• ໜ້າເສຍດາຍ ທີມຊາດລາວບໍ່ສາມາດໄປຕໍ່ໄດ້

ໂດຍ: ສີເປື້ອນມື 05 ຕຸລາ 2018 (15.55 ນ.) Read : 208

ໃນການແຂ່ງຂັນ Bangabandhu​ Gold Cup International Tournament 2018. ທີມຊາດລາວລົງສະໜາມນັດທີ 2 ຂອງກຸ່ມ B ພົບ ທີມຊາດຟິລິບປິນ, ແຂ່ງຢູ່ສະໜາມ Sylhet District Stadium, Sylhet, Bangladesh. ນັດນີ້ ຄູຝຶກ ທ່ານ ໄມວອງ ຈັດດາວຮຸ່ງປະສົມກັບນັກເຕະປະສົບການສູງໃນທີມຊາດ ເພື່ອທົດລອງຄວາມສາມາດ, ລະບົບທີມ, ເພື່ອຈະໄດ້ເຫັນວ່ານັກເຕະຄົນໃດສາມາດຫຼິ້ນເຂົ້າກັບລະບົບທີມ ແລະເປັນການຄົ້ນຫານັກເຕະໃໝ່ມາຮັບໃຊ້ທີມຊາດ ເພາະນັກເຕະບາງຄົນກໍຮັບໃຊ້ທີມຊາດມາດົນ ປະກອບກຳພະລະກຳລັງກໍຄ່ອຍຫຼຸດລົງຕາມອາຍຸທີ່ນັບມື້ນັບຫຼາຍຂຶ້ນ ແລະເປັນລາຍການແຂ່ງຂັນທີ່ດີ ໃຫ້ທີມຊາດລາວ ໄດ້ທົດລອງທີມກ່ອນການ ແຂ່ງຂັນບານເຕະຊິງແຊ້ມອາຊຽນ 2018 ຫຼື AFF Suzuki Cup 2018 ທີ່ຈະເປີດສາກການແຂ່ງຂັນລະຫວ່າງ 8 ພະຈິກ ຫາ 15 ທັນວາ 2018.

ຫຼັງຈາກສຽງໝາກວີດຈາກກຳມະການດັງຂຶ້ນ ນັກເຕະທຸກຄົນຊ່ວຍກັນຫຼິ້ນ ຈົນສຸດຄວາມສາມາດ ເພື່ອຈະພິສູດໃຫ້ຄູຝຶກເຫັນວ່າ ສາມາດຫຼິ້ນເຂົ້າກັບລະບົບທີມຊາດທີ່ທາງ ຄູຝຶກ ທ່ານ ໄມວອງ ໄດ້ວາງໄວ້. ແຕ່ກໍຍັງມີບາງຈຸດທີ່ຍັງມີຂໍ້ຜິດພາດ ຈຶ່ງເຮັດໃຫ້ຜົນການແຂ່ງຂັນອອກມາບໍ່ສົມຫວັງ, ຄົບ 90 ນາທີ ທີມຊາດລາວ ເສຍ ທີມຊາດຟິລິບປິນ 1-3.
-
ທີມຊາດຟິລິບປິນ ໄດ້ 3 ປະຕູຈາກ: Bedic (P) 44', Gayoso 53' ແລະ Bahadoran (P) 82'
-
ທີມຊາດລາວ ໄດ້ 1 ປະຕູຈາກ ພິທັກ ກອງມາທິລາດ ຍິງຈຸດໂທດ ໃນນາທີ 89.

ທີມຊາດລາວຕົກຮອບແບ່ງກຸ່ມ B: ແຂ່ງຂັນຂອງທີມຊາດລາວ 2 ນັດ, ເສຍທັງ 2 ນັດ, ບໍ່ມີຄະແນນ: ເສຍໃຫ້ເຈົ້າພາບ ບັງກະລາເທດ 0-1 ແລະເສຍໃຫ້ ຟິລິບປິນ 1-3. ສ່ວນຟິລິບປິນ ແລະເຈົ້າພາບ ບັງກະລາເທດ ເຂົ້າຮອບ 4 ທີມສຸດທ້າຍ ໂດຍຈະການເປັນຕັດສິນວ່າໃຜຈະເຂົ້າຮອບເປັນອັນດັບ 1 ຫຼື2 ຂອງກຸ່ມ B ຈະແຂ່ງຂັນໃນວັນທີ 5 ຕຸລານີ້.
      ສ່ວນກຸ່ມ A ສືບຕໍ່ແຂ່ງຂັນນັດທີ 2 ວັນທີ 04 ຕຸລາ 2018 ຜ່ານມາ ທາງປາກິສະຖານ ພົບ ປາເລດຕິນ ເວລາ 19:30 ໂມງ.

Photo: LFF

Cr. ຂ່າວກີລາ Lao National TV

 


ທີ່ມາ: https://www.facebook.com/Sportlntv/posts/330302981071834
  • ຮູບພາບ

  • ແທັກທີ່ກ່ຽວຂ້ອງ