• ໄຊສົມບູນ ຍົກທັກສະການຂຽນຂ່າວວິທະຍຸ-ໜັງສືພິມ

ໂດຍ: Admin Mahason 26 ຕຸລາ 2020 (14.43 ນ.) Read : 1,854

     ຂປລ.ພະນັກງານຂ່າວສານພະແນກ ຖວທ ແຂວງ, ຫ້ອງການ ຖວທ 5 ເມືອງ ແລະ ພະແນກການພາຍໃນແຂວງໄຊສົມບູນ ໄດ້ຮັບການຍົກລະດັບການຂຽນຂ່າວທາງວິທະຍຸ, ໂທລະໂຄ່ງ ແລະ ໜັງສືພິມແລ້ວໃນວັນທີ 26 ຕຸລານີ້ພາຍຫລັງກົມສື່ມວນຊົນກະຊວງ ຖວທ ແລະ ອົງການອຸຍນີເຊບ ຮ່ວມຈັດຊຸດອົບຮົມວຽກງານດັ່ງກ່າວແຕ່ວັນທີ 26-30 ຕຸລານີ້ພາຍໃຕ້ຫົວຂໍ້ ການປ້ອງກັນພະຍາດໂຄວິດ-19 ແລະ ການກັບສູ່ໂຮງຮຽນຢ່າງປອດໄພ. ຊຸດອົບຮົມດັ່ງກ່າວ ໄດ້ຮັບການສະໜັບສະໜູນຈາກອົງການຢູເສດ ໂດຍຜ່ານອົງການອຸນນີເຊບ. 
     ທ່ານ ສະຫວັນຄອນ ລາຊະມຸນຕີ ຮອງລັດຖະມົນຕີກະຊວງຖະແຫລງຂ່າວ, ວັດທະນະທໍາແລະ ທ່ອງທ່ຽວ ກ່າວວ່າ:ເຖິງວ່າຄະນະສະເພາະກິດກໍ່ຄືລັດຖະບານລາວ ໄດ້ຫລຸດຜ່ອນມາດຕະການຕ່າງໆລົງໂດຍສະເພາະການອະນຸຍາດເປີດໂຮງຮຽນຄືນທຸກຊັ້ນຮຽນທັງສາມັນ ແລະ ສະຖາບັນການສຶກສາລະດັບ ອື່ນໆ, ແຕ່ຕ້ອງໄດ້ສືບຕໍ່ປະຕິບັດບັນດາມາດຕະການປ້ອງກັນການຕິດເຊື້ອຢ່າງເຂັ້ມງວດໂດຍສື່ມວນຊົນເຮົາ ທັງສູນກາງ ແລະ ທ້ອງຖິ່ນ ຕ້້ອງໄດ້ເຮັດໜ້າທີ່ໂຄສະນາຕິດຕາມສະພາບການລະບາດພະຍາດໂຄວິດ-19 ທັງພາຍໃນ ແລະ ຕ່າງປະເທດ ທັງເຄື່ອນໄຫວເກັບກຳຂ່າວທຸກເຫດການ, ກິດຈະກຳຕ່າງໆຂອງຄະນະສະເພາະກິດ ແລະ ໂຄສະນາແນະນຳວິທີປ້ອງກັນພະຍາດທຸກຊ່ອງທາງເປັນຕົ້ນສື່ໂທລະພາບ, ວິ ທະຍຸ, ໜັງສືພິມ, ສື່ອອນລາຍ ແລະ ໂທລະໂຄ່ງປະຈຳບ້ານເພື່່ອສະກັດກັ້ນບໍ່ໃຫ້ເກີດການແພ່ລະບາດຂອງພະຍາດດັ່ງກ່າວນີ້. 
     ການອົບຮົມດັ່ງກ່າວ, ສຳມະນາກອນ ຈະໄດ້ຮຽນຮູ້ຄວາມຮູ້ພື້ນຖານການຜະລິດຂ່າວ, ການຂຽນລາຍການ, ພາສາຂ່າວ, ການສຳພາດ, ການກຽມໄປເອົາຂ່າວທັງວິທະຍຸ, ໂທລະໂຄ່ງ, ໜັງສືພິມ ແລະ ສື່ອອນລາຍພ້ອມທັງຮຽນຮູ້ການລາຍງານຂໍ້ມູນມີເດຍລາວ, ໂຄງຮ່າງ-ວິທີເຮັດວຽກຂອງທີມງາມເພຈມີເດຍລາວ, ການຄຸ້ມຄອງອິນເຕີເນັດ, ການສ້າງເພຈຂ່າວແຂວງໄຊສົມບູນ ແລະ 5 ເມືອງ.

ທີ່ມາ: ປະເທດລາວ
  • ແທັກທີ່ກ່ຽວຂ້ອງ