• ສສຊ ສະເໜີໃຫ້ລັດຖະມົນຕີກະຊວງສາທາ ປັບປຸງຈັນຍາບັນຂອງແພດ-ໝໍຢູ່ໂຮງໝໍລັດ

ໂດຍ: Admin Mahason 14 ພະຈິກ 2017 (10.28 ນ.) Read : 974

ກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ VIII ດຳເນີນມາຮອດວັນທີ 2 ພະຈິກ 2017 ເປັນມື້ທີ 18 ໂດຍເປັນປະທານຂອງທ່ານ ສົມພັນ ແພງຄໍາມີ, ຮອງປະທານສະພາແຫ່ງຊາດ ມີສະມາຊິກສະພາແຫ່ງຊາດ (ສສຊ) ແລະ ພາກສ່ວນກ່ຽວຂ້ອງເຂົ້າຮ່ວມ. ທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ໄດ້ສະເໜີຮ່າງກົດໝາຍວ່າດ້ວຍການກັນ ແລະ ຄວບຄຸມພະຍາດຕິດຕໍ່ ເຊິ່ງເປັນກົດໝາຍສ້າງຂຶ້ນໃໝ່ ປະກອບມີ X ພາກ 7 ໝວດ 83 ມາດຕາ. 

ໃນນີ້ໄດ້ກໍານົດຫຼັກການ, ລະບຽບການ, ມາດຕະການກ່ຽວກັບການຄຸ້ມຄອງ ຕິດຕາມກວດກາການວຽກງານກັນ ແລະ ຄວບຄຸມພະຍາດຕິດຕໍ່ເພື່ອຕ້ານ ແລະ ສະກັດກັ້ນການເກີດ ແລະ ການລະບາດຂອງພະຍາດຕິດຕໍ່, ຫຼຸດຜ່ອນການເຈັບເປັນ ເສຍຊີວິດຂອງພົນລະເມືອງ. ໃນນີ້, ສສຊ ໄດ້ໃຫ້ຄວາມສົນໃຈພ້ອມທັງປະກອບຄໍາຄິດເຫັນເພື່ອເປັນການແລກປ່ຽນ ແລະ ສະເໜີໃຫ້ພາກສ່ວນກ່ຽວຂ້ອງປັບປຸງເນື້ອໃນຢູ່ໃນບາງມາດຕາ ໂດຍສະເພາະການອະທິບາຍຄໍາສັບ ການໃຊ້ສັບພາສາໃຫ້ມີຄວາມຈະແຈ້ງ ຮັດກຸມ ຊັບຊ້ອນຄໍາສັບຄືນໃໝ່, ຕັດບາງຄໍາທີ່ຊໍ້າຊ້ອນອອກ ກໍານົດໃຫ້ຈະແຈ້ງກ່ຽວກັບການນະໂຍບາຍກັນ ແລະ ຄວບຄຸມພະຍາດຕິດຕໍ່ໃຫ້ເໝາະສົມ. 

ນອກນີ້ ສສຊ ຫຼາຍທ່ານຍັງສະເໜີໃຫ້ມີການຈັດສັນງົບປະມານສະເພາະແກ້ໄຂວຽກງານດັ່ງກ່າວ ພ້ອມທັງປະຕິບັດນະໂຍບາຍຢ່າງເໝາະສົມສໍາລັບຜູ້ເຮັດວຽກປະຈັນບານ, ເອົາໃຈໃສ່ໃນການປັບປຸງຈັນຍາບັນຂອງພະນັກງານແພດ-ໝໍຢູ່ໃນໂຮງໝໍຂອງລັດໃນທົ່ວປະເທດ ແລະ ເອກະຊົນ ໃນການບໍລິການຄົນເຈັບດ້ວຍຄວາມວ່ອງໄວ, ທັນການ ແລະ ຫັນເປັນທັນສະໄໝເທື່ອລະກ້າວ. 

ພິເສດໄປກວ່ານັ້ນ, ສສຊ ຍັງສະເໜີໃຫ້ມີການກໍານົດໃຫ້ແຈ້ງຕື່ມກ່ຽວກັບວຽກງານໂພຊະນາການ ໂດຍສະເພາະການກິນ-ການຢູ່ທີ່ມີຄວາມສ່ຽງຕໍ່ການເປັນພະຍາດຕິດຕໍ່ ລວມທັງກໍານົດແຈ້ງຂອບເຂດສິດ, ບັນດາລະບຽບການ, ນະໂຍບາຍ, ຂໍ້ຫ້າມຕ່າງໆໃນການຄຸ້ມຄອງ, ກວດກາວຽກງານກັນ ແລະ ຄວບຄຸມພະຍາດຕິດຕໍ່ ແລະ ບັນຫາສໍາຄັນອື່ນໆອີກ.

ທີ່ມາ: ນສພ ເສດຖະກິດ-ການຄ້າ
  • ແທັກທີ່ກ່ຽວຂ້ອງ