• ໂຄງການທາງລົດໄຟລາວ-ຈີນສໍາເລັດການວາງລາງຮອດຫຼວງພະບາງ

ໂດຍ: ສີເປື້ອນມື 29 ທັນວາ 2020 (14.45 ນ.) Read : 2,214

ວັນທີ 29 ທັນວາ 2020 ທີ່ນະຄອນຫຼວງພະບາງ, ແຂວງຫລວງພະບາງ ໄດ້ຈັດພິທີສະເຫຼີມສະຫຼອງການວາງລາງລົດໄຟ ແຕ່ນະຄອນຫຼວງວຽງຈັນ-ຫຼວງພະບາງ ໂດຍການເຂົ້າຮ່ວມຂອງທ່ານ ສຸກັນ ບຸນຍົງ ຮອງເຈົ້າແຂວງຫຼວງພະບາງ, ທ່ານ ຫຼີຈື້ກົ່ງ ກົງສຸນໃຫຍ່ຈີນປະຈຳ ນະ ຄອນຫຼວງພະບາງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ໃນໂອກາດນີ້ ທ່ານ ສຸກັນ ບຸນຍົງ ໄດ້ສະແດງຄວາມຊົມ ເຊີຍຕໍ່ພະນັກງານກໍ່ສ້າງທາງລົດໄຟທຸກຄົນທີ່ໄດ້ທຸ້ມເທກໍາລັງເຫື່ອແຮງ ແລະສາມາດຍາດໄດ້ຜົນສໍາເລັດດັ່ງກ່າວ. ເສັ້ນທາງລົດໄຟນີ້ ບໍ່ພຽງແຕ່ໄດ້ຊຸກຍູ້ການພັດທະນາເສດ ຖະກິດ-ສັງຄົມ, ສ້າງວຽກເຮັດງານທໍາໃຫ້ປະຊາຊົນເທົ່ານັ້ນ, ແຕ່ຍັງໄດ້ປະກອບສ່ວນເຂົ້າໃນການພັດທະນາຊົນນະ ບົດ ກໍ່ຄືການແກ້ໄຂຄວາມທຸກຍາກຂອງປະຊາຊົນບັນດາເຜົ່າຢູ່ແຂວງຫຼວງພະບາງນໍາອີກ ເຊິ່ງໄດ້ສະແດງບົດບາດ ແລະຄຸນຄ່າທີ່ສໍາຄັນໃນການຊ່ວຍກະຕຸກຊຸກຍູ້ເສດຖະກິດຂອງລາວ ແລະບັນດາປະເທດອ້ອມຂ້າງໃຫ້ເຕີບໃຫຍ່ຂະຫຍາຍຕົວ ພ້ອມທັງເຮັດໃຫ້ໂຄງສ້າງເສດຖະກິດເຂັ້ມ ແຂງຂຶ້ນອີກດ້ວຍ.
ທ່ານ ຫຼີຈື້ກົ່ງ ໄດ້ກ່າວວ່າ: ຄຽງຄູ່ກັບບັນດາໂຄງການຮ່ວມມືຂະໜາດໃຫຍ່ລະຫວ່າງສອງປະເທດ ເປັນຕົ້ນແມ່ນທາງລົດໄຟລາວ-ຈີນ, ທາງດ່ວນວັງວຽງ-ວຽງຈັນ, ເຂື່ອນໄຟຟ້ານໍ້າອູ ແລະອື່ນໆ ໄດ້ສ້າງສໍາເລັດເປັນກ້າວໆ, ສົ່ງຜົນເຮັດໃຫ້ການສ້າງຄູ່ຮ່ວມຊາຕາກໍາລາວ-ຈີນໄດ້ເກີດດອກອອກຜົນຢ່າງງົດງາມ, ການພັດທະນາເສດຖະກິດ-ສັງຄົມໃນເຂດພາກເໜືອຂອງລາວເວົ້າລວມ, ເວົ້າສະເພາະນະຄອນ ຫຼວງພະບາງກໍ່ຈະໄດ້ຮັບການກະຕຸກຊຸກຍູ້ ແລະພັດທະນາຢ່າງແຂງແຮງ ແລະຈະເລີນຮຸ່ງເຮືອງກວ່າເກົ່າ.
ນັບຕັ້ງແຕ່ໄດ້ເລີ່ມລົງມືວາງລາງລົດໄຟຢູ່ນະຄອນຫຼວງວຽງຈັນໃນວັນທີ 27 ມີນາ ປີ 2020 ເປັນຕົ້ນມາ, ບໍລິສັດທາງລົດໄຟລາວ-ຈີນໄດ້ຈັດຕັ້ງປະຕິບັດຂໍ້ຕົກລົງທີ່ສໍາຄັນລະຫວ່າງການນໍາສູງສຸດຂອງສອງພັກ-ລັດ ຢ່າງຕັ້ງໜ້າ ເຊິ່ງໄດ້ເລັ່ງລັດຊຸກຍູ້ການກໍ່ສ້າງໂຄງການ, ເພີ່ມທະວີການກວດກາດ້ານຄຸນນະພາບ ແລະຄວາມປອດໄພ, ນອກຈາກນີ້ ຍັງໄດ້ຜ່ານຜ່າຜົນກະທົບຈາກການລະບາດຂອງພະຍາດໂຄວິດ-19 ແລະສາມາດວາງລາງລົດໄຟຮອດຫຼວງພະບາງຢ່າງສໍາເລັດຜົນ ລວມຄວາມຍາວ 240 ກິໂລແມັດ ເຊິ່ງກວມເອົາ 57% ຂອງຄວາມຍາວທັງໝົດ. ຜົນສໍາເລັດດັ່ງກ່າວ ເປັນການສ້າງພື້ນຖານອັນໜັກແໜ້ນໃຫ້ແກ່ການວາງລາງທັງໝົດໃຫ້ສຳເລັດໃນເດືອນພຶດສະພາ ແລະໃຫ້ທັນເປີດນຳໃຊ້ຢ່າງເປັນທາງການ ໃນເດືອນທັນວາ ປີ 2021.
ໂຄງການລົດໄຟລາວ-ຈີນ ເປັນໂຄງການເຊື່ອມໂຍງຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ” ຂອງ ສປ ຈີນ, ເປັນຍຸດທະສາດ ຂອງ ສປປ ລາວ ໃນການ “ຫັນປະເທດທີ່ບໍ່ມີທາງອອກສູ່ທະເລເປັນປະເທດເຊື່ອມຈອດ”. ໂຄງການທາງລົດໄຟດັ່ງກ່າວ ມີຄວາມຍາວທັງໝົດ 422,4 ກິໂລ ແມັດ ກໍ່ສ້າງຕາມມາດຕະຖານເຕັກນິກຂອງຈີນ ດ້ວຍການອອກແບບຄວາມໄວ 160 ກິໂລແມັດຕໍ່ຊົ່ວໂມງ ທັງລົດໄຟໂດຍສານ ແລະລົດໄຟຂົນສົ່ງສິນຄ້າ, ແລ່ນດ້ວຍໄຟຟ້າ ຄາດວ່າຈະສຳເລັດການກໍ່ສ້າງ ແລະເປີດໃຫ້ບໍລິການໃນເດືອນ ທັນວາ ປີ 2021.
Cr: ທ.ຍາວ CRI-FM 93

ທີ່ມາ: Lao National Radio
  • ຮູບພາບ

  • ແທັກທີ່ກ່ຽວຂ້ອງ