• ໜາວນີ້ ໄປຫຼິ້ນບໍ່ນໍ້າຮ້ອນເມືອງຮ້ຽມ ນໍາກັນບໍ່

ໂດຍ: ສີເປື້ອນມື 26 ຕຸລາ 2020 (15.49 ນ.) Read : 1,899

ບໍ່ນໍ້າຮ້ອນເມືອງຮ້ຽມ ເປັນບໍ່ນໍ້າຮ້ອນທໍາມະຊາດຕັ້ງຢູ່ເມືອງ ຮ້ຽມ ແຂວງ ຫົວພັນ ເຊິ່ງຢູ່ຫ່າງຈາກຕົວເມືອງ ຊໍາເໜືອ ປະມານ 155 ກິໂລແມັດ. ບໍ່ນໍ້າຮ້ອນແຫ່ງນີ້ ຢູ່ຫ່າງຈາກເສັ້ນທາງຫຼັກຈາກປາກມອງ ໄປຫາ ເມືອງ ຊໍາເໜືອ ໂດຍແຍກອອກໄປທາງເມືອງ ຊ່ອນ ແຂວງ ຫົວພັນ ປະມານ 1 ກິໂລແມັດ.

ນໍ້າຢູ່ໃນບໍ່ນໍ້າຮ້ອນເມືອງຮ້ຽມແຫ່ງນີ້ ມີອຸນຫະພູມຄວາມຮ້ອນສູງເຖິງ 100 ອົງສາ ເຊິ່ງສາມາດຕົ້ມໄຂ່ໄດ້ສຸກພ້ອມກິນໄດ້ເລີຍ. ນອກນັ້ນ, ທໍາມະຊາດໃນບໍລິເວນດັ່ງກ່າວ ຍັງອຸດົມສົມບູນໄປດ້ວຍຕົ້ນໄມ້ນ້ອຍ-ໃຫຍ່ ແລະພືດພັນຊະນິດຕ່າງໆ ຖືວ່າເປັນອີກສະຖານທີ່ທ່ອງທ່ຽວໜຶ່ງທີ່ຄົນໃນເມືອງສ່ວນຫຼາຍອາດຈະຍັງບໍ່ທັນຮູ້ຈັກ ແລະບໍ່ທັນໄດ້ໄປສໍາຜັດກັບບັນຍາກາດອັນສຸດພິເສດ. ບໍ່ນໍ້າຮ້ອນທໍາມະຊາດແຫ່ງນີ້ ເປັນສະຖານທີ່ພັກຜ່ອນຢ່ອນໃຈ ແລະເຮັດໃຫ້ເຮົາຮູ້ສຶກຜ່ອນຄາຍຄວາມອິດເມື່ອຍຕ່າງໆ ເມື່ອໄດ້ໄປສໍາຜັດຈະຮູ້ສຶກວ່າອົບອຸ່ນດ້ວຍອາຍນໍ້າຮ້ອນຈາກທໍາມະຊາດ ໂດຍສະເພາະໃນຊ່ວງທີ່ກໍາລັງກ້າວເຂົ້າສູ່ລະດູໜາວນີ້ ຈະມີນັກທ່ອງທ່ຽວເຂົ້າໄປທ່ອງທ່ຽວຢ່າງຫຼວງຫຼາຍ.

ບໍ່ນໍ້າຮ້ອນເມືອງຮ້ຽມເປັນໜຶ່ງໃນບໍ່ນໍ້າຮ້ອນທີ່ດີທີ່ສຸດຂອງປະເທດລາວ ຈຸດນໍ້າພຸມີຄວາມຮ້ອນເຖິງ 100 ອົງສາ ແລະສໍາລັບບ່ອນທີ່ເພິ່ນຈັດໃຫ້ເຮົາຫຼິ້ນນໍ້າອຸ່ນນັ້ນ ມີທັງແບບເປັນອ່າງ ແລະເປັນທໍ່ນໍ້າໄຫຼມາໂດຍກົງ ເຊິ່ງມີຄວາມຮ້ອນ ປະມານ 50-60 ອົງສາ ເຮັດໃຫ້ບໍ່ນໍ້າຮ້ອນແຫ່ງນີ້ ໄດ້ຮັບຄວາມນິຍົມຈາກຜູ້ຄົນທີ່ຢູ່ໃນບໍລິເວນໃກ້ຄຽງ. ຕາມຄວາມເຊື່ອທີ່ປະຊາຊົນເລົ່າຂານກັນວ່າ ຖ້າຫາກໃຜໄດ້ມາອາບນໍ້າຮ້ອນຈາກບໍ່ນໍ້າຮ້ອນແຫ່ງນີ້ ສໍາລັບໃຜທີ່ເປັນພະຍາດຜິວໜັງຕ່າງໆກໍຈະຫາຍດີ. ນໍ້າທີ່ໄຫຼອອກຈາກບໍ່ນໍ້າແຫ່ງນີ້ ແມ່ນເປັນໜຶ່ງໃນສາຍນໍ້າທີ່ໃຫ້ກໍາເນີດນໍ້າຄານ ທີ່ໄຫຼລົງແມ່ນໍ້າຂອງ ທີ່ແຂວງ ຫຼວງພະບາງ ນັ້ນເອງ.

ປະຊາຊົນທີ່ອາໄສຢູ່ໃນຂົງເຂດດັ່ງກ່າວ ໄດ້ເລົ່າສູ່ຟັງວ່າ ນໍ້າໃນບໍ່ນໍ້າຮ້ອນແຫ່ງນີ້ ສາມາດຕົ້ມໄຂ່ໃຫ້ສຸກໄດ້ ຖ້າເຮົາປະໄວ້ປະມານ 15-20 ນາທີ. ຖ້າຫາກໃຜຢາກລອງໄປພິສູດດ້ວຍຕົວເອງກໍສາມາດເດີນທາງໄປໄດ້ ແລ້ວຢ່າລືມມາເລົ່າ ແລະແຊຣ໌ປະສົບການແບ່ງປັນກັນຟັງແນ່ເດີ.

ສໍາລັບລາຄາເຂົ້າຢ້ຽມຊົມ ຫຼືທ່ອງທ່ຽວໃນ ບໍ່ນໍ້າຮ້ອນເມືອງຮ້ຽມ ຄົນລາວ 5.000 ກີບຕໍ່ຄົນ ແລະຄົນຕ່າງປະເທດ 10.000 ກີບຕໍ່ຄົນ. ໃນຊ່ວງທີ່ປະເທດລາວຂອງພວກເຮົາຍັງບໍ່ທັນໄດ້ເປີດດ່ານສາກົນ ແລະດ່ານປະເພນີ ພວກເຮົາກໍສາມາດເດີນທາງໄປທ່ອງທ່ຽວພາຍໃນປະເທດໄດ້ ເຊິ່ງທົ່ວປະເທດກໍມີສະຖານທີ່ທ່ອງທ່ຽວຫຼາຍແຫ່ງທີ່ໜ້າສົນໃຈ ທັງນີ້ກໍເພື່ອເປັນການສົ່ງເສີມໃຫ້ຄົນລາວທ່ຽວລາວໃຫ້ຫຼາຍຂຶ້ນ ເຮັດໃຫ້ເສດຖະກິດດ້ານການທ່ອງທ່ຽວໃນລາວດີຂຶ້ນເລື້ອຍໆ.

ຂໍ້ມູນຈາກ: ບາບ່າບ້າພາທ່ຽວລາວ (babatour)

-    ພະແນກຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ແຂວງຫົວພັນ ແລະຮູບພາບຈາກ:​ NkaujHmong xamneua




ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ