິນຄ້າຕົວຈິງກ່ອນທີ່ຈະຕັດສິນໃຈຊື້.

ເຄື່ອງປະດັບ ພາຍໃນຮ້ານຈະມີຫຼາຍປະເພດ: ແຫວນເພັດ, ຕຸ້ມຫູ, ສາຍຄໍ, ກີ້ສາຍຄໍ, ສາຍແຂນ, ຊຸດອອກງານ ຍິງ-ຊາຍ ແລະແຫວນແຕ່ງງານ. ນອກນັ້ນ, ຍັງມີ ຄໍາອີຕາລີ 18K ແລະຄໍາຂາວ ທີ່ເຮັດດ້ວຍນາຍຊ່າງທີ່ຊໍານານງານ ຈາກຕ່າງປະເທດ ແລະຈະກວດສອບຄຸນນະພາບຂອງເພັດທຸກເມັດດ້ວຍຕົນເອງ ເຊິ່ງໃນອະນາຄົດເຮົາຈະມີການຂາຍ ຄໍາ 99.99%.

ລາຄາເລີ່ມຕົ້ນສໍາລັບເພັດຮູບປະພັນ ແມ່ນມີແຕ່ລາຄາ 2 ລ້ານກີບຂຶ້ນໄປ ແລະຂະໜາດທີ່ຂາຍດີທີ່ສຸດແມ່ນ ລາຄາ 20 ກວ່າລ້ານກີບ ເຊິ່ງຮ້ານພວກເຮົາໄດ້ມີການຄັດສັນຄຸນນະພາບເປັນຢ່າງດີ ເພື່ອຢາກໃຫ້ລູກຄ້າໄດ້ຊົມໃຊ້ເພັດນໍ້າງາມ, ມີຄຸນນະພາບ, ບໍ່ມີຕໍາໜິ ແລະສະທ້ອນແສງໄຟໄດ້ດີ ເຊິ່ງເພັດທີ່ດີບໍ່ຄວນເຈຍລະໄນ ເລິກ ຫຼືຕື້ນຈົນເກີນໄປ ແລະບໍ່ມີນະວັດຕະກໍາໃດ ທີ່ຈະຮຽນແບບເພັດແທ້ໄດ້ 100%. ການປະເມີນຄຸນນະພາບ ແລະມູນຄ່າຂອງເພັດ ແມ່ນໄດ້ເນັ້ນຈາກ 4 ຫຼັກການ ຄື: ຄວາມໃສຂອງເພັດ, ນໍ້າໜັກຂອງເພັດ, ຄວາມສະອາດ ແລະການເຈຍລະໄນ. ໃນການກວດສອບຄຸນນະພາບເພັດ ໄດ້ນໍາໃຊ້ອຸປະກອນທີ່ທັນສະໄໝ ບໍ່ວ່າຈະເປັນເຄື່ອງມືແບບ Manual, ແບບ Digital ແລະເຄື່ອງສ່ອງກ້ອງຈຸລະທັດ.

ການອອກແບບ ແມ່ນໄດ້ແຮງບັນດານໃຈຈາກຫຼາຍດ້ານ ບໍ່ວ່າຈະເປັນການສຶກສາທາງອິນເຕີເນັດ ແລະເພຈທີ່ມີຊື່ສຽງໃນຕ່າງປະເທດ ເພື່ອເອົາມາປະສົມປະສານໃຫ້ເປັນແບບທີ່ສວຍງາມ. ນອກຈາກນັ້ນ, ກໍຍັງມີແບບຕາມທີ່ລູກຄ້າຕ້ອງການ ເຊິ່ງສາມາດໃຫ້ຄໍາແນະນໍາເລື່ອງແບບຂອງເພັດ ແລະປະເມີນຂະໜາດ ຕາມງົບປະມານຂອງລູກຄ້າ.

ລູກຄ້າທີ່ມາໃຊ້ບໍລິການສ່ວນຫຼາຍເປັນໄວໜຸ່ມທີ່ກໍາລັງສ້າງຕົວ, ກຸ່ມນັກທຸລະກິດ ແລະກຸ່ມຜູ້ອາວຸດໂສ ທີ່ໄດ້ຈາກການແນະນໍາບອກຕໍ່ກັນມາ. ນອກຈາກລູກຄ້າທີ່ຢູ່ໃນນະຄອນຫຼວງແລ້ວ ກໍຍັງມີລູກຄ້າຕ່າງແຂວງ ແລະປະເທດເພື່ອນບ້ານ. ຮູ້ສຶກດີໃຈທີ່ທຸກຄົນໃຫ້ຄວາມສົນໃຈ ເຖິງແມ່ນວ່າຮ້ານເຮົາຈະບໍ່ໄດ້ຢູ່ຫ້າງດັງ ຫຼືມີໜ້າຮ້ານໃຫຍ່ຄືບ່ອນອື່ນ ແຕ່ເຮົາກໍຍັງມີລູກຄ້າເພີ່ມຂຶ້ນເລື້ອຍໆ ຍ້ອນການນໍາໃຊ້ໂຊຊ້ຽວເປັນການຕະຫຼາດ.

ສຸດທ້າຍຂອບໃຈລູກຄ້າທີ່ເຊື່ອໝັ້ນຮ້ານເຮົາຕະຫຼອດມາ ບໍ່ວ່າເປັນລູກຄ້າເກົ່າ-ໃໝ່ ແລະສິ່ງທີ່ທາງຮ້ານຈະຕອບແທນຄືນນັ້ນ ຄືການບໍລິການທີ່ດີທີ່ສຸດ. ໃນຕົ້ນປີ 2019 ນີ້ຈະມີການເປີດຮ້ານໃໝ່ ເຊິ່ງຈະມີສິນຄ້າຄົບວົງຈອນຫຼາຍຂຶ້ນ.

ຮ້ານ ເພັດພະໄທ ຈິວເວີລີ້ ຕັ້ງຢູ່ບ້ານ ທົ່ງສ້າງນາງ ເມືອງ ຈັນທະບູລີ ນະຄອນຫຼວງວຽງຈັນ. ເບີໂທ: 020 9993 9789 ແລະ 030 555 6555 ທ່ານສາມາດຕິດຕາມການເຄື່ອນໄຫວຕ່າງໆ ໄດ້ທີ່ເຟດບຸກ: Phetphathai jewelry ຮ້ານເພັດພະໄທ ຈິວເວີລີ້.

ໂດຍ: ສີເປື້ອນມື




ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ