• ພັດຕາຄານ ເຊນພິລາ ສາມາດຮອງຮັບ 8.000 ກວ່າຄົນ

ໂດຍ: ສີເປື້ອນມື 21 ຕຸລາ 2020 (15.35 ນ.) Read : 504

ໃນວັນທີ 15 ຕຸລາ 2020 ທີ່ຜ່ານມາ ໄດ້ມີການຈັດພິທີເປີດພັດຕາຄານ ເຊນພິລາ ຄອນເວັນຊັນຮໍ ຢ່າງເປັນທາງການ ຢູ່ທີ່ບ້ານ ດົງປາແຫຼບ ເມືອງ ຈັນທະບູລີ ນະຄອນຫຼວງວຽງຈັນ. ໂດຍການເປັນປະທານຂອງທ່ານ ສີສົມບັດ ພິລາວົງ ປະທານ ພັດຕາຄານ ເຊນພິລາ ຄອນເວັນຊັ່ນຮໍ ແລະໃຫ້ກຽດເຂົ້າຮ່ວມໂດຍ: ທ່ານ ຄໍາແພງ ໄຊສົມແພງ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ, ທ່ານ ບົວສອນ ບຸບຜາວັນ ອະດີດນາຍົກລັດຖະມົນຕີ ສປປ ລາວ, ທ່ານ ພູຂົງ ບັນນະວົງ ຮອງເຈົ້າຄອງນະຄອນຫຼວງວຽງຈັນ ພ້ອມດ້ວຍລັດຖະມົນຕີ, ຮອງລັດຖະມົນຕີ, ບັນດານັກທຸລະກິດ ແລະແຂກທີ່ຖືກເຊີນ ເຂົ້າຮ່ວມຢ່າງຫຼວງຫຼາຍ.

ທ່ານ ສີສົມບັດ ພິລາວົງ ໄດ້ກ່າວວ່າ: ໄດ້ເລີ່ມຕົ້ນກໍ່ສ້າງໂຄງການ ພັດຕາຄານ ເຊນພິລາ ຄອນເວັນຊັ່ນຮໍ ມາຕັ້ງແຕ່ວັນທີ 15 ກັນຍາ 2018 ແລະໄດ້ສ້າງສໍາເລັດໃນວັນທີ 15 ຕຸລາ 2020. ໂຄງການກໍ່ສ້າງ ພັດຕາຄານແຫ່ງນີ້ ໃຊ້ເວລາໃນການກໍ່ສ້າງ 2 ປີ ກັບ 1 ເດືອນ ຈຶ່ງສໍາເລັດ. ແນວຄວາມຄິດ ແລະການອອກແບບທັງໝົດ ລ້ວນແຕ່ແມ່ນລູກຫລານຄົນລາວເຮົາ 100% ແລະພັດຕາຄານແຫ່ງນີ້ ບໍລິຫານຈັດການໂດຍ ບໍລິສັດ ເອັດພີ ອະສັງຫາລິມະຊັບ.

ຈຸດປະສົງຂອງການສ້າງຕັ້ງພັດຕາຄານ ແມ່ນເພື່ອນໍາໃຊ້ເປັນສະຖານທີ່ຈັດງານດອງ, ງານສັງສັນ, ກອງປະຊຸມ, ສໍາມະນາ ຫຼືງານສໍາຄັນຕ່າງໆທົ່ວໄປ. ສໍາລັບອາຄານຈັດງານ ມີເນື້ອທີ່ 2 ກວ່າເຮັກຕາ ແລະເນື້ອທີ່ຂອງພື້ນທີ່ທັງໝົດແມ່ນ 7 ກວ່າເຮັກຕາ, ສາມາດຈັດງານພ້ອມກັນໄດ້ເຖິງ 4 ງານ ແຕ່ລະງານສາມາດຮອງຮັບແຂກເຂົ້າຮ່ວມໄດ້ 2.000 ກວ່າຄົນ ຫຼືອາດຈະເວົ້າໄດ້ວ່າ ໃນຄືນໜຶ່ງສາມາດຮອງຮັບແຂກໄດ້ເຖິງ 8.000 ກວ່າຄົນ. ນອກຈາກນີ້, ຍັງໄດ້ສ້າງອາຄານຈອດລົດ 4 ຊັ້ນ ໃນເນື້ອທີ່ 3 ກວ່າເຮັກຕາ ແລະສາມາດຈອດລົດໄດ້ຫຼາຍກວ່າ 2.000 ຄັນ. ຈຸດພິເສດແມ່ນມີທາງເຂົ້າມາພັດຕາຄານໄດ້ຈາກ 3 ເສັ້ນທາງ ຄື: ສາມາດເດີນທາງເຂົ້າມາໄດ້ໃນເສັ້ນທາງໜອງບົວທອງ-ດົງປາແຫຼບ, ເສັ້ນທາງຮ່ອງຄ້າ-ໂນນຕານ ແລະເສັ້ນທາງຫ້ອງການບ້ານດົງປາແຫຼບ. ພັດຕາຄານແຫ່ງນີ້ ມີພະນັກງານ 200 ຄົນ ເພື່ອຕອບສະໜອງໃນການບໍລິການໃຫ້ແກ່ລູກຄ້າ ແລະໃຊ້ບໍລິການຈັດງານຕ່າງໆ. ນອກຈາກນັ້ນ, ພັດຕາຄານແຫ່ງນີ້ ຍັງໄດ້ສົ່ງເສີມໃຫ້ພໍ່ແມ່ປະຊົນໃນບໍລິເວນອ້ອມຂ້າງມີວຽກເຮັດງານທໍາ.

ພັດຕາຄານ ເຊນພິລາ ໄດ້ເນັ້ນການໃຫ້ບໍລິການລູກຄ້າເປັນຫຼັກ, ຊື່ສັດ ແລະສ້າງຄວາມເພິ່ງພໍໃຈໃຫ້ກັບລູກຄ້າ ໃນໄລຍະເປີດພັດຕາຄານໃໝ່ນີ້ ສໍາລັບໃຜທີ່ຈອງຈັດງານ 50 ງານທໍາອິດ ແມ່ນຈະໃຫ້ນໍາໃຊ້ ຈໍແອວອີດີ ໂດຍບໍ່ເສຍຄ່າ ພ້ອມກັນນັ້ນ, ຍັງມີລະບົບໄຟແສງສີຄົບຊຸດ ແລະມີສະຖານທີ່ສໍາລັບຈັດງານສູ່ຂັວນມັດແຂນ, ມີຫ້ອງພັກສໍາລັບເຈົ້າບ່າວ-ເຈົ້າສາວ ແລະສາມາດຖ່າຍທອດສົດຜ່ານທາງເຟສບຸກໄດ້. ປັດຈຸບັນ ມີລູກຄ້າເຂົ້າມາຈັບຈອງຈັດງານແລ້ວ 50 ກວ່າງານ. ນອກຈາກນັ້ນ, ຍັງໄດ້ສ້າງສວນຢູ່ດ້ານນອກ ສາມາດຮອງຮັບຜູ້ຄົນໄດ້ເຖິງ 400 ກວ່າຄົນ, ສາມາດຈັດງານສະແດງສິລະປະດົນຕີໄດ້ ເຊິ່ງມູນຄ່າການກໍ່ສ້າງດັ່ງກ່າວ 20 ລ້ານໂດລາ ຫຼືປະມານ 184 ຕື້ກວ່າກີບ.


ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ