• ລາວ ໂທລະຄົມ ເປີດນໍາໃຊ້ລະບົບ 5G ຢ່າງເປັນທາງການແລ້ວ

ໂດຍ: ສີເປື້ອນມື 31 ສິງຫາ 2020 (15.03 ນ.) Read : 146

ໃນວັນທີ 31 ສິງຫາ 2020 ບໍລິສັດ ລາວ ໂທລະຄົມມະນາຄົມ ມະຫາຊົນ ໄດ້ຈັດພິທີເປີດນໍາໃຊ້ ລະບົບ 5G ຢ່າງເປັນທາງການ ຢູ່ທີ່ ໂຮງແຮມ ລາວ ພລາຊ່າ ນະຄອນຫຼວງວຽງຈັນ ເຊິ່ງເປັນເຄືອຂ່າຍທໍາອິດໃນ ສປປ ລາວ. ໂດຍການເປັນປະທານຂອງ ທ່ານ ສຸພົນ ຈັນທະວີໄຊ ຜູ້ອໍານວຍການໃຫຍ່ ບໍລິສັດ ລາວ ໂທລະຄົມມະນາຄົມ ມະຫາຊົນ ແລະໃຫ້ກຽດເຂົ້າຮ່ວມໃນງານມີ: ທ່ານ ປອ. ທັນສະໄໝ ກົມມະສິດ ກໍາມະການສູນກາງພັກ, ລັດຖະມົນຕີ ກະຊວງໄປສະນີ, ໂທລະຄົມມະນາຄົມ ແລະ ການສື່ສານ ພ້ອມດ້ວຍຄະນະນໍາກະຊວງ ປທສ, ບັນດາຫົວໜ້າກົມ, ຮອງຫົວຫນ້າກົມ ອ້ອມຂ້າງກະຊວງ ປທສ, ຄະນະອໍານວຍການ, ຜູ້ບໍລິຫານບໍລິສັດ ລາວ ໂທລະຄົມມະນາຄົມ ມະຫາຊົນ ແລະແຂກທີ່ຖືກເຊີນ.

ກ່ອນໜ້າທີ່ຈະເປີດໂຕນໍາໃຊ້ຢ່າງເປັນທາງການນີ້ ທາງບໍລິສັດ ລາວ ໂທລະຄົມມະນາຄົມ ມະຫາຊົນ ກໍໄດ້ເປີດທົດລອງນໍາໃຊ້ລະບົບ 5G ມາແລ້ວຄັ້ງໜຶ່ງ ເພື່ອເປັນການກຽມພ້ອມດ້ານຕ່າງໆ ເຊິ່ງໄດ້ໃຫ້ການທົດລອງ ແລະສາທິດບັນດາ Show case ຈໍານວນໜຶ່ງທີ່ທາງທີມງານໄດ້ກະກຽມມາ ເພື່ອສະແດງໃຫ້ເຫັນວ່າ ລະບົບ 5G ມີສັກກະຍະພາບ ແລະທັນສະໄໝພຽງໃດ. ສໍາລັບພື້ນທີ່ການໃຫ້ບໍລິການລະບົບ 5G ໃນເບື້ອງຕົ້ນ ບໍລິສັດ ລາວ ໂທລະຄົມມະນາຄົມ ໄດ້ໃຫ້ບໍລິການຢູ່ບາງພື້ນທີ່ໃນນະຄອນຫຼວງວຽງຈັນ ກ່ອນ ໂດຍສະເພາະແມ່ນຈຸດຊຸມຊົນໃຈກາງເມືອງ ເຊັ່ນ: ເຂດສີຫອມ, ຕະຫຼາດກາງຄືນແຄມຂອງ, ເຂດສາຍລົມ ແລະມະຫາວິທະຍາໄລແຫ່ງຊາດ (ວິທະຍາເຂດດົງໂດກ). ຫຼັງຈາກນັ້ນ, ຈຶ່ງຈະສືບຕໍ່ຂະຫຍາຍໄປສູ່ບັນດາແຂວງໃຫຍ່ໃນປະເທດ.

ລະບົບ 5G ມີຄຸນນະສົມບັດພິເສດຫຼັກໆຢູ່ 3 ຢ່າງທີ່ແຕກຕ່າງກັບລະບົບ 4G ຄື: ຄວາມໄວ, ຄວາມສາມາດໃນການຮອງຮັບການເຊື່ອມຕໍ່ກັບອຸປະກອນ ແລະເວລາໃນການຕອບສະໜອງ.

-    ຄວາມໄວ: ຄວາມໄວໃນການຮັບ-ສົ່ງຂໍ້ມູນ ທີ່ມີຄວາມໄວກວ່າ 4G ເຖິງ 20 ເທົ່າ. ຕົວຢ່າງ: ເມື່ອເຮົາອັບໂຫຼດວີດິໂອທີ່ມີຄວາມຍາວ 2 ຊົ່ວໂມງ ລະບົບ 4G ຈະໃຊ້ເວລາປະມານ 6-7 ນາທີ, ໃນຂະນະທີ່ ລະບົບ 5G ຈະໃຊ້ເວລາພຽງ 3-4 ວິນາທີ ເທົ່ານັ້ນ, ການເບິ່ງວິດີໂອແບບອອນລາຍ ທີ່ມີຄວາມລະອຽດລະດັບສູງສຸດລະດັບ HD 4K ແລະ8K ຈະບໍ່ເປັນອຸປະສັກອີກຕໍ່ໄປ, ສາມາດປົດລ໋ອກຄຸນນະສົມບັດຂອງ AR ແລະ VR ກັບປະສົບການທີ່ສົມຈິງ ທີ່ເກີດຈາກການໃຊ້ຂໍ້ມູນຈໍານວນຫຼາຍໃນການປະມວນຜົນ ເຊິ່ງລະບົບ 5G ຈະຕອບໂຈດການສື່ສານຜ່ານ AR ແລະ VR ຢ່າງສົມບູນແບບ.

-    ຄວາມສາມາດຮອງຮັບການເຊື່ອມຕໍ່: ຈໍານວນການເຊື່ອມຕໍ່ທີ່ສາມາດຮອງຮັບອຸປະກອນໄດ້ຫຼາຍກວ່າ 4G ເຖິງ 10 ເທົ່າ ຫຼືເທົ່າກັບ 1 ລ້ານ ອຸປະກອນ/sq.km ດ້ວຍລະບົບ 5G ຈະເປີດໂລກ IOT ໄດ້ຢ່າງແທ້ຈິງ ແລະຈະເປັນພື້ນຖານ ເພື່ອຮອງຮັບການພັດທະນາ ເຕັກໂນໂລຊີ Smart Home, Smart City, Smart Transportation, Smart Life, Smart Health ແລະອື່ນໆ ໂດຍສັ່ງການຜ່ານໂທລະສັບມືຖື ຫຼືອຸປະກອນທີ່ສາມາດສື່ສານກັນເອງໄດ້, ຄວບຄຸມກັນໄດ້ ແລະເຮັດວຽກປະສານກັນໄດ້ຢ່າງອັດຕະໂນມັດ.

-    ເວລາໃນການຕອບສະໜອງ-ໂຕ້ຕອບ: ສັ້ນລົງເຖິງ 1 ມິນລີວິນາທີ, ດ້ວຍຄຸນນະສົມບັດພິເສດດັ່ງກ່າວ ລະບົບ 5G ຈະສາມາດຕອບໂຈດ ໃນສ່ວນຂອງກຸ່ມຄົນທີ່ມັກຫຼິ້ນເກມ ເຊິ່ງຕ້ອງການຄວາມໄວໃນການໂຕ້ຕອບສູງ ຫຼືເວົ້າອີກຢ່າງໜຶ່ງຄື ຖ້າ Latency ຍິ່ງຕໍ່າຍິ່ງດີ, ຕອບໂຈດການຂັບຂີ່ແບບບໍ່ມີຄົນຂັບທີ່ມີຄວາມປອດໄພສູງ ແລະນໍາໃຊ້ເຂົ້າໃນທາງການແພດ ເຊັ່ນ: ການຜ່າຕັດທາງໄກ ແລະອື່ນໆ.


ທີ່ມາ: #LaoTelecom
  • ຮູບພາບ

  • ແທັກທີ່ກ່ຽວຂ້ອງ