• ແຕ່ງຕັ້ງ ທ່ານຄຳໄຫລ ສີປະເສີດ ຮັກສາການ ເຈົ້າແຂວງໆຫລວງນໍ້າທາ

ໂດຍ: ສີເປື້ອນມື 13 ພະຈິກ 2020 (13.53 ນ.) Read : 1,350

ໃນວັນທີ 11 ພະຈິກ 2020, ໄດ້ຈັດພິທີມອບ-ຮັບໜ້າທີ່ ລະຫວ່າງ ທ່ານ ເພັດຖາວອນ ພິລະວັນ ກຳມະການສູນກາງພັກ ອະດີດເລຂາຄະນະບໍລິຫານງານພັກແຂວງ ເຈົ້າແຂວງຫລວງນ້ຳທາ ຜູ້ເກົ່າ ໄປຮັບຫນ້າທີ່ໃຫມ່ຢູ່ຫ້ອງວ່າການສູນກາງພັກ ແລະ ແຕ່ງຕັ້ງ ທ່ານ ຄຳໄຫລ ສີປະເສີດ ເລຂາຄະນະບໍລິຫານງານພັກແຂວງ ຮັກສາການເຈົ້າແຂວງ ຫລວງນ້ຳທາ ຜູ້ໃໝ່. ໂດຍການເຂົ້າຮ່ວມຂອງທ່ານ ພົນເອກ ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກ, ລັດຖະມົນຕີ ກະຊວງປ້ອງກັນປະເທດ, ມີກໍາມະການພັກແຂວງ, ຜູ້ຕ່າງໜ້າຈາກຄະນະຈັດຕັ້ງສູນກາງພັກ ເຈົ້າເມືອງ 5 ເມືອງ, ຫົວໜ້າກອງບັນຊາການປ້ອງກັນຊາດ-ປ້ອງກັນຄວາມສະຫງົບ ຫົວໜ້າພະແນກ - ຮອງຫົວໜ້າພະແນກການອ້ອມຂ້າງແຂວງ ແລະ ອະດີດການນໍາເຂົ້າຮ່ວມ.
ໂອກາດນີ້, ທ່ານ ພົນເອກ ຈັນສະໝອນ ຈັນຍາລາດ ໄດ້ໃຫ້ກຽດ ໂອ້ລົມສະແດງຄວາມຊົມເຊີຍຕໍ່ການນໍາແຂວງທີ່ມີຜົນງານໃນໄລຍະຜ່ານມາໃນການພັດທະນາປະເທດ ຊາດ ໂດຍສະເພາະແມ່ນ ແຂວງຫລວງນໍ້າທາ ທີ່ມີໃບໜ້າໃໝ່ ໃນການສ້າງສາພັດທະນາ, ທາງດ້ານເສດຖະກິດ, ດ້ານວັດທະນາທໍາສັງຄົມ ແລະ ວຽກງານມະຫາຊົນ. ທ່ານ ພົນເອກ ຈັນສະຫມອນ ຈັນຍາລາດ ຍັງໄດ້ເນັ້ນໜັກໃຫ້ທ່ານເລຂາພັກແຂວງຮັກສາການເຈົ້າແຂວງໆຫລວງນໍ້າທາ ຜູ້ໃໝ່ ຈົ່ງເຊີດຊູສະຕິເປັນເຈົ້າ, ເຮັດວຽກເປັນໝູ່ຄະນະ, ເອົາໃຈໃສ່ຕໍ່ໜ້າທີ່ວຽກງານ ທີ່ໄດ້ຮັບການມອບໝາຍຈາກຂັ້ນເທິງ, ເຮັດໃຫ້ແຂວງຫລວງນໍ້າທາ ມີສະຖຽນລະພາບທາງດ້ານເມືອງ ເສດຖະກິດສັງຄົມໃຫ້ມີທ່າຂະຫຍາຍຕົວດີຂື້ນ, ສັງຄົມມີຄວາມສະຫງົບສຸກ, ປະຊາຊົນມີຄວາມສາມັກຄີປອງດອງຮັກແພງຊ່ວຍເຫລືອເຊິ່ງກັນ ແລະ ກັນ, ສຶບຕໍ່ເປັນເຈົ້າການໃນການປົກປັກຮັກສາ ແລະ ສ້າງສາພັດທະນາແຂວງຫລວງນໍ້າທາ ໃຫ້ມີບາດກ້າວຂະຫຍາຍຕົວຂື້ນເລື້ອຍໆ.

ທີ່ມາ: ປະເທດລາວ Pathedlao
  • ຮູບພາບ

  • ແທັກທີ່ກ່ຽວຂ້ອງ