• ລອງຜິດລອງຖືກຫຼາຍຢ່າງ ຈົນຄົ້ນພົບສິ່ງທີ່ຕົນມັກ

ໂດຍ: 26 ມີນາ 2018 (05.09 ນ.) Read : 739

ທ່ານ ນາງ ມາລິສາ ຄໍາສົງກາ ເຈົ້າຂອງຮ້ານ The New York Cake (Premium Quality ) ກ່ອນໜ້າທີ່ຈະມາເຮັດທຸລະກິດຂາຍເຄັກທາງອອນລາຍ ຜູ້ທີ່ເຄີຍປະກອບອາຊີບຫຼາຍຢ່າງ ເຊັ່ນ: ທຸລະກິດຮ້ານອາຫານ, ຮ້ານຈໍາໜ່າຍໂທລະສັບ, ຮ້ານປະດັບຍົນ, ຮ້ານສ້ອມແປງ ແລະຂາຍລົດມືສອງ, ຮ້ານຂາຍເສື້ອຜ້າ ແລະເມື່ອຄາວທີ່ໄປອາໄສຢູ່ຕ່າງປະເທດກໍໄດ້ ເປີດຮ້ານນວດແຜນບູຮານ ແລະຮ້ານອາຫານໄທ ເມື່ອກັບມາລາວຈຶ່ງຢາກໃຫ້ຕົນເອງມີເວລາພັກຜ່ອນ ຈຶ່ງໄດ້ເປີດຮ້ານເຄັກເປັນທຸລະກິດນ້ອຍໆ.

ຍ້ອນຕົນເອງ ແລະຄອບຄົວເປັນຄົນທີ່ມັກກິນເຄັກ ແລະຂອງຫວານ ເມື່ອໄປກິນໃນຮ້ານແພງໆ ລົດຊາດບໍ່ໄດ້ຕາມທີ່ເຮົາຄິດໄວ້. ຈຶ່ງເປັນແຮງບັນດານໃຈໃຫ້ເຮົາຢາກລົງມືເຮັດ ເພື່ອຢາກໃຫ້ຄົນລາວໄດ້ບໍລິໂພກເຄັກທີ່ມີຄຸນນະພາບ ແລະລົດຊາດດີ. ຫຼັງຈາກນັ້ນ, ຕົນເອງຈຶ່ງໄດ້ໄປສຶກສາວິທີການເຮັດເຄັກຢູ່ປະເທດ ອາຟຣິກາ, ໄທ ແລະຄົນປະເທດຝຣັ່ງ ເຊິ່ງເພິ່ນໄດ້ໃຫ້ຄໍາແນະນໍາວ່າ: “ເຄັກຈະບໍ່ມີສູດ ຖ້າເຮັດເຄັກຕາມສູດ ເຈົ້າຈະບໍ່ມີຄວາມສໍາເລັດ ເພາະເຄັກມັນອອກມາຈາກຫົວໃຈ” ຖ້າເຈົ້າມັກກິນອັນໃດກໍເອົາສິ່ງນັ້ນມາເຮັດເຄັກ “ເຄັກທີ່ແຊບທີ່ສຸດບໍ່ແມ່ນເຄັກທີ່ມາຕາມສູດ ແມ່ນເຄັກທີ່ເຮົາລອງຜິດລອງຖືກຈົນໄດ້ສູດຂອງເຮົາເອງ”
ນັບຕັ້ງແຕ່ມີເປີດ ໃນຊ່ວງເດືອນ ພຶດສະພາ 2017 ເປັນຕົ້ນມາ ກໍໄດ້ມີຍອດສັ່ງເພີ່ມຂຶ້ນເລື້ອຍໆ ແລະໄດ້ຮັບກະແສຕອບຮັບຈາກລູກຄ້າເປັນຢ່າງດີ ໂດຍບໍ່ມີການໂຄສະນາ ມີພຽງການໂພດສ໌ຂາຍໃນເຟດບຸກສ່ວນຕົວຂອງຕົນ. ເຄັກທີ່ໄດ້ຮັບຄວາມນິຍົມ ຫຼາຍທີ່ສຸດຄື: ເຄັບເຄັກຊັອກໂກແລັດ, ຊີດເຄັກໝາກນອດ, ເຄັກໝາກພ້າວ, ເຄັກໝາກໄມ້ ຕາມລະດູການ ເຊັ່ນ: ໝາກທຸລຽນ, ໝາກມ່ວງ, ໝາກກ້ວຍ...ໂດຍສ່ວນປະກອບເຮົາຈະນໍາໃຊ້ວັດຖຸດິບທີ່ເປັນໝາກໄມ້ສົດທັງໝົດ ແລະບໍ່ໃຊ້ສານເຈືອປົນ ຫຼືສີສັງເຄາະ.

ນອກຈາກເຄັກທີ່ມີຂະໜາດ 1, 2 ແລະ3 (ຂະໜາດຍອດນິຍົມ) ປອນແລ້ວ ຍັງຮັບເຮັດເຄັກທີ່ມີຂະໜາດໃຫຍ່ເຖິງ 12 ປອນ ເພື່ອຮອງຮັບກັບງານລ້ຽງຂະໜາດນ້ອຍ ແລະກາງ. ມື້ໜຶ່ງສາມາດຜະລິດເຄັກໄດ້ 8 ກ້ອນ ໂດຍ 1 ກ້ອນໃຊ້ເວລາ 3-4 ຊົ່ວໂມງ.

ເຄັກທີ່ເຮັດດ້ວຍວັດຖຸດິບທີ່ມີຄຸນນະພາບ ຈຶ່ງເຮັດໃຫ້ລົດຊາດຂອງເຄັກອອກມາດີ ແລະແຕກຕ່າງຈາກເຄັກທົ່ວໄປ. ຍອດຈໍາໜ່າຍສະເລັ່ຍ 5 ກ້ອນຕໍ່ມື້ ໂດຍສະເພາະໃນວັນລັດຖະການຈະມີຄົນສັ່ງເຄັກຫຼາຍທີ່ສຸດ. ລາຄາເຄັກເລີ່ມຕົ້ນ 20.000 ກີບ ເຖິງແມ່ນວ່າຈະໄດ້ກໍາໄລໜ້ອຍກໍຕາມ ແຕ່ຢາກໃຫ້ຄົນລາວໄດ້ລອງກິນ ເຄັກທີ່ມີຄຸນນະພາບສີມືຄົນລາວ. ອາຍຸຂອງເຄັກຈະຢູ່ໄດ້ປະມານ 3-5 ມື້ເທົ່ານັ້ນ ເພາະຫຼັງຈາກນັ້ນໄປ ລົດຊາດ ແລະຄຸນນະພາບມັນຈະບໍ່ຄືເກົ່າ.

ເມື່ອມາຕັດສິນໃຈເຮັດເຄັກ ຮູ້ສຶກວ່າມັນສະບາຍໃຈ, ບໍ່ມີຄວາມກົດດັນ ແລະເຮົາສາມາດເຮັດໃຫ້ຄົນທີ່ຜູ້ບໍລິໂພກມີຄວາມສຸກເຮົາກໍມີຄວາມສຸກ. ຢາກໃຫ້ທຸກຄົນໝັ້ນໃຈວ່າເຄັກຂອງເຮົາທີ່ນໍາໃຊ້ວັດຖຸດິບຫຼັກທີ່ນໍາເຂົ້າແມ່ນມາຈາກປະເທດ ເບວຢ້ຽມ, ເຢຍລະມັນ ແລະຝຣັ່ງ ເຊິ່ງເປັນວັດຖຸດິບທີ່ມີຄຸນນະພາບ ໂດຍທີ່ຜູ້ບໍລິໂພກບໍ່ຕ້ອງຢ້ານຕຸ້ຍ ເພາະບໍ່ມີສານເຄມີໃດໆ.

ທ່ານໃດສົນໃຈສັ່ງເຄັກ ສາມາດສັ່ງ ບ້ານ ຫາຍໂຊກ ເມືອງ ສິສັດຕະນາກ ນະຄອນຫຼວງວຽງຈັນ ຮ່ອມຂ້າງຮ້ານ Betagro ກ່ອນຮອດສູນຂາຍລົດ ນິດສັນ ເຂົ້າໄປແລ້ວຈະມີທາງແຍກ ໃຫ້ລ້ຽວຊ້າຍ ເຮືອນຫຼັງທີສອງ ທີ່ມີປ້າຍຮ້ານ The New York Cake. ເບີໂທລະສັບ: 020 5231 2420 ແລະFacebook: Lisa Sweetie Sweetie ເລີ່ມຈັດສົ່ງສິນຄ້າຕັ້ງແຕ່ເວລາ 14:00-21:00 ໂມງທຸກມື້.
ພິເສດ!! ໂປຼໂມຊັ່ນສໍາຫຼັບຊ່ວງນີ້ ຖ້າຫາກສັ່ງເຄັກນ້ອຍ 4 ປ່ຽງຂຶ້ນໄປ ມູນຄ່າກ້ອນລະ 20.000 ກີບ ເຮົາມີບໍລິການຈັດສົ່ງຟຣີທົ່ວນະຄອນຫຼວງວຽງຈັນ.
ໂດຍ: ສີເປື້ອນມື




ທີ່ມາ: