• ກອງປະຊຸມສຸດຍອດ CLMV ຄັ້ງທີ 10 ເນັ້ນຍົກສູງການເຊື່ອມຈອດ ເພື່ອການເຊື່ອມໂຍງພາກພື້ນ

ໂດຍ: ສີເປື້ອນມື 09 ທັນວາ 2020 (13.40 ນ.) Read : 4,385

ໃນວັນທີ 9 ທັນວາ 2020, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ເປັນປະທານກອງປະຊຸມສຸດຍອດຂອບການຮ່ວມມື ກໍາປູເຈຍ-ລາວ-ມຽນມາ-ຫວຽດນາມ(CLMV) ຄັ້ງທີ 10 ແບບທາງໄກ, ພາຍໃຕ້ຄໍາຂວັນ “ຍົກສູງປະສິດທິພາບການເຊື່ອມຈອດ ເພື່ອການເຊື່ອມໂຍງພາກພື້ນ” ໂດຍມີປະມຸກລັດ ແລະ ຫົວໜ້າລັດຖະບານ ພ້ອມດ້ວຍຄະນະຜູ້ແທນຈາກ 4 ປະເທດສະມາຊິກ ແລະ ທ່ານເລຂາ ທິການໃຫຍ່ອາຊຽນ ເຂົ້າຮ່ວມຢ່າງພ້ອມພຽງ.
ກອງປະຊຸມຄັ້ງນີ້ ໄດ້ຕີລາຄາຄືນໝາກຜົນການຈັດຕັ້ງປະຕິບັດຖະແຫລງການຮ່ວມ ຂອງກອງປະ ຊຸມສຸດຍອດ CLMV ຄັ້ງທີ 9 ແລະ ແຜນປະຕິບັດງານ CLMV(2019-2020) ໂດຍສະເພາະການ ຈັດຕັ້ງປະຕິບັດຄຳໝັ້ນສັນຍາກ່ຽວກັບການຍົກສູງວຽກງານການເຊື່ອມຈອດພາກພື້ນ, ການປັບປຸງຍົກລະດັບ ແລະ ພັດທະນາພື້ນຖານໂຄງລ່າງ ກໍຄືການພັດທະນາແລວເສດຖະກິດຕາເວັນອອກ-ຕາເວັນຕົກ, ແລວເສດຖະກິດໃຕ້ ແລະ ເສັ້ນທາງດ່ວນອາຊຽນ, ການປັບປຸງພື້ນຖານໂຄງບົນ ແລະ ການສ້າງຂີດຄວາມສາມາດຂອງບຸກຄະລາກອນ ເພື່ອເຊື່ອມໂຍງທາງດ້ານເສດຖະກິດທີ່ມີປະສິດທິພາບ ແລະ ປະສິດທິຜົນ.
ພ້ອມດຽວກັນນີ້, ກອງປະຊຸມ ໄດ້ຮັບຮອງເອົາຖະແຫລງການຮ່ວມ ຂອງກອງປະຊຸມສຸດຍອດ CLMV ຄັ້ງທີ 10 ແລະ ໂຄງການບູລິມະສິດຂອງ CLMV ເພື່ອເປັນເອກະສານພື້ນຖານໃນການກໍານົດທິດທາງການຮ່ວມມືໃນຕໍ່ໜ້າ, ພ້ອມທັງໄດ້ຮັບຮອງເອົາຂອບວຽກເພື່ອການພັດທະນາປະເທດCLMV ເພື່ອເປັນແຜນຍຸດທະສາດລວມໃນການຊຸກຍູ້ປະເທດ CLMV ໃຫ້ກາຍເປັນສູນກາງທາງດ້ານເສດຖະກິດທີ່ກ້າວໜ້າຂອງໂລກ ແລະ ສາມາດກາຍເປັນປະເທດທີ່ມີລາຍຮັບປານກາງ ສູງ ຮອດປີ 2030.
ໃນໂອກາດນີ້, ບັນດາຜູ້ນຳໄດ້ສະແດງຄວາມຊົມເຊີຍຕໍ່ຜົນສຳເລັດຢ່າງຈົບງາມໃນການປະຕິບັດໜ້າທີ່ການເປັນປະທານ CLMV ຂອງ ສປປ ລາວ (2018-2020), ຂະນະດຽວກັນ ທ່ານ ທອງລຸນ ສີສຸລິດ ກໍໄດ້ສະແດງຄວາມຂອບໃຈ ຕໍ່ການຊ່ວຍເຫລືອ, ການສະໜັບສະໜູນ ແລະ ການຮ່ວມມືທີ່ດີ ຈາກ ບັນດາປະເທດສະມາຊິກ ຕະຫລອດໄລຍະ 2 ປີ ຜ່ານມາ ແລະ ໄດ້ມອບໜ້າທີ່ການເປັນປະທານ CL MV ໃຫ້ແກ່ ມຽນມາ ເພື່ອສືບຕໍ່ປະຕິບັດໜ້າທີ່ອັນມີກຽດດັ່ງກ່າວໃນໄລຍະ 2 ປີ ຂ້າງໜ້າ.

ທີ່ມາ: ປະເທດລາວ Pathedlao
  • ຮູບພາບ

  • ແທັກທີ່ກ່ຽວຂ້ອງ