ທີມຊາດລາວ ອັນດັບໂລກຕົກລົງເຖິງ 3 ຂັ້ນ ຢູ່ອັນດັບທີ 184 ຂອງໂລກ ຕາມການຈັດອັນດັບໂລກຄັ້ງຫຼ້າສຸດຂອງສະຫະພັນບານເຕະນາໆຊາດ (FIFA) ຫຼ້າສຸດປະຈໍາເດືອນ ພະຈິກ 2018 ຫຼັງຈາກທີ່ສ້າງຜົນງານໄດ້ຕົກຕໍ່າ ເອເອັຟເອັຟ ຊູຊູກິຄັບ 2018 ລົງສະໜາມ 4 ນັດ ເສຍທັງຫມົດ ແລະເສຍປະຕູເຖິງ 12 ໜ່ວຍ.

FIFA ປະກາດຈັດອັນດັບໂລກປະຈໍາເດືອນ ພະຈິກ 2018 ຢ່າງເປັນທາງການ ເມື່ອອາທິດທີ່ຜ່ານມາ ປະກົດວ່າ: ອັນດັບ 1 ຂອງໂລກຕົກເປັນຂອງປະເທດ ແບນຊິກ ມີ 1,727 ຄະແນນ ໂດຍບຽດເອົາຊະນະ ຝຣັ່ງ ໄປພຽງຄະແນນດຽວເທົ່ານັ້ນ, ສ່ວນອັນດັບ 3 ຕົກເປັນຂອງ ບຣາຊິນ 1,676 ຄະແນນ, ອັນດັບ 4 ໂກຼອາຊີ 1,631 ຄະແນນ ແລະອັນດັບ 5 ໄດ້ແກ່: ອັງກິດ ມີ 1,631 ຄະແນນ.

      ໃນຂະນະທີ່ ທີມຊາດລາວ ຕົກລົງອັນດັບທີ 184 ຂອງໂລກ ຈາກຜົນງານຫຼ້າສຸດເສຍ 4 ນັດລວດ ໃນ ຊູຊູກິ ຄັບ 2018 ໂດຍນັດທຳອິດເສຍໃຫ້ ຫວຽດນາມ 0–3, ນັດທີ 2 ເສຍ ໃຫ້ມາເລເຊຍ 1–3, ນັດທີ 3 ເສຍໃຫ້ມຽນມາ 1–3 ແລະນັດສຸດທ້າຍເສຍໃຫ້ ກໍາປູເຈຍ 1-3, ເຮັດໃຫ້ຄ່າປະສິດຢູ່ທີ່ 923 ຄະແນນ ຈັດຢູ່ອັນດັບ 184 ຂອງໂລກໃນປະຈຸບັນ.

      ທັງນີ້, ທີມຊາດລາວຍັງຈັດຢູ່ ອັນດັບທີ 9 ຂອງສະຫະພັນບານເຕະອາຊຽນ ( ເອເອັຟເອັຟ) :ໜືອພຽງປະເທດ ບູຣໄນ ມີ 903 ຄະແນນຢູ່ອັນດັບທີ 10 ຂອງອາຊຽນ (195 ຂອງໂລກ) ແລະປະເທດ ຕີມໍເລັສເຕ ມີ 900 ຄະແນນ ຢູ່ອັນດັບທີ 11 (196 ຂອງໂລກ), ສ່ວນອັນດັບ 1 ຂອງ ອາຊຽນ ຕົກເປັນຂອງທີມຊາດ ຫວຽດນາມ ມີ 1,224 ຄະແນນ (100 ຂອງໂລກ), ອັນດັບ 2 ຕົກເປັນຂອງປະເທດ ຟີລິບປິນ ມີ 1,176 ຄະແນນ (116 ຂອງໂລກ) ແລະອັນດັບ 3 ໄທ ມີ 1,161 ຄະແນນ (121 ຂອງໂລກ).

ຂໍ້ມູນ: ໜສພ ເສດຖະກິດ-ການຄ້າ