• ສໍາຜັດວິຖີວີວິດແບບບ້ານນາ ທີ່ຟາມນາເຂົ້າຫອມ ນະຄອນຫຼວງພະບາງ

ໂດຍ: ສີເປື້ອນມື 30 ຕຸລາ 2020 (16.23 ນ.) Read : 1,865

ຟາມນາເຂົ້າຫອມ ເປັນສະຖານທີ່ທ່ອງທ່ຽວແຫ່ງໜຶ່ງທີ່ເປັນບ່ອນໃຫ້ທຸກຄົນສາມາດໄປພັກຜ່ອນຢ່ອນໃຈ, ໄປໃຊ້ຊີວິດໃນແບບບ້ານນາ ແລະຍັງເປັນອີກບ່ອນໜຶ່ງທີ່ໃຫ້ເຮົາໄດ້ມີໂອກາດໄດ້ສຶກສາເລື່ອງຂອງການເຮັດນາໃນແບບພື້ນບ້ານ ໃນສະໄໝກ່ອນທີ່ປູ່ຍ່າຕາຍາຍເຄີຍປະຕິບັດກັນມາ. ທຸກຄົນຈະໄດ້ມີໂອກາດລົງປະຕິບັດຕົວຈິງ ໃນທຸກໆຂັ້ນຕອນໂດຍມີຊາວບ້ານຜູ້ທີມີປະສົບການເປັນຜູ້ນໍາພາ ແລະຈະມ່ວນ ຫຼືປະທັບໃຈແນວໃດນັ້ນພວກເຮົາຕ້ອງໄດ້ໄປພິສູດດ້ວຍຕົວເອງ ໂດຍສະເພາະໄວໜຸ່ມຍຸກໃໝ່ ຢາກໃຫ້ລອງໃຊ້ເວລາວ່າງຈາກວຽກງານທີ່ມັນກົດດັນ ແລະຫຼຸດຜ່ອນຈາກການໃຊ້ເວລາກັບສິ່ງທີ່ບໍ່ມີປະໂຫຍດແລ້ວຫັນໄປເຮັດກິດຈະກໍາຢູ່ສະຖານທີ່ແຫ່ງນີ້ແທນ.

ຟາມນາເຂົ້າຫອມ ຕັ້ງຢູ່ບ້ານ ປາກຊີ ທາງໄປຕາດກວາງຊີ ທ່ານສາມາດຂີ່ລົດຈັກ ຫຼືລົດໃຫຍ່ສ່ວນຕົວໄປເອງໄດ້ ເຊິ່ງຈະໃຊ້ເວລາໃນການເດີນທາງພຽງ 30 ນາທີເທົ່ານັ້ນ. ນອກນັ້ນ, ທ່ານຍັງສາມາດກຽມອາຫານໄປແຕ່ບ້ານໄດ້, ທ່ານສາມາດເລືອກທີ່ພັກຕາມໃຈ ບໍ່ວ່າຈະເປັນການນອນໃນເຕັ້ນ ຫລືນອນໃນຫ້ອງ ເຊິ່ງລາຄາກໍຈະມີຄວາມແຕກຕ່າງກັນໄປ. ສໍາລັບລາຄາ ນອນເຕັ້ນ ຄືນລະ 100,000 ກີບ ແລະສ່ວນລາຄານອນເຮືອນຕົ້ນໄມ້ ຄືນລະ 200,000 ກີບ ຫາ 250,000 ກີບ ເທົ່ານັ້ນ.

ການເດີນທາງໄປສະຖານທີ່ແຫ່ງນີ້ ຫົນທາງມີຄວາມສະດວກສະບາຍ ແລະຍັງໄດ້ດື່ມດຳກັບບັນຍາກາດແບບບ້ານນາ ທີ່ຫາສໍາຜັດໄດ້ຍາກໂດຍສະເພາະໃນເຂດຕົວເມືອງ. ຖືວ່າເປັນອີກແຫ່ງໜຶ່ງທີ່ເໝາະສໍາລັບຜູ້ທີ່ຢາກເດີນທາງໄປພັກຜ່ອນຢ່ອນໃຈ ຜ່ອນຄາຍຄວາມຕຶງຕຽດຈາກວຽກງານ ແລະຍັງເປັນສະຖານທີ່ຮັນນີມູນໄດ້ແບບສຸດໂລແມນຕິກ ເໝາະກັບຄູ່ບ່າວສາວທີ່ຢາກປ່ຽນບັນຍາກາດໃນການໃຊ້ຊີວິດແບບບ້ານນາ ໃນຊ່ວງທີ່ແຕ່ງດອງກັນໃໝ່ໆ.

ປີນີ້ກໍຖືວ່າປະເທດລາວເຮົາປະເຊີນໜ້າກັບພະຍາດໂຄວິດ-19 ເຮັດໃຫ້ບໍ່ສາມາດເດີນທາງໄປທ່ອງທ່ຽວຕ່າງປະເທດໄດ້ ແຕ່ເພື່ອເປັນການພິກວິກິດໃຫ້ເປັນໂອກາດ ພວກເຮົາຢາກຂໍເຊີນຊວນທຸກທ່ານທ່ຽວພາຍໃນປະເທດ ເພື່ອເປັນການສົ່ງເສີມການທ່ອງທ່ຽວຂອງລາວ ເພື່ອກະຕຸ້ນໃຫ້ເສດຖະກິດດ້ານການທ່ອງທ່ຽວນັບມື້ນັບດີຂຶ້ນເລື້ອຍໆ.

ຮູບພາບ ແລະຂໍ້ມູນຈາກ: Travel Shoot ທ່ຽວໄປຖ່າຍໄປ  


ທີ່ມາ: Travel Shoot ທ່ຽວໄປຖ່າຍໄປ
  • ຮູບພາບ

  • ແທັກທີ່ກ່ຽວຂ້ອງ