• ສຳເລັດພາລະກິດ ຊ່ວຍເຫລືອປະຊາຊົນຜູ້ປະສົບໄພນໍ້າຖ້ວມ ຢູ່ເມືອງຈຳພອນ

ໂດຍ: ສີເປື້ອນມື 05 ພະຈິກ 2020 (13.46 ນ.) Read : 1,928

ນາຍ ແລະ ພົນທະຫານ ກອງບັນຊາການທະຫານ ແຂວງສະຫວັນນະເຂດ ໄດ້ຖອນກໍາລັງຂອງຕົນກັບຄືນກົມກອງເປັນທີ່ຮຽບຮ້ອຍແລ້ວ ພາຍຫລັງທີ່ໄດ້ລົງເຄື່ອນໄຫວເຮັດໜ້າທີ່ຊ່ວຍເຫລືອປະຊາຊົນ ເມືອງຈໍາພອນ ແຂວງສະຫວັນນະເຂດ ທີ່ປະສົບກັບໄພນໍ້າຖ້ວມ ໄລຍະກາງເດືອນຕຸລາ ທີ່ຜ່ານມາ; ໃນນັ້ນ, ໄດ້ລົງເກັບກູ້ເຂົ້ານາປີທີ່ຖືກຖ້ວມ ຊ່ວຍປະຊາຊົນໃນເຂດບ້ານໜອງອີງ, ສະຄຶນ, ຕະແຫລວ ແລະ ເຂດບ້ານທວດ ໃນຈໍານວນ 20 ກວ່າບ້ານ ມີ 130 ກວ່າຄອບຄົວ ຊຶ່ງສາມາດຊ່ວຍເກັບກູ້ເຂົ້ານາປີທີ່ຖືກຖ້ວມ ພ້ອມຂົນຂຶ້ນໄວ້ທີ່ສູງປອດໄພ ໄດ້ເກືອບ 200 ເຮັກຕາ ແລະ ໄດ້ເກັບມ້ຽນອຸປະກອນເປັນເຮືອຈັກ ແລະ ເຄື່ອງໃຊ້ສອຍທີ່ຈໍາເປັນ ລວມທັງສັດລຽ້ງ ຂຶ້ນໄວ້ໃນບ່ອນທີ່ປອດໄພ.
ທ່ານ ພັນໂທ ສົມພອນ ຫົວໜ້າພະແນກສູ້ຮົບ ກອງບັນຊາການທະຫານແຂວງ ເປີດເຜີຍວ່າ: ພາຍຫລັງທີ່ເກີດມີສະພາບນ້ຳຖ້ວມ ໄດ້ເອົາກໍາລັງນາຍ ແລະ ພົນທະຫານ ຈາກກອງພັນທະຫານ 207, 208 ແລະ ກອງພັນຫະຫານຮາບທີ 3 ຈໍານວນ 100 ກວ່າຄົນ ລົງຕະລຸມບອນຊ່ວຍປະຊາຊົນ ທີ່ໄດ້ຮັບຜົນກະທົບທັນທີ ແລະ ບໍ່ຫວັງຜົນໃດໆ ພ້ອມທັງກະຕຸ້ນຈິດໃຈກໍາລັງອ້າຍນ້ອງທະຫານທຸກຄົນສະເໝີວ່າ ຍາມເມື່ອປະຊາຊົນໄດ້ຮັບຜົນກະທົບຈາກໄພທຳມະຊາດ ນໍ້າໃຈຂອງທະຫານກໍຕ້ອງໄດ້ຊ່ວຍຢ່າງຈິງຈັງ ຊຶ່ງບັນດານາຍ ແລະ ພົນທະຫານເຫລົ່ານີ້ ໄດ້ລົງຊ່ວຍເກັບກ່ຽວ ແລະ ຂົນເຂົ້ານາທີ່ຖືກນໍ້າຖ້ວມຊ່ວຍ ປະຊາຊົນໃນທັງເວັນ ແລະ ຄືນ ຂະນະທີ່ເຂົ້ານາຂອງປະຊາຊົນພວມສຸກເຫລືອງພ້ອມທີ່ຈະເກັບກ່ຽວ ແຕ່ກໍມາຖືກນໍ້າຖ້ວມ.
ໃນໂອກາດທີ່ນາຍ ແລະ ພົນທະຫານກຽມກັບຄືນກົມກອງ ທາງການນໍາຂອງ ເມືອງຈໍາພອນ ໂດຍແມ່ນທ່ານ ຄໍາລຸຍ ຍາດຕິວົງ ເຈົ້າເມືອງ ຈຳພອນ ພ້ອມຄະນະນໍາຂອງ ເມືອງ ກໍໄດ້ຈັດພິທີສົ່ງນາຍ ແລະ ພົນທະຫານກັບຄຶຶນກົມກອງ, ພ້ອມໃຫ້ການຍ້ອງຍໍຜົນງານເຮັດສໍາເລັດ ພາລະກິດຕາມການຮ້ອງຂໍ ຈາກກໍາລັງກອງທັບລົງໃຫ້ການຊ່ວຍເຫລືອປະຊາຊົນຢ່າງທັນກັບສະພາບ.

ທີ່ມາ: ປະເທດລາວ Pathedlao
  • ຮູບພາບ

  • ແທັກທີ່ກ່ຽວຂ້ອງ