• ຫຼວງພະບາງ ຮາຟ ມາຣາທອນ 2018 ເພື່ອການກຸສົນ

ໂດຍ: ສີເປື້ອນມື 26 ຕຸລາ 2018 (14.53 ນ.) Read : 110

ການແລ່ນ ຫຼວງພະບາງ ຮາຟ ມາຣາທອນ 2018 “Luang Prabang Half Marathon 2018” ໄດ້ຈັດຂຶ້ນໃນວັນທີ 21 ຕຸລາ 2018 ເຊິ່ງເປັນການແລ່ນເພື່ອການກຸສົນ, ລະດົມທຶນໄປສ້າງ ແລະຊື້ອຸປະກອນການແພດສໍາລັບ ໂຮງໝໍເພື່ອນລາວສໍາລັບເດັກນ້ອຍ ທີ່ນະຄອນຫຼວງພະບາງ ເຊິ່ງສ້າງຕັ້ງຂຶ້ນໃນປີ 2004 ແລະເລີ່ມໃຫ້ບໍລິການ ການປິ່ນປົວ ນັບແຕ່ປີ 2015 ເປັນຕົ້ນມາ. ເປັນໂຮງໝໍແຫ່ງດຽວໃນພາກເໜືອ ທີ່ໃຫ້ການປິ່ນປົວເດັກນ້ອຍຢູ່ນະຄອນຫຼວງພະບາງ ແລະແຂວງ ຫຼວງນໍ້າທາ ໂດຍບໍ່ໄດ້ເສຍຄ່າໃຊ້ຈ່າຍ ເຊິ່ງມີຈໍານວນເດັກນ້ອຍເຂົ້າມາປິ່ນປົວຫຼາຍກວ່າ 25.000 ຄົນໃນແຕ່ລະປີ.

ການແລ່ນເພື່ອການກຸສົນໃນຄັ້ງນີ້ ທ່ານ ເຣັນຣິກ ແອນດິເຊັ່ນ ຜູ້ອໍານວຍການ ບໍລິສັດ ເບຍລາວ ຈໍາກັດ ພ້ອມດ້ວຍຄະນະ ກໍໄດ້ເປັນສ່ວນໜຶ່ງໃນການປະກອບສ່ວນເຂົ້າໃນກິດຈະກໍາດັ່ງກ່າວ ຮ່ວມກັບມວນຊົນ ຫຼາຍກວ່າ 1.600 ຄົນ ຈາກພາຍໃນ ແລະ40 ປະເທດໃນທົ່ວໂລກ. ຕະຫຼອດໄລຍະທາງຂອງການແລ່ນ ທຸກຄົນໄດ້ສໍາຜັດກັບບັນຍາກາດ, ທິວມັດທໍາມະຊາດອັນສວຍງາມ, ວິຖີຊີວິດຍາມເຊົ້າຂອງປະຊາຊົນຊາວເມືອງ ມໍລະດົກໂລກ ເປັນການສ້າງໂອກາດໃຫ້ທຸກຄົນໄດ້ມີສ່ວນຮ່ວມ ໃນການຊ່ວຍເຫຼືອສັງຄົມ ແລະໄດ້ປະໂຫຍດຈາກການອອກກໍາລັງກາຍ.

ບໍລິສັດ ເບຍລາວ ຈໍາກັດ ໂດຍຜະລິດຕະພັນນໍ້າດື່ມ ກາຫົວເສືອ ມີຄວາມພາກພູມໃຈ ທີ່ໄດ້ເປັນຜູ້ສະໜັບສະໜູນຫຼັກ ໃນການຈັດກິດຈະກໍາ ຫຼວງພະບາງ ຮາຟ ມາຣາທອນ 2018 ເປັນປີທີ 6. ຍ້ອນການໃຫ້ຄວາມສໍາຄັນໃນການປະກອບສ່ວນກິດຈະກໍາ ແລະຊ່ວຍເຫຼືອສັງຄົມຢ່າງຕໍ່ເນື່ອງ ເຮັດໃຫ້ບໍລິສັດ ເບຍລາວ ໄດ້ຮັບລາງວັນກຽດຕິຍົດ ຈາກ ໂຮງໝໍເພື່ອນລາວສໍາລັບເດັກນ້ອຍ ມອບໂດຍ ທ່ານ ດຣ. ເຄັນໂຣະ ອິຊຸ ຜູ້ກໍ່ຕັ້ງມູນນິທິບໍ່ມີພົມແດນ, ລາງວັນດັ່ງກ່າວ ໄດ້ສ້າງຄວາມພາກພູມໃຈໃຫ້ແກ່ບໍລິສັດເບຍລາວ ທີ່ໄດ້ໃຫ້ຄວາມສໍາຄັນ ໃນການຊ່ວຍເຫຼືອສັງຄົມ. ນອກນັ້ນ, ພິທີດັ່ງກ່າວ ພະອົງຍິງ ບີທຣິກ ແຫ່ງ ຢອກ ພະເຈົ້າຫຼານຂອງພະລາຊິນີ ອາລິສເບສ ທີ II ຂອງປະເທດ ອັງກິດ ກໍໄດ້ໃຫ້ກຽດເຂົ້າຮ່ວມອີກດ້ວຍ.


ທີ່ມາ:
  • ຮູບພາບ