• ສຊປລ ຝຶກອົບຮົມການຂຽນບົດກະວີ-ເລື່ອງສັ້ນ

ໂດຍ: ສີເປື້ອນມື 17 ມີນາ 2021 (13.01 ນ.) Read : 2,243

ສູນກາງຊາວໜຸ່ມປະຊາຊົນປະຕິວັດລາວ (ສຊປລ) ໄດ້ຈັດຝຶກອົບຮົມກ່ຽວກັບການຂຽນບົດກະວີ-ເລື່ອງສັ້ນ ໃນຫົວຂໍ້: “ຊາວໜຸ່ມສືບທອດ ແລະ ສົ່ງເສີມວັນນະກໍາ, ວັນນະຄະດີລາວ” ໃຫ້ພະນັກງານ-ລັດຖະກອນຂອງຕົນຂຶ້ນ ໃນລະຫວ່າງ ວັນທີ 17-19 ມີນາ 2021, ໂດຍການກ່າວເປີດພິທີຂອງ ທ່ານ ອາລຸນໄຊ ສູນນະລາດ ເລຂາຄະນະບໍລິຫານງານສູນກາງຊາວໜຸ່ມ ປະຊາຊົນປະ ຕິວັດລາວ, ເຊິ່ງບົດຮຽນທີ່ນໍາມາແລກປ່ຽນ ແລະ ສົນທະນາໃນຊຸດຝຶກອົບຮົມນີ້ ມີຄວາມຮູ້ພື້ນຖານກ່ຽວກັບການຂຽນບົດກາບກອນ-ບົດກະວີ ສະເໜີໂດຍ ພະອາຈານ ໄພວັນ ມາລາວົງ ສະມາຊິກສະ ມາຄົມນັກປະພັນ, ນັກກະວີ ລາງວັນຊີໄຣ ປີ 2019, ນັກກະວີລາງວັນ ວັນນະກໍາແມ່ນໍ້າຂອງ ປີ 2015 ແລະ ນັກກະວີລາງວັນສີນໄຊ ປີ 2017 ແລະ ບົດຮຽນກ່ຽວກັບຄວາມຮູ້ພື້ນຖານກ່ຽວກັບບົດເລື່ອງສັ້ນ ສະເໜີໂດຍ ທ່ານ ນາງ ຜິວລາວັນ ຫລວງວັນນາ.
ທ່ານ ອາລຸນໄຊ ສູນນະລາດ ໄດ້ມີຄໍາເຫັນວ່າ: ການຝຶກອົບຮົມຄັ້ງນີ້, ເປັນການບໍາລຸງສ້າງພະນັກງານສືບທອດປ່ຽນແທນໃຫ້ມີຄວາມຮູ້ ຄວາມສາມາດ ແລະ ເຂົ້າໃຈ ຕໍ່ທັດສະນະຫລັກໝັ້ນໃນການນໍາພາຂອງພັກ, ທັງເປັນການຍົກສູງນໍ້າໃຈຮັກຊາດ, ຮັກສາໄດ້ມູນເຊື້ອວັດທະນະທໍາ, ມີຄວາມສາມັກຄີໃຫ້ເປັນປຶກແຜ່ນ ເພື່ອແນໃສ່ເຮັດໃຫ້ບັນລຸການຈັດຕັ້ງປະຕິບັດ ແນວທາງການປ່ຽນແປງ ໃໝ່ຂອງພັກ ແລະ ອີກດ້ານໜຶ່ງ ເພື່ອເປັນການສ້າງບຸກຄະລາກອນໜຸ່ມ ໃຫ້ມີຄຸນນະພາບທັງດ້ານວິຊາສະເພາະ ແລະ ທິດສະດີ ວຽກງານຊາວໜຸ່ມ ເພື່ອນໍາໄປໝູນໃຊ້ເຂົ້າໃນວິຖີຊີວິດຕົວຈິງໃຫ້ເກີດດອກອອກຜົນ ເພື່ອກາຍເປັນແຂນຂວາຂອງພັກ ແລະ ເປັນກະດູກສັນຫລັງ ຂອງປະເທດຊາດຢ່າງແທ້ຈິງ.
ຂ່າວ: ສຸພາສະຫວັນ ສີຊະນະມຸງຄຸນ.
ຮູບ: ຂັນໄຊ ເຫກສົມບັດ.

ທີ່ມາ: ປະເທດລາວ Pathedlao
  • ຮູບພາບ

  • ແທັກທີ່ກ່ຽວຂ້ອງ