• ເຮັດໃນສິ່ງທີ່ຮັກ ມັກຈະປະສົບຜົນສໍາເລັດ “ບຸດສະຍາ ຜ້າໄໝ”

ໂດຍ: Admin Mahason 04 ມັງກອນ 2018 (07.59 ນ.) Read : 1,232

ທ່ານ ນາງ ບຸດສະຍາ ວຽງວິເສດ ໄດ້ສຳເລັດການສຶກສາ ໃນລະດັບປະລິນຍາໂທ ສາຂາ ບໍລິຫານທຸລະກິດ MBA ທີ່ສະຖາບັນ NAPPA ພາຍຫຼັງທີ່ສຳເລັດການສຶກສາ ກໍໄດ້ເຮັດວຽກກັບບໍລິສັດ ໄຟຟ້ານ້ຳເທີນ 2 ເປັນຜູ້ຊ່ວຍ ຜູ້ອໍານວຍການໃຫຍ່ເປັນເວລາ 7 ກວ່າປີ. 

ໂດຍສ່ວນຕົວແລ້ວ ຕົນເອງເປັນຄົນທີ່ມັກນຸ່ງສິ້ນມາຕັ້ງແຕ່ນ້ອຍ ແລະມັກໃນເລື່ອງຂອງສິລະປະວັນນະຄະດີລາວ ພ້ອມທັງໄດ້ຮຽນວິທີການຂາຍສິ້ນມານຳແມ່ຕັ້ງແຕ່ນ້ອຍ. ຈາກຈຸດດັ່ງກ່າວ ຕົນເອງຈຶ່ງໄດ້ຊອກຮຽນຮູ້ ແລະສຶກສາຂອງລວດລາຍດັ້ງເດີມຂອງປະເພດຜ້າ. ໃນປີ 2011 ໄດ້ເລີ່ມຂາຍຜະລິດຕະພັນແຜ່ນແພລາວ ຜ່ານທາງເຟດບຸກ ໂດຍເລີ່ມຈາກ 10 ຜືນ ເຊິ່ງກໍໄດ້ຮັບການຕອບຮັບດີຈາກລູກຄ້າ ຈາກນັ້ນກໍມີຜູ້ສົນໃຈໃນສິນຄ້າຕົນຫຼາຍຂຶ້ນ ດ້ວຍເຫດນັ້ນ ຕົນເອງຈຶ່ງໄດ້ມີການເພີ່ມຈຳນວນສິນຄ້າຂຶ້ນເລື້ອຍໆ.

 ຍ້ອນຄວາມມັກຮັກໃນສິ່ງທີ່ຕົນເອງເຮັດ ແລະມີຄວາມພ້ອມໃນທຸກດ້ານ ຈຶ່ງໄດ້ຕັດສິນໃຈເປີດຮ້ານ “ບຸດສະຍາ ຜ້າໄໝ” ຂຶ້ນ ແລະຍຶດຖືອາຊີບດັ່ງກ່າວມາຈົນເຖິງປະຈຸບັນ ເພາະມີຄວາມໝັ້ນໃຈວ່າ: “ເຮັດໃນສິ່ງທີ່ມັກຈະຕ້ອງໄດ້ດີແນ່ນອນ”. ນອກຈາກນັ້ນ, ກໍໄດ້ໄປສຶກສາແບບລວດລາຍຜ້າບູຮານມາປະສົມປະສານກັບສະໄໝໃໝ່ ເພື່ອຢາກສ້າງຈຸດແຕກຕ່າງໃຫ້ກັບສິນຄ້າ ເພື່ອເປັນການສົ່ງເສີມການນຸ່ງສິ້ນລາຍເກົ່າແບບບູຮານ ແລະຍັງເປັນການສົ່ງເສີມລາຍໄດ້ໃຫ້ແກ່ຊາວບ້ານທີ່ຕຳຫູກຢູ່ເຂດຊົນນະບົດ.
 
ສຳຫຼັບທຸລະກິດຜ້າໄຫມແລ້ວ ຄິດວ່າມັນຂ້ອນຂ້າງຍາກໃນການບໍລິຫານທຶນໝູນວຽນ ເພາະມີການລົງທຶນທີ່ຂ້ອນຂ້າງສູງ, ຕ້ອງມີສິນຄ້າຫຼາກຫຼາຍແບບມາໃຫ້ລູກຄ້າຕະຫລອດ, ການຮັກສາມາດຕະຖານຂອງສິນຄ້າ, ການບໍລິການຖືເປັນເລື່ອງສຳຄັນທີ່ຕ້ອງເອົາໃຈໃສ່, ສາມາດຕອບໂຈດທຸກຄວາມຕ້ອງການຂອງລູກຄ້າ ເພື່ອທີ່ຈະຮັກສາລູກຄ້າເກົ່າ ແລະດຶງດູດລູກຄ້າໃຫມ່ໃຫ້ເຂົ້າມາໃຊ້ບໍລິການ.

ໃນອະນາຄົດ ມີແຜນທີ່ຈະຂະຫຍາຍຕະຫລາດໄປຍັງປະເທດເພື່ອນບ້ານ ແລະສ່ວນຮ້ານກໍຈະຂະຫຍາຍໃຫ້ໃຫຍ່ຂຶ້ນ ເພື່ອທີ່ຈະສາມາດວາງສະແດງເຄື່ອງນຸ່ງຫົ່ມບັນດາເຜົ່າສະໄໝບູຮານຈົນເຖິງປະຈຸບັນເພື່ອສົ່ງເສີມໃຫ້ຄົນຍຸກໃຫມ່ຮຽນຮູ້ເຖິງເລື່ອງລາວຕຳນານລາຍຜ້າ.

ສຸດທ້າຍຝາກເຖິງລູກຄ້າທຸກທ່ານຮູ້ວ່າ: ທຸກລາຍຜ້າ ມີຄວາມຫມາຍທາງດ້ານສິລະປະ ແລະບົ່ງບອກເຖິງວັດທະນະທຳລາວ ຢາກຂໍໃຫ້ທຸກຄົນອານຸລັກຮັກສາຄວາມໝາຍຂອງລາຍແຜ່ນຜ້າໄວ້ ຈົນຮອດລຸ້ນຕໍ່ໆໄປເພື່ອເກັບໄວ້ໃຫ້ລູກຫລານເຮົາໄດ້ຮຽນຮູ້ເຖິງຄວາມຫມາຍຂອງລາຍຜ້າບູຮານໄດ້ ແລະສາມາດອະທິບາຍໃຫ້ຊາວຕ່າງຊາດຮູ້ເຖິງຄວາມຫມາຍຂອງມັນ ບອກໄດ້ເລີຍວ່າ: ຊາວຕ່າງຊາດຈະເວົ້າເປັນສຽງດຽວກັນວ່າ: “Amazing”

ຮ້ານ ບຸດສະຍາ ຜ້າໄໝ ຕັ້ງຢູ່ບ້ານ ສີໄຄທ່າ ຮ່ອມ 4 ເມືອງ ສີໂຄດຕະບອງ ນະຄອນຫລວງວຽງຈັນ ເບີໂທ 020 ຫຼືເບິ່ງສິນຄ້າໄດ້ທີ່ ເຟດບຸກຊື່: Boutsaya Saya. ສ່ວນລູກຄ້າທີ່ສັ່ງຊື້ທາງອອນລາຍ ທາງຮ້ານມີບໍລິການສົ່ງເຖິງທີ່ຟຣີ ພາຍໃນນະຄອນຫຼວງ ແລະຕ່າງແຂວງມີຄ່າບໍລິການຕາມໄລຍະທາງ.




ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ