• ເອົາໃຈຊ່ວຍນັກກິລາລາວຍາດຫຼານຄໍາ ໃນກິລາມະຫາໄລອາຊຽນ ຄັ້ງທີ 19

ໂດຍ: ສີເປື້ອນມື 05 ທັນວາ 2018 (13.57 ນ.) Read : 71

ໃນ ວັນທີ 4 ທັນວາ 2018 ທີ່ສະໂມສອນໃຫຍ່ ຊັ້ນ 2 ມະຫາວິທະຍາໄລແຫ່ງຊາດ (ມຊ), ທ່ານ ຄໍາຜາຍ ສີສະຫວັນ ຮອງລັດຖະມົນຕີກະຊວງສຶກສາທິການ ແລະກີລາ ຄະນະນໍານັກກິລາ ສະຫະພັນກີລາມະຫາວິທະຍາໄລລາວ (ສກມລ) ເນັ້ນໃຫ້ທັບນັກກີລານັກສຶກສາລາວ ເພີ່ມທະວີຄວາມເອົາໃຈໃສ່ຄວາມຮັບຜິດຊອບໜ້າທີ່ຂອງຕົນເອງຢ່າງຮອບດ້ານ ໂດຍສະເພາະແມ່ນຕ້ອງມີນ້ຳໃຈນັກກີລາ, ມີຄວາມຮັບຜິດຊອບສູງ, ຮັກສາກຽດສັກສີຂອງຄວາມເປັນຊາດລາວ, ວາງແຜນຢ່າງຮອບຄອບ, ກວດສອບກົດລະບຽບກະຕິກາຂອງແຕ່ລະປະເພດກີລາ ທັງນີ້ເພື່ອສ້າງຜົນງານດີເດັ່ນສາມາດຍາດໃຫ້ໄດ້ໄຊຊະນະເປັນກຽດ-ຊື່ສຽງໃຫ້ປະເທດຊາດ ແລະນຳເອົາຄວາມພາກພູມໃຈມາສູ່ພໍ່ແມ່ປະຊາຊົນຊາວລາວ ຢ່າງສົມກຽດ ໃນງານມະຫາກຳກີລາ ມະຫາວິທະຍາໄລອາຊຽນ ຄັ້ງທີ 19 ທີ່ປະເທດມຽນມາ ເປັນເຈົ້າພາບ ລະຫວ່າງວັນທີ 10-19 ທັນວາ 2018. 
      ທ່ານ ອານຸລົມ ວິໄລພອນ ໄດ້ລາຍງານກ່ຽວກັບຄວາມພ້ອມໃນການກະກຽມແຜນຕ່າງໆ ເປັນຕົ້ນແມ່ນແຜນການເດີນທາງຂອງນັກກີລາແຕ່ລະປະເພດ, ເຊິ່ງການເດີນທາງຂອງນັກກີລາລາວ ເລີ່ມອອກເດີນທາງຕັ້ງແຕ່ວັນທີ 5 ທັນວາ 2018 ເປັນຕົ້ນໄປ ເພື່ອເຂົ້າຮ່ວມການແຂ່ງຂັນດັ່ງກ່າວ ໂດຍທີມງານກອງເລຂາ ພ້ອມດ້ວຍນັກກີລາບານເຕະ ອອກເດີນທາງເປັນຊຸດທຳອິດກ່ອນ, ສ່ວນກີລາປະເພດອື່ນໆຈະຄ່ອຍເດີນທາງຕາມຫລັງ.

ສຳລັບ ການແຂ່ງຂັນຄັ້ງນີ້ (ສກມລ) ສົ່ງທັບນັກກິລາ 150 ຄົນ ຈາກ 9 ປະເພດ ປະກອບມີ ບານເຕະຊາຍ, ຍິງທະນູ, ເປຕັງ, ກະຕໍ້, ວໍວີນາມ, ກ໋ອຟ, ດອກປີກໄກ່, ວູຊູ ແລະ ແລ່ນ-ລານ ເຂົ້າຮ່ວມແຂ່ງຂັນ. 
      ແນວໃດກໍຕາມ, ຜົນສໍາເລັດໃນການກະກຽມຄວາມຮ່ວມ ງານກີລາມະຫາໄລອາຊຽນ ໃນຄັ້ງນີ້ ເບື້ອງຕົ້ນ ຄະນະຮັບຜິດຊອບກອງເລຂາ ສາມາດຈັດຕັ້ງປະຕິບັດວຽກງານຕ່າງໆໄດ້ເຕັມ 100 ເປີເຊັນແລ້ວ ໂດຍສະເພາະວຽກນະໂຍບາຍຫລຽນລາງວັນຂອງນັກກີລາ ທີ່ສາມາດສ້າງຜົນງານໃນງານດັ່ງກ່າວໄດ້ ຖ້າຍາດໄດ້ຫລຽນຄຳ ປະເພດທີມ ຈະຮັບເງິນອັດສີດ ຫລຽນລະ 20 ລ້ານກີບ, ປະເພດດ່ຽວ ຫລຽນລະ 12 ລ້ານກີບ, ສ່ວນຫລຽນເງິນ ປະເພດທີມ ຈະຮັບເງິນອັດສີດ ຫລຽນລະ 10 ລ້ານກີບ, ປະເພດດ່ຽວ ຫລຽນລະ 5 ລ້ານກີບ ແລະຫລຽນທອງ ປະເພດທີມ ຈະໄດ້ຮັບເງິນອັດສີດ ຫລຽນລະ 5 ລ້ານກີບ ແລະປະເພດດ່ຽວ ຫລຽນລະ 3 ລ້ານກີບ.

ຂໍ້ມູນ: ປະເທດລາວ

 


ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ