• ການນຳເມືອງໂຂງ ສັກຢາກັນພະ ຍາດໄຂ້ຫວັດໃຫຍ່ຕາມລະດູການ

ໂດຍ: Admin Mahason 28 ຕຸລາ 2020 (09.26 ນ.) Read : 1,892

     ຂປລ. ວັນທີ 27 ຕຸລາ 2020 ນີ້, ທີ່ຫ້ອງວ່າການເມືອງໂຂງ ແຂວງຈຳປາສັກ ໄດ້ມີພິທີສັກຢາກັນພະຍາດໄຂ້ຫວັດໃຫຍ່ຕາມລະດູການ ໃຫ້ກັບພະນັກງານການນຳຂອງເມືອງ ແລະ ພະນັກງານອ້ອມຂ້າງເມືອງ; ໂດຍການນໍາພາຂອງທ່ານ ນາງ ຄຳພູ ລິດທິສັກ ເຈົ້າເມືອງ ເມືອໂຂງ.
ທ່ານ ດຣ ຄຳສວຍ ຊາພິຈິດ ຫົວໜ້າຫ້ອງການ ສາທາລະນະສຸກເມືອງ ໃຫ້ຮູ້ໂດຍສັງເຂບວ່າ: ໂຄງການສັກຢາກັນພະຍາດໄຂ້ຫວັດ ຕາມລະດູການ ແມ່ນໂຄງການໜຶ່ງຂອງລັດຖະບານ ໂດຍໄດ້ຮັບທຶນສະໜັບສະໜູນຈາກອົງການຈັດຕັ້ງສາກົນ ເຊິ່ງໄດ້ສົມທົບກັບຄູ່ຮ່ວມພັດທະນາຕ່າງໆ ເພື່ອຫລຸດຜ່ອນການເຈັບ ແລະ ເສຍຊີວິດ ຂອງແມ່ຍິງ ແລະ ເດັກນ້ອຍ ໃຫ້ຫລຸດອອກຈາກບັນດາພະຍາດທີ່ສາມາດປ້ອງກັນໄດ້ ດ້ວຍຢາວັກຊີນ ທັງນີ້ເພື່ອແນໃສ່ສ້າງພູມຄຸ້ມກັນໃນຮ່າງກາຍ ແລະ ສາມາດຕ້ານທານຕໍ່ຄວາມສ່ຽງທີ່ຈະພາໃຫ້ເກີດພະຍາດຕາມລະດູການ ໂດຍສະເພາະ ໄຂ້ຫວັດໃຫຍ່ທີ່ຮຸນແຮງ.
ທ່ານ ດຣ ຄຳສວຍ ຊາພິຈິດ ​​ໄດ້ໃຫ້​ຮູ້​ຕື່ມອີກ​ວ່າ: ຂະແໜງສາທາລະນະສຸກ ໃນທົ່ວປະເທດ ໄດ້ເລີ່ມຈັດຕັ້ງປະຕິບັດໂຄງການນີ້ ໂດຍ​ເປົ້າ​ໝາຍ​ຫລັກ​ແມ່ນ ແມ່ຍິງຖືພາ ແລະ ຜູ້ສູງອາຍຸ ທີ່ມີພະຍາດຊ້ຳເຮື້ອໃດໜຶ່ງ, ຊຶ່ງວັກຊີນດັ່ງກ່າວສາມາດກັນພະຍາດໄຂ້ຫວັດ ຕາມ​ລະດູ​ການ ​ໂດຍ​ສະ​ເພາະ ໃນໄລຍະລະດູຝົນຂອງແຕ່ລະປີ ຢູ່ ສປປ ລາວ.
ຂ່າວໂດຍ: ພຸດທະສິນ

ທີ່ມາ: ປະເທດລາວ
  • ແທັກທີ່ກ່ຽວຂ້ອງ