• ເປີດໂຕບໍລິສັດ ລາວ ໂມບາຍມັນນີ ແລະແນະນໍາແອັບ M-money

ໂດຍ: ສີເປື້ອນມື 20 ກໍລະກົດ 2020 (17.29 ນ.) Read : 153

ໃນຕອນຄໍ່າຂອງວັນທີ 17 ກໍລະກົດ 2020 ຜ່ານມາ ໄດ້ມີການຈັດພິທີເປີດ ບໍລິສັດ ລາວ ໂມບາຍມັນນີ ຈໍາກັດຜູ້ດຽວ ແລະບໍລິການ M-money ການເງິນດິຈິຕອນເທິງມືຖື ຢ່າງເປັນທາງການ ທີ່ໂຮງແຮມ ດອນຈັນ ພາເລດ ນະຄອນຫຼວງວຽງຈັນ. ໂດຍການເປັນປະທານຂອງທ່ານ ປອ. ທັນສະໄໝ ກົມມະສິດ ກຳມະການສູນກາງພັກ ລັດຖະມົນຕີ ກະຊວງໄປສະນີ ໂທລະຄົມມະນາຄົມ ແລະການສື່ສານ, ທ່ານ ທັນສະໄໝ ຊາມຸນຕີ ຜູ້ອໍານວຍການ ບໍລິສັດ ລາວ ໂມບາຍມັນນີ ຈໍາກັດຜູ້ດຽວ, ຮອງລັດຖະມົນຕີ, ຫົວໜ້າກົມ, ຄະນະຜູ້ບໍລິຫານ ບໍລິສັດ ລາວໂທລະຄົມມະນາຄົມ ມະຫາຊົນ ແລະບໍລິສັດ ລາວ ໂມບາຍມັນນີ ຈໍາກັດຜູ້ດຽວ ພ້ອມດ້ວຍຄູ່ຮ່ວມທຸລະກິດ ແລະແຂກທີ່ຖືກເຊີນເຂົ້າຮ່ວມຈາກທາງພາກລັດ ແລະເອກະຊົນ.

ຈຸດປະສົງຂອງການຈັດງານໃນຄັ້ງນີ້ແມ່ນ ເພື່ອເປັນການເປີດໂຕຢ່າງເປັນທາງການ ກ່ຽວກັບການບໍລິການແອັບພິເຄຊັ່ນ (M-money) ກະເປົ໋າເງິນເທິງມືຖື ທີ່ສາມາດໃຊ້ກັບການໃຊ້ຊີວິດປະຈໍາວັນແບບໃໝ່ ທີ່ເນັ້ນຄວາມສະດວກສະບາຍ ໃນການຈ່າຍເງິນ ໂດຍບໍ່ຈໍາເປັນຈະຕ້ອງຖືເງິນສົດອີກຕໍ່ໄປ. M-money ສາມາດຈ່າຍຄ່ານໍ້າ, ຄ່າໄຟຟ້າ, ຄ່າໂທລະສັບ, ຄ່າບິນຕ່າງໆ ແລະສາມາດໂອນເງິນໄປທະນາຄານຕ່າງໆໄດ້ພຽງປາຍນິ້ວ ຫຼືທ່ານຕ້ອງການເອົາເງິນເຂົ້າໃນ M-money ກໍສາມາດເຮັດໄດ້ດ້ວຍວິທີງ່າຍໆ ທີ່ຈຸດບໍລິການທົ່ວປະເທດ.

ບໍລິສັດ ລາວ ໂມບາຍມັນນີ ຈໍາກັດຜູ້ດຽວ ສືບຕໍ່ພັດທະນາວຽກ ໄປສະນີ ໂທລະຄົມມະນາຄົມ ແລະເປັນການສື່ສານໃຫ້ກາຍເປັນອຸດສາຫະກໍາທີ່ທັນສະໄໝ, ເປັນສື່ກາງໃນການເຊື່ອມໂຍງບັນດາຫົວໜ່ວຍທຸລະກິດທັງພາຍໃນ ແລະຕ່າງປະເທດ. ແນໃສ່ເປັນສ່ວນໜຶ່ງສ້າງທ່າແຮງຊຸກຍູ້ຜັນຂະຫຍາຍແນວທາງພັດທະນາເສດຖະກິດດິຈິຕອນຂອງພັກໃນອະນາຄົດທາງໜ້າໃຫ້ເປັນຮູບປະທໍາ ແລະປະສົບຜົນສໍາເລັດເປັນຢ່າງສູງ. ສະພາຂາຫຸ້ນ ບໍລິສັດ ລາວໂທລະຄົມມະນາຄົມ ມະຫາຊົນທີ່ລັດຖະບານຖືຫຸ້ນ 51% ແລະນັກລົງທຶນຕ່າງປະເທດ 49% ຕົກລົງສ້າງບໍລິສັດ ລາວ ໂມບາຍມັນນີ ຈໍາກັດຜູ້ດຽວ ເພື່ອເຮັດໜ້າທີ່ການເງິນດິຈິຕອນເທິງມືຖື ດ້ວຍເຄື່ອງໝາຍການຄ້າ M-money ຕາມສະໂລແກນທີ່ວ່າ: ໃຫ້ຊີວິດງ່າຍຂຶ້ນຕາມຍຸກດິຈິຕອນ ດ້ວຍວິໄສທັດ ເປັນຜູ້ນໍາດ້ານການເງິນດິຈິຕອນໃນ ສປປ ລາວ.

ນອກນັ້ນ, ພາຍໃນງານຍັງໄດ້ມີການເຊັນສັນຍາຮ່ວມມືກັນກັບບັນດາຫົວໜ່ວຍທຸລະກິດທີ່ກ່ຽວຂ້ອງໄດ້ແກ່: ບໍລິສັດ ລາວໂທລະຄົມມະນາຄົມ ມະຫາຊົນ, ບໍລິສັດ T Plus ດິຈິຕອນ ຈໍາກັດ, ບໍລິສັດ ETL ຈໍາກັດ, ທະນາຄານການຄ້າຕ່າງປະເທດລາວ ມະຫາຊົນ, ທະນາຄານອຸດສາຫະກໍາ ແລະການຄ້າຈີນ (ICBC) ຈໍາກັດ, ທະນາຄານ ພັດທະນາລາວ: ທະນາຄານ ສົ່ງເສີມກະສິກໍາ, ທະນາຄານ ຮ່ວມພັດທະນາ,​ ທະນາຄານ ຮ່ວມທຸລະກິດ ລາວ-ຫວຽດ, ທະນາຄານ ອິນດູຈີນ ຈໍາກັດ, ທະນາຄານ ເອຊີລີດາ ຈໍາກັດ,​ ທະນາຄານ ມາລູຮານ ເຈແປນລາວ,​ ບໍລິສັດ NCC ຈໍາກັດຜູ້ດຽວ, ບໍລິສັດ ລັດວິສາຫະກິດ ຫວຍພັດທະນາ, ​ບໍລິສັດ ຮຸ່ງອາລຸນ ໂລຈິດສະຕິກ ຈໍາກັດຜູ້ດຽວ ແລະບໍລິສັດ ໂກເທດດີ້ ຈໍາກັດຜູ້ດຽວ.

ແອັບ M-money ມີຄວາມປອດໄພໃນການເຂົ້າໃຊ້ໂດຍການສະແກນລາຍນິ້ວມື ຫຼືສະແກນໃບໜ້າຂອງທ່ານເອງ ແລະມີຟັງຊັ່ນແຈ້ງເຕືອນການໃຊ້ຈ່າຍທຸກຄັ້ງ. ທ່ານສາມາດດາວໂຫລດໄດ້ທັງລະບົບ iOS ແລະ Android ຕັ້ງແຕ່ມື້ນີ້ເປັນຕົ້ນໄປ.   


ທີ່ມາ: Lao Telecom
  • ຮູບພາບ

  • ແທັກທີ່ກ່ຽວຂ້ອງ