• ສະຖານທູດຈີນ ປະຈໍາລາວ ຊ່ວຍເຫລືອ ຜູ້ປະສົບໄພນ້ຳຖ້ວມ

ໂດຍ: ສີເປື້ອນມື 04 ພະຈິກ 2020 (14.29 ນ.) Read : 1,965

  ໃນຕອນເຊົ້າ ຂອງວັນທີ 4 ພະຈິກ 2020 ຢູ່ອົງການກາແດງລາວ ນະຄອນຫລວງວຽງຈັນ, ທ່ານ ຈ່ຽງ ຈ້າຍຕົ່ງ ເອກອັກຄະລັດຖະທູດ ສປ ຈີນ ປະຈໍາ ສປປ ລາວ ພ້ອມດ້ວຍຄະນະ ໄດ້ນຳເອົາປັດໄຈ ມູນຄ່າ 5 ພັນໂດລາສະຫະລັດ (ປະມານ 46 ກວ່າລ້ານກີບ) ມອບໃຫ້ອົງການກາ ແດງລາວ ເພື່ອປະກອບສ່ວນຊ່ວຍເຫລືອຜູ້ປະສົບໄພນ້ຳຖ້ວມ ຢູ່ບັນດາແຂວງພາກໃຕ້ຂອງລາວ, ເຊິ່ງເຮັດໃຫ້ເນື້ອທີ່ການຜະລິດ, ເຮືອນຊານບ້ານຊ່ອງ, ສັດລ້ຽງ ແລະ ໄຮ່ນາ, ຮົ້ວສວນຂອງປະຊາຊົນ ໄດ້ຮັບຄວາມເສຍຫາຍຢ່າງໜັກໜ່ວງ, ຕາງໜ້າຮັບໂດຍ ທ່ານ ຄໍາຮຸ່ງ ເຮືອງວົງສີ ປະທານອົງການກາແດງລາວ.
ໃນໂອກາດດຽວກັນນີ້, ທ່ານ ຄໍາຮຸ່ງ ເຮືອງວົງສີ ໄດ້ສະແດງຄວາມຂອບໃຈ ມາຍັງສະຖານເອກອັກຄະລັດຖະທູດຈີນ ປະຈໍາ ສປປ ລາວ ທີ່ໄດ້ນໍາເງິນມາຊ່ວຍແບ່ງເບົາຄວາມສູນເສຍຂອງປະ ຊາຊົນ ຜູ້ທີ່ໄດ້ຮັບຜົນກະທົບຈາກໄພນໍ້າຖ້ວມຄັ້ງນີ້, ຊຶ່ງໄລຍະຜ່ານມາລັດຖະບານຈີນ ກໍຄື ປະຊາຊົນຈີນ ກໍ່ໄດ້ໃຫ້ການຊ່ວຍເຫລືອເປັນຈໍານວນຫລວງຫລາຍ ແລະ ເງິນຊ່ວຍເຫລືອຄັ້ງນີ້, ແມ່ນຈະນໍາໄປຊື້ເຄື່ອງໃຊ້ທີ່ຈໍາເປັນ ເພື່ອນໍາແຈກຢາຍໃຫ້ຜູ້ປະສົບໄພນ້ຳຖ້ວມໃນໄວໆ ໂດຍຈະມີການສົບທົບກັບອໍານາດການປົກຄອງທ້ອງຖິ່ນເຂດພື້ນທີ່ ທີ່ໄດ້ຮັບຜົນກະທົບດັ່ງກ່າວ, ເພື່ອຈະໄດ້ແຈກຢາຍເຖິງກຸ່ມເປົ້າ ໝາຍ ແລະ ທົ່ວເຖິງ.

ທີ່ມາ: ປະເທດລາວ Pathedlao
  • ຮູບພາບ

  • ແທັກທີ່ກ່ຽວຂ້ອງ