• ເມືອງໂຂງ ຈະປະກາດ ຢຸດຕິການຖ່າຍແບບຊະຊາຍ ໃນທ້າຍປີນີ້

ໂດຍ: ສີເປື້ອນມື 04 ພະຈິກ 2020 (14.24 ນ.) Read : 1,862

ແຫລ່ງຂ່າວຈາກເມືອງໂຂງ ແຂວງຈຳປາສັກ ໃຫ້ຮູ້ວ່າ: ວັນທີ 4 ພະຈິກ ນີ້ຫ້ອງການສາທາລະນະສຸກເມືອງໂຂງ ແຂວງຈຳປາສັກ ໄດ້ເປີດກອງປະຊຸມເພື່ອວາງແຜນໃນການສູ້ຊົນລົບລ້າງການຖ່າຍແບບຊະຊາຍຂອງປະຊາຊົນ ໂດຍຈະປະກາດ 31 ບ້ານ ແລະ 1 ກຸ່ມບ້ານເປັນບ້ານຢຸດຕິການຖ່າຍຊະຊາຍໃນທ້າຍປີ 2020 ແລະ ຈະສ້າງບ້ານທີ່ມີວິດຖ່າຍ 80% ຂຶ້ນໄປໃຫ້ໄດ້ 100% ໃນປີ 2021, ສຸ່ມໃສ່ສ້າງບ້ານທີ່ມີວິດຖ່າຍນ້ອຍກວ່າ 80% ລົງມາໃຫ້ມີວິດຖ່າຍ 100% ໃນປີ 2022 ແລະ ຈະປະກາດເມືອງຢຸດຕິການຖ່າຍຊະຊາຍ (ODF) ໃນປີ 2023.
ທ່ານ ດຣ ພົງສະຫວັດ ສີພົງສັກ ຮອງຫົວໜ້າຫ້ອງການສາທາລະນະສຸກເມືອງໂຂງ ໃຫ້ຮູ້ວ່າ: ເມືອງໂຂງປະກອບມີ 114 ບ້ານ, ມີ 16.745 ຫລັງຄາເຮືອນ, ມີ 17.104 ຄອບຄົວ, ມີປະຊາກອນທັງໝົດ 99.424 ຄົນ, ຍິງ 49.969 ຄົນ, ຜ່ານມາບັນດາຄູ່ຮ່ວມງານຢູ່ເມືອງ ໄດ້ເຮັດວຽກຢ່າງໜັກໜ່ວງເພື່ອເອົາຊະນະບັນດາອຸປະສັກ ແລະ ສິ່ງທ້າທາຍຢ່າງຫລວງຫລາຍ ເພື່ອບັນລຸເປົ້າໝາຍຢຸດຕິການຖ່າຍຊະຊາຍ ໂດຍໄດ້ປະຕິບັດໜ້າທີ່ຢ່າງຫ້າວຫັນ ໃນການເຮັດວຽກຮ່ວມກັບນາຍບ້ານ, ຜູ້ນຳຊຸມຊົນ, ຊາວໜຸ່ມ, ເດັກນ້ອຍ, ປະຊາຊົນ ໃນການຢຸດຢັ້ງການຖ່າຍຊະຊາຍ ແລະ ປັບປຸງສະພາບແວດລ້ອມອ້ອມຂ້າງ ເພື່ອກ້າວໄປສູ່ການບັນລຸເປົ້າໝາຍດັ່ງກ່າວ.
ການສິ້ນສຸດການຖ່າຍຊະຊາຍ ແມ່ນບາດກ້າວທຳອິດຂອງການກ້າວໄປສູ່ການມີສຸຂະອະນາໄມທີ່ດີຢ່າງຮອບດ້ານ.

ທີ່ມາ: ປະເທດລາວ Pathedlao
  • ຮູບພາບ

  • ແທັກທີ່ກ່ຽວຂ້ອງ