• ສປປ ລາວ ບໍ່ມີຄົນຕິດເຊື້ອໂຄວິດ-19 ເພີ່ມ ແຕ່ບໍ່ຄວນປະໝາດ

ໂດຍ: ສີເປື້ອນມື 29 ມີນາ 2021 (15.01 ນ.) Read : 1,623

ໃນວັນທີ 29 ມີນາ 2021 ຢູ່ກະຊວງສາທາລະນະສຸກ ທ່ານ ດຣ. ພອນປະເສີດ ໄຊຍະມຸງຄຸນ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ, ຕາງໜ້າໃຫ້ຄະນະສະ ເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ COVID-19 ໄດ້ລາຍງານໃຫ້ຮູ້ວ່າ: ໃນວັນທີ 28 ມີນາ 2021 ການເຝົ້າລະວັງຮອດ 5 ໂມງແລງ ມີຄົນເດີນທາງເຂົ້າມາ 3.118 ຄົນ, ໄດ້ເກັບຕົວຢ່າງມາກວດວິເຄາະ ທັງໝົດ 423 ຄົນ ແລະ ໄດ້ແທກອຸນຫະພູມຮ່າງກາຍ, ບໍ່ພົບຜູ້ມີອາການເປັນໄຂ້ ແລະ ໄດ້ນຳສົ່ງໄປ ຫາສະຖານທີ່ຈຳກັດບໍລິເວນທີ່ກຳນົດໄວ້, ສັງລວມການກວດວິເຄາະ ນັບແຕ່ເດືອນມັງກອນ 2020 ຮອດປັດຈຸບັນ ໄດ້ເກັບຕົວຢ່າງມາກວດທັງໝົດ 131.729 ຕົວຢ່າງ, ກວດພົບເຊື້ອສະສົມ 49 ຄົນ. ມາຮອດປັດຈຸບັນ ຜູ້ຕິດເຊື້ອພະຍາດ COVID-19 ຍັງນອນຕິດຕາມປິ່ນປົວຢູ່ໂຮງໝໍຈຳນວນ 4 ຄົນ, ທຸກຄົນແມ່ນມີສຸຂະພາບຮ່າງກາຍຈິດໃຈສົມບຸນ ແລະ ແຂງ ແຮງດີ, ຜູ້ຕິດເຊື້ອ 3 ຄົນ ຕິດຕາມປິ່ນປົວຢູ່ນະຄອນຫລວງວຽງຈັນ ແລະ ອີກ 1 ຄົນ ຕິດຕາມປິ່ນ ປົວຢູ່ແຂວງສະຫວັນນະເຂດ. ປັດຈຸບັນ ທົ່ວປະເທດມີສູນຈໍາກັດບໍລິເວນ ທີ່ຍັງເປີດນຳໃຊ້ຢູ່ທັງໝົດ 35 ສູນ, ມີຜູ້ຖືກຈຳກັດບໍລິເວນຢູ່ສູນ 3.268 ຄົນ, ໄດ້ເກັບຕົວຢ່າງມາກວດວິເຄາະທັງໝົດ ແລະ ບໍ່ພົບຜູ້ຕິດເຊື້ອ.
ປັດຈຸບັນ ສປປ ລາວ ໄດ້ຮັບການຊ່ວຍເຫລືອວັກແຊງ ປ້ອງກັນພະຍາດໂຄວິດ-19 ຈາກ ສປ ຈີນ ຈຳນວນ 300.000 ໂດສ, ຈາກ ສ.ຣັດເຊຍ 1.000 ໂດສ ແລະ ຈາກອິນເດຍ 132.000 ໂດສ; ການສັກວັກແຊງ ແມ່ນເພື່ອແກ້ໄຂພາວະສຸກເສີນ ຈາກການລະບາດຂອງພະຍາດໂຄວິດ-19 ຈຶ່ງໄດ້ສຸມໃສ່ກຸ່ມເປົ້າໝາຍບູລິມະສິດກ່ອນ ເປັນຕົ້ນແມ່ນ ພະນັກງານແພດໝໍ, ພະນັກງານດ່ານໜ້າຜູ້ທີ່ມີຄວາມສ່ຽງສູງ ຢູ່ສູນກາງ ແລະ ທ້ອງຖິ່ນ. ມາຮອດປັດຈຸບັນໄດ້ສັກວັັກແຊງ ໃຫ້ແກ່ກຸ່ມເປົ້າໝາຍບູລິມະສິດ ທັງໝົດ 112.000 ຄົນ ໃນຂອບເຂດທົ່ວປະເທດ. ນອກຈາກກຸ່ມຄົນທີ່ກ່າວມານັ້ນ, ຖ້າມີ ຄວາມຈຳເປັນຕ້ອງໄດ້ຮັບວັກແຊງ ຈະຕ້ອງໄດ້ນຳສະເໜີ ຫາຄະນະສະເພາະກິດ ເພື່ອພິຈາລະນາແກ້ໄຂຕາມເງື່ອນໄຂຄວາມເປັນຈິງ. ປັດຈຸບັນ ລັດຖະບານ ຍັງສືບຕໍ່ພົວພັນປະສານງານກັບພາກສ່ວນທີ່ສະໜອງຢາວັກແຊງດັ່ງກ່າວ, ເພື່ອຈະນຳວັກແຊງເຂົ້າມາຕື່ມ ແລະ ຖ້າໄດ້ຮັບວັກແຊງເພີ້ມ ກໍຈະໄດ້ພິຈາລະນາໃຫ້ວັກແຊງ ກຸ່ມຄົນອື່ນໃນສັງຄົມໃນຂັ້ນຕໍ່ໄປ.
ທ່ານ ດຣ. ພອນປະເສີດ ໄຊຍະມຸງຄຸນ ກ່າວຕື່ມວ່າ: ສະພາບການລະບາດຂອງພະຍາດໂຄວິດ-19 ຂອງແຕ່ລະປະເທດໃນທົ່ວໂລກ ຍັງສືບຕໍ່ມີລາຍງານຜູ້ຕິດເຊື້ອ ແລະ ຜູ້ເສຍຊີວິດ, ຕໍ່ກັບສະພາບການດັ່ງກ່າວ, ຂໍຮຽກຮ້ອງມາຍັງບັນດາ ພໍ່ແມ່, ພີ່ນ້ອງ, ປະຊາຊົນລາວບັນດາເຜົ່າ ຈົ່ງໄດ້ພ້ອມໃຈກັນຍົກສູງສະຕິ ຄວາມຮັບຜິດຊອບໃນການຈັດຕັ້ງປະຕິບັດ ມາດຕະການປ້ອງກັນການຕິດ ເຊື້ອໃນສັງຄົມຢ່າງເຄັ່ງຄັດ ເປັນຕົ້ນແມ່ນ ການໃສ່ຜ້າອັດປາກ-ດັງ ໃນເວລາອອກໄປນອກບ້ານ, ລ້າງມືເລື້ອຍໆ ດ້ວຍນ້ຳສະອາດໃສ່ສະບູ, ເຈວລ້າງມື ຫລື ເຫລົ້າ 70, ຮັກສາໄລຍະຫ່າງໃນສັງຄົມຢ່າງໜ້ອຍໄລຍະ 1 ແມັດຂຶ້ນໄປ, ຖ້າບໍ່ຈຳເປັນແມ່ນຫລີກລ້ຽງ ການໄປຢູ່ໃນສະຖານທີ່ມີຄົນແອອັດ.

ທີ່ມາ: ປະເທດລາວ Pathedlao
  • ແທັກທີ່ກ່ຽວຂ້ອງ