• ພັນລະຍາ ປະທານປະເທດ ມອບເຄື່ອງຊ່ວຍເຫລືອ ຜູ້ປະສົບໄພນ້ຳຖ້ວມ

ໂດຍ: ສີເປື້ອນມື 26 ພະຈິກ 2020 (16.15 ນ.) Read : 476

ໃນວັນທີ 23 ພະຈິກ 2020 ນີ້, ທ່ານ ນາງ ຄຳເມິງ ວໍລະຈິດ ພັນລະຍາ ຂອງທ່ານປະທານປະເທດ ແຫ່ງ ສປປ ລາວ ພ້ອມດ້ວຍລູກຫລານ, ຄອບຄົວ ທ່ານ ນາງ ວິລາວັນ ພົມວິຫານ ພັນລະຍາ ຂອງທ່ານເຈົ້າແຂວງສະຫວັນນະເຂດ, ຄອບຄົວທ່ານຮອງເຈົ້າແຂວງ ແລະ ສະມາຄົມນັກ ທຸລະກິດຍິງ ພາຍໃນແຂວງສະຫວັນນະເຂດ ໄດ້ນຳເອົາເຄື່ອງອຸປະໂພກ ແລະ ບໍລິໂພກ ລົງມອບໃຫ້ກັບ ປະຊາຊົນ ທີ່ໄດ້ຮັບຜົນກະທົບຈາກໄພນ້ຳຖ້ວມ, ພ້ອມທັງສົ່ງອາຍອຸ່ນຄາຍຄວາມໜາວ ໃຫ້ກັບພໍ່ແມ່ພີ່ນ້ອງບ້ານໂພນໄຮ ເມືອງເຊໂປນ ແລະ ບ້ານຕະກໍ ເມືອງນອງ.
ບ້ານໂພນໄຮ ເມືອງເຊໂປນ ມີທັງໝົດ 339 ຫລັງຄາເຮືອນ, ມີ 382 ຄອບຄົວ, ພົນລະເມືອງ 1.969 ຄົນ, ຍິງ 985 ຄົນ. ໃນນີ້ຖືກນ້ຳຖ້ວມມີ 168 ຫລັງຄາເຮືອນ, ມີ 205 ຄອບຄົວ, ພົນລະເມືອງ 984 ຄົນ, ຍິງ 496 ຄົນ. ນອກຈາກນີ້, ໃນບ້ານດັ່ງກ່າວ ຍັງມີນັກປະຕິວັດອາວຸໂສ-ບຳນານ ທີ່ໄດ້ຮ່ວມຂະບວນການປະຕິວັດໃນສະໄໝສົງຄາມ ແລະ ມີຄຸນງາມຄວາມດີຕໍ່ປະເທດຊາດນຳອີກ.
ໂອກາດນີ້, ທ່ານ ນາງ ຄຳເມິງ ວໍລະຈິດ, ທ່ານ ນາງ ວິລາວັນ ພົມວິຫານ, ຄອບຄົວທ່ານຮອງເຈົ້າແຂວງ ແລະ ສະມາຄົມນັກທຸລະກິດຍິງແຂວງ ກໍ່ໄດ້ຮ່ວມກັນມອບເຄື່ອງຊ່ວຍເຫລືອ ໃຫ້ກັບປະຊາຊົນຜູ້ທີ່ໄດ້ຮັບຜົນກະທົບຈາກໄພນ້ຳຖ້ວມ ແລະ ພະນັກງານປະຕິວັດອາວຸໂສບຳນານ ຜູ້ທີ່ມີງານໃນພາລະກິດປະຕິວັດຮັບໃຊ້ຊາດ ຈຳນວນ 7 ທ່ານນຳອີກ, ເຄື່ອງທີ່ມອບໃນຄັ້ງນີ້ປະກອບ ມີ: ຜ້າຫົ່ມຈຳນວນ 700 ຜືນ, ເຂົ້າສານໜຽວ 10 ໂຕນ, ຖົງເຄື່ອງ 500 ຊຸດ, ນ້ຳດື່ມ 350 ແພັກ, ເຂົ້າໜົມ 500 ຊຸດ, ເຂົ້າສານຖົງລະ 5 ກິໂລ ຈຳນວນ 350 ຖົງ, ລວມມູນຄ່າເປັນເງິນທັງໝົດ 251 ລ້ານກວ່າກີບ.
ໃນຕອນບ່າຍຂອງວັນດຽວກັນ, ທ່ານ ນາງ ຄຳເມິງ ວໍລະຈິດ ກໍໄດ້ນຳພາທີມງານເດີນທາງຕໍ່ ໄປມອບເຄື່ອງໃຫ້ກັບປະຊາຊົນຢູ່ບ້ານຕາກໍ ເມືອງນອງ, ເຊິ່ງບ້ານຕາກໍ ແມ່ນເປັນບ້ານທີ່ທຸກຍາກທີ່ສຸດຂອງເມືອງນອງ ແລະ ບ້ານດັ່ງກ່າວ, ກໍ່ໄດ້ຮັບຜົນກະທົບຈາກໄພນ້ຳຖ້ວມ ດ້ານເນື້ອທີ່ການຜະລິດ ເປັນ ຕົ້ນແມ່ນເນື້ອທີ່ຜະລິດເຂົ້ານາປີ, ເຂົ້າໄຮ່, ພືດສວນ, ສວນຢາງໂບງ, ເສັ້ນທາງ ແລະ ທໍ່ລະບາຍນ້ຳເສຍຫາຍຈຳນວນໜຶ່ງ. ພາຍໃນບ້ານຕາກໍ ມີທັງໝົດ 70 ຫລັງຄາເຮືອນ, ມີ 81 ຄອບຄົວ, ພົນລະເມືອງ 336 ຄົນ. ໃນນີ້, ມີຄອບຄົວທີ່ທຸກຍາກທີ່ສຸດ ຈຳນວນ 35 ຄອບຄົວ. ເຄື່ອງທີ່ຄອບຄົວການນຳ ແລະສະ ມາຄົມນັກທຸລະກິດຍິງ ນຳມາມອບໃນຄັ້ງນີ້ ປະກອບມີ: ຜ້າຫົ່ມຈຳນວນ 200 ຜືນ, ເຂົ້າສານໜຽວ 5 ໂຕນ, ໝີ່ສຳເລັດຮູບ 100 ແກັດ, ຖົງເຄື່ອງບໍລິໂພກ ແລະ ຢາປົວພະຍາດຈຳນວນ 100 ຊຸດ, ນ້ຳດື່ມ 200 ແພັກ, ເຂົ້າໜົມ ແລະ ນົມ ຈຳນວນ 200 ຊຸດ, ເຂົ້າສານຖົງລະ 5 ກິໂລຈຳນວນ 150 ຖົງ ແລະຍັງໄດ້ມອບເງິນສົດໃຫ້ຄອບຄົວລະ 500.000 ກີບ. ໃນຈຳນວນ 81 ຄອບຄົວພາຍໃນບ້ານຕາກໍຕື່ມອີກ. ລວມມູນຄ່າເປັນເງິນທັງໝົດ 85,2 ລ້ານກີບ. ລວມມູນຄ່າທັງສອງບ້ານ ມີຈຳນວນ 336 ລ້ານກີບ.
ທັງນີ້, ກໍ່ເພື່ອເປັນການແບ່ງເບົາບັນເທົາທຸກ ໃຫ້ກັບປະຊາຊົນ ຜູ້ທີ່ໄດ້ຮັບຜົນກະທົບຈາກໄພນ້ຳຖ້ວມ ແລະ ຄອບຄົວທີ່ທຸກຍາກ ພ້ອມທັງ ເປັນການສົ່ງອາຍອຸ່ນຄາຍຄວາມໜາວ ໃຫ້ແກ່ພີ່ນ້ອງປະຊາຊົນລູກຫລານ ຈົ່ງມີສຸຂະພາບທີ່ດີຕະຫລອດໄປ.

ທີ່ມາ: ປະເທດລາວ Pathedlao
  • ຮູບພາບ

  • ແທັກທີ່ກ່ຽວຂ້ອງ