• ຫົງສາ ວາງຄາດໝາຍການສອບເສັງ ມ 4 ໃຫ້ໄດ້ 97%

ໂດຍ: ສີເປື້ອນມື 23 ກໍລະກົດ 2020 (12.07 ນ.) Read : 342

ກ່ອນສອບເສັງຈົບຊັ້ນມັດທະຍົມຕອນຕົ້ນ ຫລື ມ 4 ສົກຮຽນປີ 2019-2020, ໃນຕອນເຊົ້າຂອງວັນທີ 21 ກໍລະກົດຜ່ານມາ, ຢູ່ທີ່ສະໂມສອນຂອງໂຮງຮຽນມັດທະຍົມສຶກສາສົມບູນຫົງສາ ເມືອງຫົງສາ ແຂວງໄຊຍະບູລີ ໄດ້ເຊື່ອມຊຶມກົດລະບຽບການສອບເສັງຈົບຊັ້ນ ໃຫ້ນ້ອງນັກຮຽນຊັ້ນ ມ 4, ໂດຍການໃຫ້ກຽດເຂົ້າຮ່ວມຂອງທ່ານ ນາງ ດາວວິນ ລາດຊະກິດ ຮອງເລຂາພັກເມືອງ ປະທານສູນການສອບເສັງຈົບຊັ້ນຂັ້ນເມືອງ ເມືອງຫົງສາ, ມີທ່ານ ສຶກສາຄອນ ມາລາວົງ ຮອງຫົວໜ້າຂະແໜງ ພະລະ-ສິລະປະ ພະແນກສຶກສາທິການ ແລະ ກິລາແຂວງໄຊຍະບູລີ, ທ່ານ ທອງສຸກ ປ້ອງຄຳ ຫົວໜ້າຫ້ອງການ ສຶກສາທິການ ແລະ ກິລາເມືອງຫົງສາ, ມີຄູ-ອາຈານ ແລະ ນ້ອງນັກຮຽນສອບເສັງເຂົ້າຮ່ວມ.
ທ່ານ ສຶກສາຄອນ ມາລາວົງ ໄດ້ເຜີຍແຜ່ກົດລະບຽບການສອບເສັງຈົບຊັ້ນ ມັດທະຍົມສຶກສາຕອນຕົ້ນ ໃຫ້ນ້ອງນັກຮຽນໄດ້ຮັບຮູ້ ແລະ ເຂົ້າໃຈແຈ້ງຕໍ່ການປະຕິບັດການສອບເສັງໃນຄັ້ງນີ້ຢ່າງລະອຽດ ແລະໃນໂອກາດດຽວກັນ, ທ່ານ ທອງສຸກ ປ້ອງຄຳ ຫົວໜ້າຫ້ອງການສຶກສາທິການ ແລະ ກິລາ ເມືອງຫົງສາ ກໍ່ໄດ້ໃຫ້ການສຳພາດຕໍ່ນັກຂ່າວເມືອງໄຊຍະບູລີ ຊາບກ່ຽວກັບຈໍານວນນັກຮຽນທີ່ຈະເຂົ້າສອບເສັງ, ລວມທັງສູນ ແລະ ຫ້ອງສອບເສັງ ຊຶ່ງມີການວ່າ: ການສອບເສັງຈົບຊັ້ນ ຊຶ່ງມີນັກຮຽນຈະສອບເສັງຈົບຊັ້ນ ມ 4 ທັງໝົດ 379 ຄົນ, ເພດຍິງ 197 ຄົນ, ແບ່ງເປັນ 6 ສູນສອບເສັງ, 20 ຫ້ອງ ບັນຈຸຫ້ອງໜຶ່ງບໍ່ເກີນ 20-22 ຄົນ ແລະ ມີຄະນະກຳມະການຍາມຫ້ອງສອບເສັງ 2 ຄົນຕໍ່ຫ້ອງ ຕາມກົດລະບຽບການສອບເສັງທີ່ກະຊວງສຶກສາທິການ ແລະ ກິລາ ວາງອອກ. ຕາມຄາດໝາຍສູ້ຊົນການສອບເສັງຈົບຊັ້ນ ມ 4 ໃນສົກຮຽນນີ້, ແມ່ນຈະໃຫ້ບັນລຸຄາດໝາຍ 97% ຂອງແຜນການ.
ສຳລັບການສອບເສັງແມ່ນເລີ່ມພ້ອມກັນທົ່ວປະເທດແລ້ວ ໃນວັນທີ 22 ຫາ 24 ເດືອນກໍລະກົດນີ້.

ທີ່ມາ: ປະເທດລາວ Pathedlao
  • ຮູບພາບ

  • ແທັກທີ່ກ່ຽວຂ້ອງ