• ວິໄລລັກ ປ໊ອບຄອນ ຄວາມຫວານ ທີ່ທ່ານຕ້ອງລອງ

ໂດຍ: Admin Mahason 04 ມັງກອນ 2018 (08.10 ນ.) Read : 1,656

ການປະກອບອາຊີບ ບໍ່ວ່າຈະເປັນທຸລະກິດຂະໜາດນ້ອຍ ຫຼືໃຫຍ່ ກໍລ້ວນແຕ່ມີຄວາມສໍາຄັນ ຖ້າເຮົາໃສ່ໃຈ ແລະມັກກັບສິ່ງທີ່ຕົນເຮັດ ເຊິ່ງຜົນທີ່ຕອບແທນມາກໍຄືຄວາມສໍາເລັດ. ບາງຄົນຍັງຄົນຫາຕົວເອງບໍ່ພົບ, ບໍ່ຮູ້ວ່າ ຕົນເອງຕ້ອງການຫຍັງ ແລະສິ່ງໃດຄືຄວາມສຸກທີ່ແທ້ຈິງ.

ທ່ານ ນາງ ວິໄລລັກ ສີທົນທອງ ເຈົ້າຂອງຮ້ານ ວິໄລລັກ ປ໊ອບຄອນ ໄດ້ກ່າວວ່າ: ດ້ວຍຄວາມທີ່ຕົນເອງມີຄວາມມັກເລື່ອງຂອງການເຮັດ ເຂົ້າໜົມ ປ໊ອບຄອນ ມາກ່ອນ ໂດຍການໄປສຶກສາວິທີການເຮັດເພີ່ມຕື່ມນໍາພີ່ນ້ອງຢູ່ທີ່ ປະເທດໄທ ແລະມີຄວາມຄິດຢາກມາເປີດຮ້ານເປັນຂອງຕົນເອງຢູ່ລາວ ຍ້ອນຄິດວ່າດ້ວຍລົດຊາດທີ່ມັນຕ້ອງມີຄົນນິຍົມຢ່າງແນ່ນອນ ແລ້ວຕົນເອງຈຶ່ງຕັດສິນໃຈເປີດຮ້ານຂາຍ ປ໊ອບຄອນ ຂຶ້ນ ເຊິ່ງໄດ້ເລີ່ມດໍາເນີນກິດຈະການມາເປັນເວລາປະມານ 1 ປີກວ່າ. ຈາກຈຸດເລີ່ມຕົ້ນທີ່ຕັດສິນໃຈເຮັດຮ້ານ ຕົນເອງກໍໄດ້ນໍາເອົາ ເຂົ້າໜົມ ປ໊ອບຄອນ ທີ່ໄດ້ເຮັດໄປສະເໜີຂາຍຕາມຮ້ານຄ້າຕ່າງໆ ເຊັ່ນ: ຮ້ານເຝີ, ຮ້ານ ມິນິມາກ, ຂາຍເຄື່ອງຍ່ອຍທົ່ວໄປ ແລະໃນເທດສະການຕ່າງໆ... 

ໃນປັດຈຸບັນມີຍອດການສັ່ງ ປ໊ອບຄອນ ມື້ໜຶ່ງສະເລັ່ຍ 100 ກວ່າກ໋ອງ ແລະປ໊ອບຄອນທີ່ໄດ້ຮັບຄວາມນິຍົມທີ່ສຸດໃນຊ່ວງນີ້ ຄື: ລົດເຄັມ, ລົດຫວານ, ລົດຄາລາເມວ (ເປັນສູດພິເສດທີ່ເຈົ້າຂອງຮ້ານປະສົມເອງ) ແລະລົດຊັອກໂກແລັດ ເຊິ່ງໃນນີ້ ລົດຫວານ ເປັນລົດຊາດຍອດນິຍົມ ແລະຂາຍດີທີ່ສຸດ. ນອກນັ້ນ, ກໍຍັງມີລົດຊີດສ໌, ໃບເຕີຍ, ສະຕໍເບີຣີ່, ວານິລາ ແລະອື່ນໆຕາມລູກຄ້າສັ່ງ. ສ່ວນອາຍຸການເກັບຮັກສາຄຸນນະພາບຂອງ ປ໊ອບຄອນ ຂຶ້ນກັບສະພາບອາກາດ ຖ້າເກັບໄວ້ໃນບ່ອນທີ່ມີແສງແດງ ຫຼືມີຄວາມຮ້ອນຫຼາຍກໍຈະເຮັດໃຫ້ອາຍຸມັນສັ້ນລົງ ເຊິ່ງຈະຢູ່ໄດ້ພຽງ 7 ມື້. ແຕ່ຖ້າຫາກຢູ່ໃນບ່ອນທີ່ມີອາກາດດີ ຫຼືເກັບຮັກສາໄວ້ບ່ອນທີ່ມີອາກາດເຢັນ ກໍຈະເຮັດໃຫ້ຮັກສາຄຸນນະພາບໄດ້ດົນຍິ່ງຂຶ້ນ ມັນຈະຢູ່ໄດ້ເຖິງ 15-20 ມື້. ໃນກໍລະນີທີ່ສິນຄ້າຮອດວັນໝົດອາຍຸ ເຮົາກໍຈະປ່ຽນສິນຄ້າໃໝ່ທົດແທນ ເພື່ອໃຫ້ລູກຄ້າໄດ້ບໍລິໂພກສິນຄ້າທີ່ມີຄຸນນະພາບ.

ການເຮັດທຸລະກິດຂາຍ ປ໊ອບຄອນ ແມ່ນມີຄວາມລຽບງ່າຍ ເຊິ່ງໃຜກໍສາມາດເຮັດແຕ່ຂໍພຽງແຕ່ມີໃຈມັກ, ພະຍາຍາມລອງຜິດລອງຖືກຫຼາຍຄັ້ງ ເພື່ອໃຫ້ໄດ້ລົດຊາດທີ່ອອກມາແຊບທີ່ສຸດ ແລະສາມາດຕອບສະໜອງຕາມຄວາມຕ້ອງການຂອງລູກຄ້າໄດ້. ສ່ວນເຄັດລັບທີ່ເຮັດໃຫ້ພວກເຮົາຢູ່ໄດ້ກໍຍ້ອນກະແສຕອບຮັບຈາກລູກຄ້າເປັນຢ່າງດີ ນັບຕັ້ງແຕ່ມື້ເລີ່ມຂາຍກໍໃຫ້ຄວາມສົນໃຈໃນສິນຄ້າຂອງພວກເຮົາ, ພວກເຮົາໄດ້ນໍາເອົາຄໍາແນະຂອງລູກຄ້າກັບສິ່ງທີ່ພວກເຂົາຢາກໃຫ້ເປັນ ເຮົາກໍສາມາດຈັດໃຫ້ຕາມໃຈໄດ້ ຕົວຢ່າງ: ການເພີ່ມ ຫຼືຫຼຸດຄວາມຫວານ ແລະໃສ່ກິນຂອງລົດຊາດເພີ່ມຂຶ້ນ ເຊິ່ງເປັນເປັນອີກຢ່າງໜຶ່ງທີ່ພວກເຮົາໄດ້ໃສ່ໃຈກັບລູກຄ້າ.

ວີທີການສັ່ງຊື້ ປ໊ອບຄອນ ທ່ານສາມາດໄປຊື້ດ້ວຍຕົນເອງໄດ້ ພ້ອມທັງໄດ້ຮັບສ່ວນຫຼຸດຕື່ມ ຫຼືຈະໃຫ້ມາສົ່ງເຖິງສະຖານທີ່ເລີຍກໍໄດ້ (ສະເພາະໃນນະຄອນຫຼວງວຽງຈັນ) ໃນຈໍານວນ 10-20 ກ໋ອງຂຶ້ນໄປ. ສ່ວນຕ່າງແຂວງສົ່ງໃຫ້ໄດ້ແຕ່ຕ້ອງສັ່ງເປັນຈໍານວນຫຼາຍ ຄື: 100 ກ໋ອງຂຶ້ນໄປ. ຜ່ານມາກໍໄດ້ມີການສົ່ງໄປຕ່າງແຂວງຈໍານວນໜຶ່ງ ເຊັ່ນ: ແຂວງ ຊຽງຂວາງ, ບໍລິຄໍາໄຊ, ຊໍາເໜືອ, ຫຼວງພະບາງ ແລະໄຊຍະບູລີ.... 

ສະຖານທີ່ຕັ້ງຢູ່ບ້ານ ຮ່ອງຄ້າ ເມືອງ ຈັນທະບູລີ ນະຄອນຫຼວງວຽງຈັນ (ຂ້າງຫ້ອງການບ້ານ ຮ່ອງຄ້າ). ສົນໃຈສັ່ງຊື້ຕິດຕໍ່ໄດ້ທີ່ເບີໂທ: 020 2256 4415.



ທີ່ມາ:
  • ແທັກທີ່ກ່ຽວຂ້ອງ