• ນຳ້ຖ້ວມຫນັກ 23 ບ້ານ ເມືອງສອງຄອນ ເຂົ້າເສຍຫາຍໜັກ

ໂດຍ: Admin Mahason 23 ຕຸລາ 2020 (11.13 ນ.) Read : 1,927

ຂປລ.ຜົນການເກັບກຳຂໍ້ມູນເບື້ອງຕົ້ນ ຈາກສະພາບໄພນ້ຳຖ້ວມຢູ່ ເມືອງສອງຄອນ ແຂວງສະ ຫວັນນະເຂດ ນັບແຕ່ວັນທີ 7-21 ຕຸລາ 2020, ມີປະຊາຊົນ ກຸ່ມບ້ານລະຫານ້ຳ, ສອງຄອນ, ຊະແຍກ ແລະ ກຸ່ມແກ້ງໂດນ ລຽບຕາມລຳນ້ຳເຊບັງຫຽງ ທັງຫມົດ 23 ບ້ານ, 2.428 ຄອບຄົວ, ພົນລະ ເມືອງ 14.400 ຄົນ ໄດ້ຮັບຜົນກະທົບຫນັກຫນ່ວງພໍສົມຄວນ ໂດຍສະເພາະເນື້ອທີ່ນາ ເກືອບ 5.000 ເຮັກຕາ ທີ່ມີເຂົ້າກຳລັງສຸກເຫລືອງພວມຈະໄດ້ຮັບການເກັບກູ້ ຖືກນ້ຳຖ້ວມເສຍຫາຍ.
     ທ່ານ ລຳຄູນ ວໍລະວົງ ເຈົ້າເມືອງສອງຄອນ ເປີດເຜີຍຕໍ່ນັກຂ່າວວ່າ: ພາຍຫລັງເກີດນ້ຳຖ້ວມ ໄດ້ມີການລົງຕິດຕາມສະພາບນ້ຳຖ້ວມຢ່າງໃກ້ຊິດ, ທັງລະດົມກຳລັງ ທະຫານ-ຕຳຫລວດ ຊ່ວຍເກັບກູ້ສິ່ງຂອງ, ສັດລ້ຽງ ໄປໄວ້ເຂດທີ່ສູງປອດໄພ, ພ້ອມທັງນຳເອົາເຄື່ອງຊ່ວຍເຫລືອທີ່ໄດ້ຮັບຈາກພາກສ່ວນຕ່າງໆທີ່ຈຳເປັນ ໄປມອບໃຫ້ປະຊາຊົນແຕ່ລະບ້ານຢ່າງຮີບດ່ວນ ແລະ ຕໍ່ເນື່ອງ. ຜົນເສຍຄັ້ງນີ້ ຍັງມີຫນອງປາ 314 ຫນອງ, ເນື້ອທີ່ສວນ 96 ເຮັກຕາ, ສັດຕາຍ (ງົວ6 ໂຕ) ວິດຖ່າຍ 1.289 ຫນ່ວຍ, ເລົ້າເຂົ້າ 1 ຫລັງ, ນໍ້າບາດານ 54 ຫນ່ວຍ, ລະບົບຊົນລະປະທານ 9 ແຫ່ງ ແລະ ສະພາບເສັ້ນທາງຄົມມະນາຄົມທາງບົກ ໃນບາງຈຸດພົບຄວາມຫຍຸ້ງຍາກໃຊ້ການບໍ່ໄດ້ມີທັງຫມົດ: 10 ເສັ້ນ ຍາວ 7.700 ແມັດ, ໂຮງຮຽນຢຸດການຮຽນ-ການສອນຊົ່ວຄາວມີ ທັງຫມົດ 22 ແຫ່ງ, ໂຮງຮຽນຖືກຖ້ວມ 11 ແຫ່ງ; ໃນນີ້, ອານຸບານ 1 ແຫ່ງ ແລະ ໂຮງຮຽນ ມໍຕົ້ນ 2 ແຫ່ງ; ສາຍໄຟຟ້າຕາຂ່າຍ 22 ກິໂລໂວນ ຂາດຢູ່ຈຸດຂ້າມເຊ ບ້ານຊະແຍກ-ບ້ານດອນມ່ວງ ໃນວັນທີ 19/10/2020 ແລະ ຈຸດຂ້າມເຊ ບ້ານດົງສະຫວ່າງ-ບ້ານສິງທ່າ ໃນວັນທີ 19/10/2020, ມີບ້ານທີ່ໃຊ້ໄຟຟ້າບໍ່ໄດ້ ແຕ່ວັນທີ 18-21/10/2020 ຈຳນວນ 16 ບ້ານ. ຕໍ່ກັບສະພາບການດັ່ງກ່າວ ການນໍາຂອງເມືອງພ້ອມ ດ້ວຍຄະນະກໍາມະການປ້ອງກັນ, ຕ້ານໄພພິບັດຂັ້ນເມືອງ ໄດ້ລົງຕິດຕາມສະພາບນໍ້າຖ້ວມຢ່າງໃກ້ຊິດ ຢູ່ແຕ່ລະກຸ່ມບ້ານ ເພື່ອໃຫ້ປະຊາຊົນທີ່ເຝົ້າເຮືອນຂອງຕົນມີຄວາມປອດໄພ. 
     ທ່ານ ເຈົ້າເມືອງສອງຄອນ ໃຫ້ຮູ້ອີກວ່າ: ສໍາລັບຜົນເສຍຫາຍຕົວຈິງຈາກຜົນກະທົບຈາກໄພນໍ້າຖ້ວມໃນຄັ້ງນີ້ ເປັນຕົ້ນແມ່ນ ເນື້ອທີ່ທໍາການຜະລິດກະສິກໍາ ດ້ານພື້ນຖານໂຄງລ່າງ, ເສັ້ນທາງຄົມມະ ນາຄົມ ແລະ ດ້ານຜົນເສຍຫາຍອື່ນໆ ທາງຄະນະກໍາມະການປ້ອງກັນ, ຕ້ານໄພພິບັດຂັ້ນເມືອງ ຍັງສືບຕໍ່ລົງເກັບກໍາຂໍ້ມູນຕົວຈິງ ແລະ ຈະໄດ້ລາຍງານ ໃຫ້ທ່ານຮັບຊາບຕາມພາຍຫລັງ. ປັດຈຸບັນ ລະ ດັບນ້ຳເລີ່ມຄ່ອຍໆຫລຸດລົງ ແຕ່ປະຊາຊົນຍັງມີຄວາມຕ້ອງການຄວາມຊ່ວຍເຫລືອ ທາງດ້ານເຂົ້າສານ, ອາຫານແຫ້ງ, ນ້ຳດື່ມ, ຢາປົວພະຍາດ ແລະ ອື່ນໆ, ຄາດວ່າຍັງອີກຫລາຍວັນ ສະພາບນ້ຳຈະບົກແຫ້ງລົງສູ່ສະພາບປົກກະຕິ.
ຂ່າວ-ພາບ:ຣາຊະວົງສ໌

ທີ່ມາ: ປະເທດລາວ
  • ຮູບພາບ

  • ແທັກທີ່ກ່ຽວຂ້ອງ