• ສປ ຈີນ ຈະສາມາດບັນລຸເປົ້າໝາຍການພັດທະນາປະເທດຕົນ

ໂດຍ: ສີເປື້ອນມື 05 ພະຈິກ 2020 (14.11 ນ.) Read : 1,838

ທ່ານ ສີ ຈິນຜິງ, ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຈີນ ກ່າວວ່າ: ສປ ຈີນ ຈະສາມາດບັນລຸເປົ້າໝາຍກໍ່ຄືການສ້າງສາພັດທະນາປະເທດຕົນໃຫ້ກາຍເປັນສັງຄົມທີ່ມີລາຍຮັບປານກາງໃນທຸກດ້ານຕາມແຜນການທີ່ວາງໄວ້.
ທ່ານ ໄດ້ກ່າວຄຳປາໄສທີ່ໄດ້ອະທິບາຍກ່ຽວກັບຂໍ້ສະເໜີ, ຈຸດປະສົງ ແລະ ເປົ້າໝາຍຂອງຄະນະກຳມະການສູນກາງພັກ ໃນແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ 14 ແລະ ເປົ້າໝາຍໄລຍະຍາວຮອດປີ 2035. ການສ້າງສາພັດທະນາປະເທດໃຫ້ກາຍເປັນສັງຄົມທີ່ມີລາຍຮັບປານກາງເພື່ອຜົນປະໂຫຍດລວມຂອງປະຊາຊົນຫລາຍກວ່າໜຶ່ງພັນລ້ານຄົນ ຍັງແມ່ນເປົ້າໝາຍຫລັກ ແລະ ຄວາມມຸ້ງໝັ້ນຂອງຄະນະບໍລິຫານງານສູນກາງພັກ.
ໃນປີ 2020, ລວມຍອດຜະລິດຕະພັນພາຍໃນຂອງ ສປ ຈີນ ຄາດວ່າຈະບັນລຸຫລາຍກວ່າ 100.000 ຕື້ຢວນ. ເງື່ອນໄຂຊີວິດການເປັນຢູ່ຂອງປະຊາຊົນຈະໄດ້ຮັບການປັບປຸງດີຂື້ນ, ປະຊາຊົນທຸກຍາກໃນເຂດຊົນນະບົດຈະຫລຸດພົ້ນຈາກຄວາມທຸກຍາກ ຕາມຂໍ້ກໍານົດ ເປົ້າໝາຍ ແລະ ມາດຕະຖານປັດຈຸບັນ, ທີ່ໄດ້ກໍານົດໄວ້ໃນແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 13 ເພື່ອບັນລຸຕາມແຜນ ແລະ ເປົ້າໝາຍໃນການກໍ່ສ້າງສັງຄົມທີ່ມີລາຍຮັບປານກາງໃນທຸກໆດ້ານຈະບັນລຸຕາມແຜນການທີ່ວາງໄວ້.
ທ່ານ ຍັງກ່າວຕື່ມວ່າ: ຄະນະກຳມະການສູນກາງພັກ ຈະດໍາເນີນການປະເມີນຜົນຢ່າງເປັນລະບົບ ແລະ ກວດກາການກໍ່ສ້າງສັງຄົມທີ່ມີລາຍຮັບປານກາງໃນທຸກໆດ້ານໃນໄລຍະທຳອິດ ຂອງປີ 2021 ກ່ອນການປະກາດຜົນສຳເລັດການຈັດຕັ້ງປະຕິບັດ ເຮັດໃຫ້ສັງຄົມມີຄວາມຈະເລີນຮຸ່ງເຮືອງ ແລະ ມີລາຍຮັບປານກາງໃຫ້ປະຊາຊົນຮັບຮູ້.

ທີ່ມາ: ປະເທດລາວ Pathedlao
  • ຮູບພາບ

  • ແທັກທີ່ກ່ຽວຂ້ອງ