• ສວນອາຫານແມ່ຄົວຕຸກກີ້ ຕອບໂຈດໄດ້ທຸກບັນຍາກາດ

ໂດຍ: ສີເປື້ອນມື 04 ພະຈິກ 2020 (11.39 ນ.) Read : 1,885

ປັດຈຸບັນມີຈໍານວນຮ້ານອາຫານ ແລະສວນອາຫານເພີ່ມຂຶ້ນເປັນຈໍານວນຫຼວງຫຼາຍ. ໃນສະບັບນີ້ ຜູ້ຂຽນຈະພາໄປຮູ້ຈັກສະຖານທີ່ໜຶ່ງ ທີ່ຂໍບອກໄວ້ເລີຍວ່າ ທ່ານຈະຕ້ອງຮູ້ສຶກປະທັບໃຈໃນບັນຍາກາດຢ່າງແນ່ນອນ ເພາະຕອບໂຈດທຸກຄວາມຕ້ອງການ ບໍ່ວ່າຈະເປັນບັນຍາກາດແບບຄາເຟ່ ໃນຫ້ອງແອເຢັນໆ ແລະບັນຍາກາດແບບທໍາມະຊາດຕິດກັບທົ່ງນາ. ສະຖານທີ່ ພວກເຮົາກໍາລັງຈະເວົ້າເຖິງກໍແມ່ນຮ້ານຄາເຟ່ ແລະສວນອາຫານແມ່ຄົວຕຸກກີ້.

ທ່ານ ນາງ ສຸພາວະດີ ສຸວັນນະເມທີ (ຕິ່ງ) ຜູ້ຈັດການຮ້ານຄາເຟ່ ແລະສວນອາຫານ ແມ່ຄົວຕຸກກີ້ ໄດ້ໃຫ້ສໍາພາດວ່າ:  ພວກເຮົາມີແນວຄວາມຄິດລິເລີ່ມມາຈາກການເຮັດອາຫານຢູ່ເຮືອນ ແລະກໍໄດ້ເປີດຂາຍຜ່ານທາງອອນລາຍ ເຊິ່ງກໍໄດ້ຮັບກະແສຕອບຮັບຈາກລູກຄ້າເປັນຢ່າງດີ ພ້ອມທັງມີການຮຽກຮ້ອງໃຫ້ພວກເຮົາມີໜ້າຮ້ານ ເພື່ອທີ່ຈະໄດ້ມາສໍາຜັດກັບບັນຍາກາດ ແລະຮັບປະທານອາຫານຢູ່ຮ້ານຕົວຈິງ.

      ດັ່ງນັ້ນ, ເພື່ອເປັນການຕອບສະໜອງຕາມຄວາມຮຽກຮ້ອງຕ້ອງການຂອງລູກຄ້າ ທາງພວກເຮົາຈຶ່ງໄດ້ເປີດຮ້ານຂຶ້ນຢ່າງເປັນທາງການ ໃນເມື່ອ 5 ປີກ່ອນ ແລະຮ້ານດັ່ງກ່າວນັ້ນ ໄດ້ເປີດຢູ່ໃຈກາງເມືອງ ເຊິ່ງມີຂະໜາດນ້ອຍ ແຕ່ເນື່ອງຈາກຖານລູກຄ້າຂອງພວກເຮົາໄດ້ມີຈໍານວນເພີ່ມຂຶ້ນເລື້ອຍໆ ເຮັດໃຫ້ພວກເຮົາຕ້ອງໄດ້ຊອກຫາສະຖານທີ່ ທີ່ສາມາດຮອງຮັບຈໍານວນລູກຄ້າໄດ້ເພີ່ມຕື່ມ, ໃຫ້ມີມູມຖ່່າຍຮູບງາມໆ ແລະສະຖານທີ່ຈອດລົດກວ້າງຂວາງ ຈຶ່ງໄດ້ຕັດສິນໃຈມາເປີດຢູ່ແຫ່ງນີ້. ເຫດຜົນທີ່ເລືອກສະຖານທີ່ແຫ່ງນີ້ ກໍຍ້ອນວ່າມັນມີຄວາມໃກ້ຊິດຕິດແທດກັບທໍາມະຊາດຢ່າງແທ້ຈິງ ໂດຍສະເພາະແມ່ນຕິດກັບທົ່ງນາທີ່ກວ້າງໃຫຍ່ ແລະມີທໍາມະຊາດທີ່ຂຽວສົດງົດງາມ.

ໃນເບື້ອງຕົ້ນພວກເຮົາໄດ້ສ້າງຮ້ານອາຫານຮູບແບບຄາເຟ່ ທີ່ໃຫ້ບໍລິການແບບອາຫານຈານດ່ຽວ ບໍ່ວ່າຈະເປັນອາຫານຕ່າງປະເທດ, ອາຫານລາວ, ອາຫານຫວານ ແລະເຄື່ອງດື່ມ ແລະຫຼັງຈາກນັ້ນ, ຈຶ່ງໄດ້ມີການສືບຕໍ່ຂະຫຍາຍສ້າງຕູບ ເພື່ອເຮັດສວນອາຫານຂຶ້ນ ແລະເພື່ອເປັນອີກທາງເລືອກໜຶ່ງໃຫ້ກັບລູກຄ້າ.

ສໍາລັບໃຜທີ່ຢາກສໍາຜັດກັບບັນຍາກາດແບບຄາເຟ່ ຫຼືແບບບັນຍາກາດໃນຫ້ອງແອເຢັນໆ, ຮັບປະທານຂອງຫວານ, ເຄື່ອງດື່ມປະເພດຕ່າງໆ ແລະມີມູມຖ່າຍຮູບງາມໆຫຼາຍຈຸດ ກໍສາມາດນັ່ງຫຼິ້ນຟັງເພງແບບເບົາໆຢູ່ທີ່ຮ້ານຄາເຟ່ທາງເທິງໄດ້ ແລະສໍາລັບໃຜທີ່ຢາກໄດ້ບັນຍາກາດແບບຄອບຄົວ ຫຼືແບບເປັນກຸ່ມກັບໝູ່ເພື່ອນ ທີ່ມັກຮັກໃນທໍາມະຊາດແບບບ້ານນາ ກໍສາມາດທີ່ຈະລົງໄປສໍາຜັດກັບບັນຍາກາດແບບຢູ່ໄຮ່ຢູ່ນາທີ່ສວນອາຫານໄດ້ເຊັ່ນກັນ.

ເມນູອາຫານແນະນໍາຢູ່ທີ່ສວນອາຫານ ແມ່ຄົວຕຸກກີ້ ແມ່ນປະເພດ ຍໍ່ກຸ້ງຊໍາເມີໂຣ ເປັນເມນູທີ່ໄດ້ຮັບຄວາມນິຍົມຫຼາຍທີ່ສຸດ,​ ຜັດໄທທະເລ, ແໜມປາກອບ ພ້ອມດ້ວຍຜັກພັນ, ຕໍາປູມ້າ, ຕໍາທະເລລວມ... ນອກນັ້ນ, ຍັງມີອາຫານແບບລາວໆ ເຊັ່ນ: ພັນປາ, ແກງໜໍ່ໄມ້, ຕໍາໝາກຫຸ່ງ. ພິເສດສໍາລັບວັນເສົາ-ອາທິດ ຈະມີເມນູພິເສດນັ້ນກໍຄື ຈີ່ໜັງແຈ່ວປາແດກ, ປີ້ງໄກ່ທາປາແດກ, ປີ້ງໃສ້... 

ນອກຈາກອາຫານແລ້ວ ຍັງມີຈໍາພວກເຄື່ອງດື່ມທີ່ຢາກໃຫ້ທົດລອງ ໂດຍສະເພາະກໍແມ່ນເຄື່ອງດື່ມຈາກຮ້ານ Dark twenty one café ທີ່ມີຫຼາກຫຼາຍສາຂາ ແລະແຕ່ສໍາລັບສາຂານີ້ ເປັນສາຂາທີ່ເປີດໃໝ່. ສ່ວນເມນູເຄື່ອງດື່ມທີ່ພວກເຮົາຢາກແນະນໍາ ມີ: ນໍ້າຊາຂຽວປັ່ນ,​ ນໍ້າໂກໂກ້ປັ່ນ, ຊານົມເຢັນ ແລະນໍ້າບູເບີລີ່ປັ່ນ. ນອກຈາກນີ້, ຍັງມີເຄື່ອງດື່ມປະເພດໂຊດາ ແລະກາເຟ. ນອກຈາກໃຫ້ບໍລິການຢູ່ພາຍໃນຮ້ານຄາເຟ່ ແລະສວນອາຫານແລ້ວ ພວກເຮົາຍັງຮັບຈັດງານນອກສະຖານທີ່ ບໍ່ວ່າຈະເປັນງານວັນເກີດ, ງານລ້ຽງ, ງານສັງສັນຕ່າງໆ ແລະຍັງມີບໍລິການສົ່ງອາຫານເຖິງເຮືອນ. 

ສວນອາຫານ ແມ່ຄົວຕຸກກີ້ ເປີດທຸກໆ ວັນຕັ້ງແຕ່ເວລາ 09 ໂມງເຊົ້າ ຫາ 09 ໂມງແລງ.​ ສະຖານທີ່ຕັ້ງຢູ່ ຮ່ອມ 22 ບ້ານ ຫ້ວຍຫົງ ເມືອງ ຈັນທະບູລີ ນະຄອນຫຼວງວຽງຈັນ (ທາງຕັດໃໝ່ໄປໂຮງໝໍ ແມ່ ແລະເດັກ). ເບີໂທລະສັບ 020 5839 1982 ແລະສາມາດຕິດຕາມການເຄື່ອນໄຫວ ພ້ອມທັງອັບເດດເມນູອາຫານ ແລະໂປຼໂມຊັ່ນພິເສດຈາກທາງສວນອາຫານ ແມ່ຄົວຕຸກກີ້ ໄດ້ທີ່ແຟນເພຈເຟດບຸກ: ຮ້ານອາຫານແມ່ຄົວຕຸກກີ້.  


ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ