• ສະເຫລີມສະຫລອງວັນສະຖາປານາ ສະຖາບັນຂົງຈື້ ປະຈໍາປີ 2020

ໂດຍ: ສີເປື້ອນມື 30 ທັນວາ 2020 (13.31 ນ.) Read : 2,057

ຕອນບ່າຍວັນທີ 29 ທັນວາ 2020 ວິທະຍຸກະຈາຍສຽງແຫ່ງຊາດລາວ ຮ່ວມກັບຄູອາຈານ ວິຊາການຈີນ ໂຮງຮຽນຂົງຈື້ ວິທະຍຸກະຈາຍສຽງແຫ່ງຊາດລາວ ຈັດສະຫລອງວັນສະຖາປານາ ສະຖາບັນຂົງຈື້ ປະຈໍາປີ 2020 ເຂົ້າຮ່ວມໃນພິທີ ມີ ທ່ານ ໂພສີ ແກ້ວມະນີວົງ ຜູ້ອໍານວຍການໃຫ່ຍ ສະຖານີວິທະຍຸກະຈາຍສຽງແຫ່ງຊາດລາວ ຫລື ວສລ ພ້ອມດ້ວຍຄະນະ ແລະ ພະນັກງານ, ນັກຮຽນ ພ້ອມດ້ວຍວິຊາການຝ່າຍຈີນ.
ທ່ານ ໂພສີ ແກ້ວມະນີວົງ ຜູ້ອໍານວຍການໃຫ່ຍ ສະຖານີວິທະຍຸກະຈາຍສຽງແຫ່ງຊາດລາວ ກ່າວໃນພິທີວ່າ: ໂຮງຮຽນຂົງຈື້ ຂອງວິທະຍຸກະຈາຍສຽງແຫ່ງຊາດລາວ ສ້າງຕັ້ງຂຶ້ນໃນປີ 2015 ຍ້ອນວິທະຍຸກະຈາຍສຽງມີພາກພາສາຈີນ ຈໍາເປັນຕ້ອງມີຊ່ຽວຊານຈີນ ເພື່ອຊ່ວຍໃນການກວດແກ້ຂ່າວ, ຈຶ່ງສະເໜີໃຫ້ສະຖາບັນຂົງຈື້ຈີນ ຊ່ວຍເຫລືອ ແລະ ສ້າງສະຖາບັນຂົງຈື້ຢູ່ ວສລ ເພື່ອຊ່ວຍສອນພາສາຈີນ, ແລະໄດ້ຮັບການຊ່ວຍເຫລືອດ້ານຊ່ຽວຊານມາປະຈໍາຢູ່ ວສລ ແລະ ຈັດພິທີເປີດປ້າຍຢ່າງເປັນທາງການ ແຕ່ເດືອນມິຖຸນາ 2016, ໂດຍມີຫ້ອງຮຽນລະດັບຕົ້ນ , ລະດັບກາງ ແລະ ລະດັບແຂງ.
ທ່ານ Chen wenzheng ຫົວໜ້າສະຖາບັນຂົງຈື້ ປະຈໍາ ວສລ ກ່າວວ່າ: ກິດຈະກໍາຄັ້ງນີ້ເພື່ອເປັນການ ສະເຫລີມສະຫລອງວັນສ້າງຕັ້ງສະຖາບັນຂົງຈື້ ທີ່ສ້າງຕັ້ງຂຶ້ນແຕ່ປີ 2004, ເພື່ອສະຫນອງຄວາມຮຽກຮ້ອງຕ້ອງການພາຍຫລັງປະເທດຈີນໄດ້ເປີດປະຕູສູ່ພາຍນອກ ເພາະທົ່ວໂລກຕ້ອງການຮຽນພາສາຈີນ, ປີ2014 ສະຖາບັນຂົງຈື້ຄົບຮອບ 10 ປີ, ສະນັ້ນແຫ່ງຕ່າງໆທົ່ວໂລກໄດ້ສະເຫລີມສະຫລອງ ແລະ ຖືເປັນມື້ບຸນຂອງສະຖາບັນຂົງຈື້.
ສະເພາະການສ້າງຕັ້ງສະຖາບັນຂົງຈື້ຂອງ ວສລ ເບື້ອງຕົ້ນແມ່ນພົບຄວາມຫຍຸ້ງຍາກ ຍ້ອນງົບປະມານ, ຫ້ອງຮຽນ ແລະ ອຸປະກອນຮັບໃຊ້ບໍ່ມີ ແຕ່ພາຍຫລັງສອງຝ່າຍຮ່ວມກັນແກ້ໄຂແລ້ວ ເຮັດໃຫ້ວຽກງານດໍາເນີນໄປໄດ້ດີ. ຄືທັງສອນພາສາຈີນໃຫ້ພະນັກງານ ແລະ ລູກຫລານຂອງ ວສລ , ທັງປັບປຸງຫ້ອງຮຽນ ທັງຊ່ວຍກວດແກ້ຂ່າວພາກພາສາຈີນ ຈຶ່ງເຮັດໃຫ້ວຽກງານສໍາເລັດໄປດ້ວຍດີ.
ການສະເຫລີມສະຫລອງວັນສະຖາປານາ ສະຖາບັນຂົງຈື້ ປະຈໍາປີ 2020 ເປັນການສ້າງບັນຍາກາດ-ຮຽນຮູ້ວັດທະນະທໍາຈີນ , ເປັນການຕ້ອນຮັບປີໃໝ່ສາກົນ2021 ແລະ ປີໃໝ່ຈີນຕື່ມອີກ.

ທີ່ມາ: Lao National Radio
  • ຮູບພາບ

  • ແທັກທີ່ກ່ຽວຂ້ອງ