• ມອບ-ຮັບໜ້າທີ ປະທານກວດກາພັກ-ລັດແຂວງຫຼວງພະບາງ

ໂດຍ: ສີເປື້ອນມື 23 ທັນວາ 2020 (15.11 ນ.) Read : 2,838

ພິທີ ມອບຮັບໜ້າທີ ຫົວໜ້າຄະ ນະກວດກາພັກ-ລັດແຂວງ ຫຼວງພະບາງ ໄດ້ຈັດຂື້ນໃນວັນທີ 21 ທັນວາ 2020 ນີ້, ຢູ່ຫ້ອງປະຊຸມຂອງຄະນະກວດກາແຂວງ, ມີ ທ່ານ ຄໍາຂັນ ຈັນທະວີສຸກ ເຈົ້າແຂວງຫຼວງພະບາງ, ພ້ອມດ້ວຍພາກສ່ວນທີ່ກ່ຽວຂ້ອງ ແລະພະນັກງານລັດຖະກອນ ພາຍໃນຄະນະກວດກາແຂວງ ເຂົ້າຮ່ວມ. ພິທີ ທ່ານ ບົວທອງ ແພງສະຫວັນ ປະທານກວດກາພັກ-ລັດແຂວງ ຜູ້ເກົ່າ ໄດ້ຂື້ນຜ່ານບົດສະຫຼຸບການຊີ້ນນໍາ-ນໍາພາວຽກງານຮອບດ້ານ ຂອງຄະນະກວດກາພັກ-ລັດແຂວງ ໃນໄລຍະ 5 ປີຜ່ານມາ ແລະທິດທາງແຜນການໃນຕໍ່ໜ້າ. ຈາກນັ້ນ, ຕາງໜ້າຄະນະຈັດຕັ້ງແຂວງ ໄດ້ຜ່ານມະຕິຕົກລົງຂອງຄະນະປະຈໍາພັກແຂວງ ວ່າດ້ວຍການຕົກລົງໃຫ້ ທ່ານ ບົວທອງ ແພງສະຫວັນ ອາດິດຮອງເລຂາພັກແຂວງ ສະໄໝທີ 7ປະທານກວດກາແຂວງ, ທ່ານ ຈັນ ວັນນະສີ ອາດິດກຳມະການພັກແຂວງ, ຮອງປະທານກວດກາແຂວງ ພັກຜ່ອນ ລໍຖ້າຮັບອຸດໜູນບຳນານ. ຜ່ານມະຕິຕົກລົງຂອງຄະນະເລຂາທິການສູນກາງພັກ ວ່າດ້ວຍການ ຮັບຮອງເອົາ ທ່ານ ຄຳຫຼ້າ ລຽນປະດິດ ເປັນປະທານກວດກາພັກ, ທ່ານ ສົມໝາຍ ສຸທິວົງ, ທ່ານ ຄຳພວງ ດວງມະນີ ແລະທ່ານ ນາງ ສົມໝາຍ ວິນາກອນ ເປັນຮອງປະທານກວດກາພັກ. ຜ່ານຂໍ້ຕກລົງຂອງທ່ານເຈົ້າແຂວງ ວ່າດ້ວຍການອານຸມັດໃຫ້ ທ່ານ ທອງຍິ່ງ ຢັ່ງເລົາເມັງ ພັກຜ່ອນຮັບອຸດໜູນບຳນານ ພາຍຫຼັງ ອາຍຸກະສຽນຮອດ ຕາມລະບຽບ ກົດໝາຍວ່າດ້ວຍພະນັກງານລັດຖະກອນ. ໂອກາດນີ້ ທ່ານເຈົ້າແຂວງຫຼວງພະບາງ ໄດ້ເນັ້ນໃຫ້ຜູ້ທີໄດ້ຮັບການແຕ່ງຕັ້ງໃໝ່ ຈົ່ງເຊີດຊູບົດບາດການນໍາພາຂອງຄະນະພັກ ແລະສືບຕໍ່ເພີ່ມທະວີຄວາມຮັບຜິດຊອບຕໍ່ໜ້າທີການເມືອງ ໃຫ້ສູງຂຶ້ນຕື່ມ, ທັງເປັນແບບຢ່າງນໍາໜ້າ ໃນການຝຶກຝົນຫຼໍ່ຫຼອມຕົນເອງ ທາງດ້ານຄຸນທາດການເມືອງ-ຄຸນສົມບັດສິນທຳປະຕິວັດ ໃຫ້ມີຄວາມໜັກແໜ້ນເຂັ້ມແຂງ, ເອົາໃຈໃສ່ປະສານສົມທົບກັບຄະນະກວດກາຜູ້ເກົ່າ ໃນການປັບປຸງແບບແຜນນຳພາ ແບບແຜນວິທີເຮັດວຽກໃຫ້ສອດຄ່ອງ ແລະແທດເໜາະກັບສະພາບຕົວຈິງ, ເພີ່ມທະວີຄວາມສາມັກຄີພາຍໃນ ພ້ອມກັນເອົາໃຈໃສ່ພັດທະນາວຽກງານໃຫ້ເຂັ້ມແຂງ ໜັກແໜ້ນຂື້ນໄປເລືອຍໆ.
ໃນພິທີຄັ້ງນີ້ ປະທານກວດກາພັກ-ລັດ ຜູ້ເກົ່າ ແລະຜູ້ໃໝ່ ໄດ້ຮ່ວມກັນລົງນາມເຊັນບົດບັນທຶກມອບຮັບໜ້າທີ່ ໂດຍຊ່ອງໜ້າຜູ້ເຂົ້າຮ່ວມເປັນສັກຂີພະຍານ ຕື່ມອີກ.

ທີ່ມາ: Lao National Radio
  • ຮູບພາບ

  • ແທັກທີ່ກ່ຽວຂ້ອງ