• ຄຳມ່ວນ ປູກຈິດສຳນຶກໃຫ້ອະນຸລັກ ຊັບພະຍາກອນປ່າໄມ້ ແລະສັດນໍ້າ-ສັດປ່າ

ໂດຍ: ສີເປື້ອນມື 30 ຕຸລາ 2020 (13.26 ນ.) Read : 1,851

ແຫລ່ງຂ່າວຈາກແຂວງ ຄຳມ່ວນ ໃຫ້ຮູ້ວ່າ: ເມື່ອບໍ່ດົນມານີ້, ທີມງານໂຄສະນາ ແລະ ປູກຈິດສຳນຶກດ້ານການອະນຸລັກຊັບພະຍາກອນປ່າໄມ້ ແລະ ສັດນໍ້າ, ສັດປ່າ, ກອງຄຸ້ມຄອງປ່າສະຫງວນ ແລະ ປ່າປ້ອງກັນ, ພະແນກກະສິກຳ ແລະ ປ່າໄມ້ ແຂວງຄຳມ່ວນ ໄດ້ລົງເຄື່ອນໄຫວໂຄສະນາວຽກງານ ຢູ່ ບ້ານລັງຄັງ ເມືອງບົວລະພາ ນຳໂດຍ ທ່ານ ຫອມຄຳ ໄຊໂກສີພິນິກ ຫົວໜ້າກຸ່ມວຽກໂຄສະນາ ແລະ ປູກຈິດສຳນຶກດ້ານການອະນຸລັກຊັບພະຍາກອນປ່າໄມ້ ແລະ ສັດນໍ້າ, ສັດປ່າ ເພື່ອໃຫ້ອົງການຈັດຕັ້ງບ້ານ,ນາຍບ້ານ, ພໍ່ແມ່ ປະຊາຊົນ ແລະ ຊາວຄ້າຊາວຂາຍ ໄດ້ຮັບຮູ້ ແລະ ເຫັນໄດ້ເຖິງຄວາມສຳຄັນຂອງສັດນໍ້າ, ສັດປ່າ ແລະ ການນຳໃຊ້ຊັບພະຍາກອນປ່າໄມ້ ໃຫ້ມີຄວາມຢືນຍົງ ແລະ ເພື່ອເປັນການສະກັດກັ້ນການຫລ້າສັດນໍ້າ, ສັດປ່າ ໄປຂາຍຕາມສະຖານທີ່ຕ່າງໆ.
ໂອກາດດຽວກັນ, ທີມງານດັ່ງກ່າວ ກໍໄດ້ສະເໜີລາຍຊື່ສັດປ່າປະເພດຫ່ວງຫ້າມເດັດຂາດ ແລະ ສັດປະເພດໃດເປັນສັດຄຸ້ມຄອງ ແລະ ສັດທີ່ສາມາດຊົມໃຊ້ໄດ້ ແລະ ເພື່ອພ້ອມພາກັນຈັດຕັ້ງປະຕິບັດຕາມລະບຽບກົດໝາຍ, ເຮັດໃຫ້ຊີວະນາໆພັນ ກໍຄື ສັດນໍ້າ-ສັດປ່າ ມີຄວາມອຸດົມສົມບູນໃນຂອບເຂດປ່າສະຫວງນ, ເຂດພູຫີນເຫລັກໄຟ ແລະ ບ່ອນອື່ນໆອີກ.
ຂ່າວ: ບຸນປະພາດ

ທີ່ມາ: ປະເທດລາວ Pathedlao
  • ຮູບພາບ

  • ແທັກທີ່ກ່ຽວຂ້ອງ