• ລາງຮ້າຍກ່ອນແຕ່ງທີ່ບ່າວສາວຄວນພິຈາລະນາໃຫ້ດີ

ໂດຍ: Admin Mahason 26 ຕຸລາ 2018 (09.45 ນ.) Read : 1,733

ການແຕ່ງງານຖືເປັນສິ່ງສຳຄັນອີກຢ່າງໜຶ່ງຂອງຊີວິດຄົນສ່ວນຫຼາຍ ເພາະການມີຄອບຄົວທີ່ດີ ຫຼືຄອບຄົວທີ່ບໍ່ດີນັ້ນຈົ່ງສົ່ງຜົນສະທ້ອນຕໍ່ຄວາມສຸກ ແລະຄວາມໝັ້ນຄົງຂອງເຮົາ ບໍ່ດັ່ງນັ້ນ, ຄົງບໍ່ມີຄຳເວົ້າວ່າ ເອົາຜົວ/ເມຍຜິດ ຄິດຈົນຕາຍມາໃຫ້ໄດ້ຍິນດອກ. ເຖິງແມ່ນວ່າສັງຄົມຍຸກໃໝ່ຈະບໍ່ໄດ້ຈຳກັດໃຫ້ມະນຸດທຸກຄົນສາມາດແຕ່ງງານໄດ້ພຽງຄັ້ງດຽວໃນຊີວິດ ແຕ່ການປະຮ້າງແຕ່ລະຄັ້ງກໍຄືເຫດການທີ່ບໍ່ໜ້າປະທັບໃຈ ແລະກໍ່ບັນຫາໄດ້ບໍ່ໜ້ອຍ. ສະນັ້ນ, ກ່ອນການຈະຕົກລົງປົງໃຈແຕ່ລະຄັ້ງຕ້ອງພິນິດພິຈາລະນາໃຫ້ລະອຽດ ທີ່ສຳຄັນກ່ອນຈະຈູງມືໃຜເຂົ້າາປະຕູວິວາ ຕ້ອງບໍ່ມີລາງຮ້າຍດັ່ງຕໍ່ໄປນີ້:
- ວ່າທີ່ຜົວ ຫຼືເມຍຂອງເຈົ້າມີນິໄສເຈົ້າຊູ້ ແຕ່ເຈົ້າຄິດວ່າລາວຈະປ່ຽນແປງພາຍຫຼັງແຕ່ງງານ
- ຕ່າງຄົນຕ່າງຮັກກັນແບບຫູໜວກຕາບອດ ຈົນແນມບໍ່ເຫັນຄວາມບົກພ່ອງຂອງກັນ ແລະກັນ.
- ເຈົ້າແຕ່ງງານເພາະປະຊົດແຟນເກົ່າ, ເຮັດໃສ່ພໍ່ແມ່ຄອບຄົວ, ໝູ່ເພື່ອນ ຫຼືອີ່ຫຍັງກໍຕາມແຕ່.
- ແຕ່ງງານພຽງເພາະອີກຝ່າຍລວຍ, ງາມ ຫຼືຫຼໍ່ ຫຼືມີໜ້າມີຕາ.
- ແຕ່ງງານເພາະເຫງົາ, ເພາະອາຍຸຫຼາຍບໍ່ຢາກຖືກໄທບ້ານນິນທາ.
- ອີກຝ່າຍ (ໂດຍສະເພາະຝ່າຍຊາຍ) ມີນິໄສມັກໃຊ້ຄວາມຮຸນແຮງທຸບຕີຮ້າຍດ່າ; ມີຄວາມຄັ່ງໃຄ່ຕໍ່ສາສະໜາ ຫຼືຄວາມເຊື່ອໃດໜຶ່ງເກີນຂອບເຂດ.
- ອີກຝ່າຍມີນິໄສມັກກູ້ໜີ້ຢືມສິນ, ຕົວະພຸ້ນຕົວະພີ້ຈົນເປັນອາຈິນ ຫຼືມັກຫຼິ້ນການພະນັນ.
- ອີກຝ່າຍປະກອບອາຊີບຜິດກົດໝາຍ.
- ອີກຝ່າຍຍັງບໍ່ປະຮ້າງກັບຜົວ ຫຼືເມຍເກົ່າຢ່າງເປັນທາງການ.
ແລະຂໍ້ສຸດທ້າຍທີ່ສຳຄັນຄື ຄົນທັງສອງບໍ່ມີສິນສະເໝີກັນ ສິນທີ່ວ່ານີ້ໝາຍເຖິງ ການໃຊ້ຊີວິດ, ຄວາມເຊື່ອ, ທັດສະນະຄະຕິ, ມຸມມອງ, ຄວາມຕ້ອງການ ຕະຫຼອດຈົນຮອດນິໄສໃຈຄໍ ເພາະມັນຈະເປັນທີ່ມາຂອງຂັດແຍ່ງຕ່າງໆ ແລ້ວລົງເອີ່ຍດ້ວຍການເລີກລາ. ຍົກຕົວຢ່າງຂອງຄູ່ຮັກທີ່ສິນບໍ່ສະເໝີກັນ: ຝ່າຍໜຶ່ງຫຼູຫຼາຟຸມເຟືອຍ ແຕ່ອີກຝ່າຍໜຶ່ງຂີ້ຖີ່ຂີ້ໜຽວ ພໍຈະຈິນຕະນາການບັນຫາທີ່ຈະເກີດຂຶ້ນລະຫວ່າງສອງຜົວເມຍນີ້ໄດ້ຫຼືບໍ່?
ລອງພິຈາລະນາໃຫ້ດີວ່າຄູ່ຂອງທ່ານມີລາງຮ້າຍຄືດັ່ງທີ່ກ່າວມາຂ້າງເທິງຫຼືບໍ່ ຫາກມີຄວນຟ້າວຫາວິທີແກ້ໄຂ. ການເສຍເຄາະເສຍເຂັນແກ້ລາງຮ້າຍນີ້ ບໍ່ຈຳເປັນຕ້ອງໄປເຮັດກະໂທງຢູ່ວັດ ພຽງແຕ່ທ່ານໃຊ້ສະໝອງ ແລະສະຕິໃຫ້ຫຼາຍກວ່າອາລົມ ແລະຄວາມຮູ້ສຶກ ແລ້ວຊີວິດສ່ວນຕົວ ແລະຊີວິດຄອບຄົວຈະດຳເນີນໄປຢ່າງລາບລື້ນ. 

ທີ່ມາ:
  • ແທັກທີ່ກ່ຽວຂ້ອງ