• ສປປ ລາວ ຍັງມີຜູ້ຕິດເຊື້ອພະຍາດໂຄວິດ19 ພຽງຄົນດຽວ

ໂດຍ: ສີເປື້ອນມື 05 ພະຈິກ 2020 (17.07 ນ.) Read : 1,871

ທ່ານ ດຣ. ລັດສະໝີ ວົງຄຳຊາວ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ, ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ COVID-19 ຖະແຫລງຕໍ່ສື່ມວນຊົນ ຕອນເຊົ້າວັນທີ 4 ພະຈິກ 2020 ທີ່ກະຊວງສາທາລະນະສຸກເຖິງສະພາບການລະບາດຂອງພະຍາດ COVID-19 ຂອງບັນດາປະເທດໃກ້ຄຽງ ແລະ ໃນໂລກວ່າ: ຮອດວັນທີ 4 ພະຈິກ 2020, ທົ່ວໂລກມີການລາຍງານການລະບາດ ທັງໝົດ 216 ປະເທດ/ເຂດ; ເຊິ່ງມີຜູ້ຕິດເຊື້ອພະຍາດ COVID-19 ທັງໝົດ 47,764,267 ຄົນ; ໃນນັ້ນ ເສຍຊິວິດ 1,218,327 ຄົນ ກວມເອົາ 2.55 % ຂອງຜູ້ຕິດເຊື້ອທັງໝົດ; ປົວດີ 34,285,378 ຄົນ ; ປະເທດທີ່ມີການລາຍງານການຕິດເຊື້ອ ແລະ ເສຍຊີວິດຫຼາຍກວ່າໝູ່ ແມ່ນ ສະຫະລັດອາເມຣິກາ ເຊິ່ງມີຜູ້ຕິດເຊື້ອສະສົມ 9,644,075 ຄົນ ແລະ ເສຍຊີວິດສະສົມ 237,970 ຄົນ;
ຢູ່ຂົງເຂດອາຊີ ແມ່ນປະເທດ ອິນເດຍ ທີ່ມີທ່າອ່ຽງ ໃນການຕິດເຊື້ອ COVID-19 ເພິ່ມຂຶ້ນ, ມີຜູ້ຕິດເຊື້ອສະສົມ 8,312,947 ຄົນ ແລະ ຜູ້ຕິດເຊື້ອມື້ດຽວສູງເຖິງ 46,033 ຄົນ.
ໃນບັນດາກຸ່ມປະເທດສະມາຊິກອາຊຽນ ມາຮອດວັນທີ 04 ພະຈິກ 2020 ມີຜູ້ຕິດເຊື້ອພະຍາດ COVID-19 ທັງໝົດ 959,225 ຄົນ ແລະ ເສຍຊີວິດ 23,159 ຄົນ.
ສໍາລັບການເຝົ້າລະວັງ COVID-19 ຢູ່ ສປປ ລາວ ຮອດ ເວລາ 17 ໂມງ ວັນທີ 3 ພະຈິກ 2020 ທົ່ວປະເທດມີຜູ້ເດີນທາງເຂົ້າມາ ມີທັງໝົດ 2,205 ຄົນ: ໃນນັ້ນຈຸດຜ່ານດ່ານ ລາວ - ໄທ 1,470 ຄົນ ມີແຮງງານລາວກັບມາແຕ່ໄທ 181 ຄົນ; ຈຸດຜ່ານດ່ານ ລາວ - ຈີນ 172 ຄົນ, ໃນນີ້ ແຮງງານຈີນ 147 ຄົນ, ແຮງງານລາວ 1 ຄົນ, ຈຸດຜ່ານດ່ານ ລາວ - ຫວຽດນາມ 563 ຄົນ, ໃນນັ້ນ ມີນັກສຶກສາ 6 ຄົນ, ແຮງງານຫວຽດນາມ 34 ຄົນ, ເຫຼືອນັ້ນ ແມ່ນຄົນຂັບລົດສົ່ງສິນຄ້າ. ທຸກຄົນແມ່ນໄດ້ແທກອຸນຫະພູມຮ່າງກາຍ, ແລະໄດ້ເກັບຕົວຢ່າງມາກວດ ແລ້ວນຳສົ່ງໄປຫາສະຖານ
ທີ່ ຈຳກັດບໍລິເວນທີ່ກຳນົດໄວ້ຈົນກວ່າຈະຄົບກຳນົດ 14 ວັນ.
ປະຈຸບັນ ທົ່ວປະເທດສູນຈໍາກັດບໍລິເວນທີ່ຍັງເປີດຢູ່ ມີທັງໝົດ 33 ສູນ, ມີຜູ້ຖືກຈຳກັດບໍລິເວນຢູ່ສູນ 3,021 ຄົນ.
ທ່ານ ດຣ. ລັດສະໝີ ວົງຄຳຊາວ ໃຫ້ຮູ້ເຖິງວຽກງານການເກັບຕົວຢ່າງມາກວດວິເຄາະ ແລະ ຄົ້ນຫາຜູ້ຕິດເຊື້ອພະຍາດວ່າ: ວັນທີ 3 ພະຈິກ 2020, ໄດ້ເກັບຕົວຢ່າງມາກວດວິເຄາະທັງໝົດ 326 ຄົນ, ໃນນັ້ນ ມີ ແຮງງານລາວມາແຕ່ໄທ 232 ຕົວຢ່າງ, ແຮງງານໄທ 31 ຕົວຢ່າງ, ແຮງງານຈີນ 3 ຕົວຢ່າງ, ແຮງງານຫວຽດນາມ 5 ຕົວຢ່າງ, ບຸກຄົນທົ່ວໄປທີ່ບໍ່ມີອາການ 44 ຕົວຢ່າງ ແລະ ບຸກຄົນທົ່ວໄປທີ່ມີອາການ 11 ຕົວຢ່າງ; ຜົນກວດວິເຄາະທັງໝົດແມ່ນ ບໍ່ພົບເຊື້ອD.
ສັງລວມການກວດວິເຄາະ ແຕ່ເດືອນມັງກອນ ຮອດ ວັນທີ 3 ພະຈິກ 2020 ໄດ້ເກັບຕົວຢ່າງມາກວດທັງໝົດ 67,270 ຕົວຢ່າງ, ກວດພົບເຊື້ອສະສົມ 24 ຄົນ ປົວດີແລ້ວ 23 ຄົນ, ຍັງເຫລືອ 1 ຄົນ ຍັງສືບຕໍ່ປີ່ນປົວຢູ່ໂຮງໝໍມິດຕະພາບ.

ທີ່ມາ: ເສດຖະກິດ-ສັງຄົມ
  • ຮູບພາບ

  • ແທັກທີ່ກ່ຽວຂ້ອງ