• K-KO Shop ຕອບໂຈດຄົນງົບໜ້ອຍ ທຸກຢ່າງ 4000-7000 ກີບ

ໂດຍ: ສີເປື້ອນມື 07 ຕຸລາ 2020 (13.54 ນ.) Read : 182

ທ່ານ ຄໍາຮຸ່ງ ສີພອນໄຊ ປະທານບໍລິສັດເຄໂກະ (K-KO): ໄດ້ໃຫ້ສໍາພາດວ່າ: ພາຍຫລັງທີ່ຕົນເອງຮຽນຈົບປະລິຍາຕີ ສາຂາວິທະຍາສາດຄອມພີວເຕີ ຈາກ ສປ ຈີນ ແລ້ວ ກໍໄດ້ມາດໍາເນີນທຸລະກິດຂາຍເຄື່ອງໄຟຟ້າປະມານ 14 ປີ ແຕ່ເຫັນວ່າຜົນຕອບແທນບໍ່ໄດ້ຕາມເປົ້າໝາຍທີ່ຕັ້ງໄວ້ ພ້ອມດຽວກັນນັ້ນຍັງມີຮ້ານຂາຍເຄື່ອງໄຟຟ້າເກີດຂຶ້ນຢ່າງຫຼວງຫຼາຍ ແລະການຄ້າຂາຍກໍມີທ່າອ່ຽງຍາກຂຶ້ນ. ດັ່ງນັ້ນ, ຈຶ່ງໄດ້ປຶກສາຫາລືນໍາຄອບຄົວ ແລະໄດ້ຕັດສິນໃຈມາຂາຍເຄື່ອງທຸກຢ່າງ 4.000-7.000 ກີບ ພາຍໃຕ້ແຮງບັນດານໃຈທີ່ຢາກໃຫ້ຄົນລາວໃຊ້ເຄື່ອງດີ, ມີຄຸນນະພາບ ແລະລາຄາຖືກ.
      ຮ້ານເຄື່ອງທຸກຢ່າງ 4.000-7.000 ກີບ (K-KO) ໄດ້ເລີ່ມເປີດໃນປີ 2019 ໃນເບື້ອງຕົ້ນກໍຍັງບໍ່ທັນມີຄົນຮູ້ຈັກຫຼາຍ, ພໍດໍາເນີນມາໄດ້ໄລຍະໜຶ່ງກໍມີຄົນເລີ່ມຮູ້ຈັກຫຼາຍຂຶ້ນ ແລະເຮັດໃຫ້ຍອດຂາຍເພີ່ມຂຶ້ນເລື້ອຍໆຈົນເກີນຄວາມຄາດໝາຍ.
      ປັດຈຸບັນນີ້ ຮ້ານເຄື່ອງທຸກຢ່າງ 4.000-7.000 ກີບ (K-KO) ແມ່ນມີທັງໝົດ 8 ສາຂາ: ຕົວແທນຈໍາໜ່າຍໃນນະຄອນຫຼວງວຽງຈັນ 4 ສາຂາ ແລະຕ່າງແຂວງ 4 ສາຂາ ຄື: ບໍລິຄໍາໄຊ, ໄຊສົມບູນ ແລະບໍ່ແກ້ວ, ມີສິນຄ້າທັງໝົດ 14 ໝວດໝູ່ ໃນນັ້ນມີເຄື່ອງໃຊ້ໃນຄອບຄົວ, ເຄື່ອງໃຊ້ຫ້ອງການ, ເຄື່ອງຫລິ້ນເດັກນ້ອຍ, ເຄື່ອງໄອທີ, ເຄື່ອງແກ້ວ-ເຄື່ອງປະດັບປະດາ, ເຄື່ອງສໍາອາງ, ເຄື່ອງໃຊ້ການສຶກສາ, ເຄື່ອງວັດສະດຸກໍ່ສ້າງ ແລະອື່ນໆ ເຊິ່ງໄດ້ນໍາເຂົ້າຈາກ ຈີນ, ຍີ່ປຸ່ນ, ເກົາຫລີ, ໄທ ລວມທັງ ລາວເຮົາ.
      ໃນອະນາຄົດ ພວກເຮົາຈະສືບຕໍ່ນໍາເຂົ້າສິນຄ້າຈາກປະເທດ ອິນເດຍ, ອິນໂດເນເຊຍ, ຫວຽດນາມ ແລະຈະຂະຫຍາຍໄປສາຂາໃຫ້ໄດ້ 100 ແຫ່ງໃນຂອບທົ່ວປະເທດ ພາຍໃນປີ 2022, ພວກເຮົາກໍາລັງພິຈາລະນາ ແລະສຶກສາຄວາມເປັນໄປໄດ້ໃນການສົ່ງເສີມສິນຄ້າຂອງຄົນລາວເອງ ດັ່ງຄໍາຂວັນທີ່ວ່າ: ລາວຜະລິດ ລາວນໍາໃຊ້ ລາວໄດ້ ລາວລະເຈີນໂດຍຈະຂາຍປະເພດອາຫານລາວ (ແຈ໋ວບອງ, ໄຄແຜ່ນ, ອາຫານພື້ນບ້ານຕ່າງໆ), ເຄື່ອງໂອດ໋ອບ ແລະສິນຄ້າອື່ນໆທີ່ເປັນເອກະລັກຂອງແຂວງຕ່າງໆ.
      ສິນຄ້າທີ່ນໍາມາຂາຍພາຍໃນຮ້າຂອງພວກເຮົາ ແມ່ນມີຄຸນນະພາບແຕກຕ່າງຈາກລາຄາ 3.000-4.000 ກີບແນ່ນອນ ເນື່ອງຈາກພວກເຮົາບໍ່ໄດ້ຮັບເອົາມາຈາກພໍ່ຄ້າຄົນກາງ ແຕ່ພວກເຮົາໄດ້ໄປຄັດເລືອກສິນຄ້າຈາກໂຮງງານບ່ອນຜະລິດໂດຍກົງ ເພື່ອຮັບປະກັນເຮັດໃຫ້ປະຊາຊົນລາວເຮົາ ສາມາດຊື້ໄດ້ໃນລາຄາຖືກ ແລະໄດ້ຊົມໃຊ້ສິນຄ້າທີ່ມີຄຸນນະພາບ ໂດຍສະເພາະແມ່ນຜູ້ທີ່ມີລາຍໄດ້ໜ້ອຍ.
      ສໍາລັບທ່ານໃດທີ່ມີຄວາມສົນໃຈ ຫຼືຢາກເປັນຕົວແທນຈໍາໜ່າຍ, ພວກເຮົາສາມາດຈັດສົ່ງສິນຄ້າ ພ້ອມດ້ວຍການຈັດຮ້ານໃຫ້ຟຣີ ແລະແນະນໍາວິທີການຂາຍ. ຮ້ານເຄື່ອງທຸກຢ່າງ 4.000-7.000 ກີບ (K-KO) ຕັ້ງຢູ່ບ້ານ ໜອງຈັນ ເມືອງ ສີສັດຕະນາກ ນະຄອນຫຼວງວຽງຈັນ. ສໍານັກງານໃຫຍ່ ບໍລິສັດເຄໂກະ ຕັ້ງຢູ່ຖະໜົນດົງປ່າລານ ບ້ານໜອງຈັນ ເມືອງສີສັດຕະນາກ ນະຄອນຫຼວງວຽງຈັນ. ສອບຖາມຂໍ້ມູນເພີ່ມຕື່ມໄດ້ທີ່ເບີໂທ 020 5558 5559 ແລະ 020 5432 0000 ຮ້ານເປີດທຸກວັນ.


ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ