• ພະແນກໂຍທາທິການ ແລະ ຂົນສົ່ງ ຈຳປາສັກ ຍັງຈະສືບຕໍ່ເຜີຍແຜ່ວຽກຕ້ານໂຄວິດ-19

ໂດຍ: ສີເປື້ອນມື 09 ກໍລະກົດ 2020 (14.09 ນ.) Read : 441

ປັດຈຸບັນ ວຽກງານໂຍທາທິການ ແລະ ຂົນສົ່ງ ແຂວງຈຳປາສັກ ຈະໄດ້ເປີດໃຫ້ບໍລິການທັງທາງບົກ, ທາງນ້ຳ ແລະ ທາງອາກາດ, ແຕ່ພະແນກກໍຍັງຈະໄດ້ສືບຕໍ່ປະຕິບັດວຽກງານໂຄສະນາເຜີຍແຜ່ ເຖິງການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ໂດຍຜ່ານການຕິດສະຕິກເກີ ແລະ ໂປດສະເຕີ ຕາມສະຖານີຂົນສົ່ງຕ່າງໆ.
ທ່ານ ສະແຫວງ ພູນສະຫວັດ ຮອງຫົວໜ້າພະແນກໂຍທາທິການ ແລະ ຂົນສົ່ງ ແຂວງຈຳປາສັກ ໄດ້ລາຍງານໃຫ້ຮູ້ ໃນວັນທີ 8 ກໍລະກົດ 2020 ທີ່ແຂວງຈໍາປາສັກ ນີ້ວ່າ: ພາຍຫລັງທີ່ລັດຖະບານ ເຫັນດີໃຫ້ປະຕິບັດມາດຕະການຜ່ອນຜັນຈຳນວນໜຶ່ງ ເພື່ອໃຫ້ມີຜົນກະທົບຕໍ່ເສດຖະກິດ-ສັງຄົມໜ້ອຍທີ່ສຸດ, ເຊີ່ງກະຊວງໂຍທາທິການ ແລະ ຂົນສົ່ງ ກໍໄດ້ອອກໜັງສືຄຳແນະນຳ ສຳລັບບໍລິການຂົນສົ່ງໂດຍສານທາງພາຍໃນ ແຂວງ ແລະ ຕ່າງແຂວງ. ດັ່ງນັ້ນ, ພະແນກໂຍທາທິການ ແລະ ຂົນສົ່ງແມ່ນໄດ້ປະຕິບັດຕາມ ໂດຍະເພາະ ການບໍລິການຂົນສົ່ງທາງບົກ, ທາງນ້ຳ ແລະ ທາງອາກາດ, ໄປຄຽງຄູ່ກັບການປະຕິບັດບັນດາມາດຕະການປ້ອງກັນ, ຄວບຄຸມ ແລະ ແກ້ໄຂພະຍາດໂຄວິດ, ເຊິ່ງໃນນີ້ ກໍລວມມີການຂ້າເຊື້ອພາຍໃນສະຖານີ ທຸກໆວັນ, ການວັດແທກອຸນຫະພູມ, ການຮັກສາໄລຍະຫ່າງ, ມີບ່ອນລ້າງມື ແລະ ມີບັນຊີຕິດຕາມຜູ້ໂດສານຂອງແຕ່ລະຄັນລົດ, ເຊິ່ງປັດຈຸບັນ ວຽກບໍລິການຂົສົ່ງແມ່ນກັບມາເປັນປົກກະຕິແລ້ວ.
ທ່ານ ສະແຫວງ ພູນສະຫວັດ ຍັງໃຫ້ຮູ້ຕື່ມວ່າ: ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ 19 ໂດຍສະເພາະ ໃນຂົງເຂດຂອງໂຍທາ ແມ່ນຈະສືບຕໍ່ເຜີຍແຜ່ໂຄສະນາການປ້ອງກັນ ດ້ວຍການຕິດສະຕິກເກີ ແລະ ໂປດສະເຕີ ຢູ່ະຖານີລົດ, ຄີວລົດໂດຍສານ, ຜູ້ປະກອບການແລ່ນລົດໂດຍສານ ເພື່ອຕິດໃສ່ລົດໂດຍສານ, ໄປຄຽງຄູ່ກັບການສືບຕໍ່ເອົາໃຈໃສ່ ໃນການຈັດຕັ້ງປະຕິບັດບັນດາຄຳສັ່ງ, ແຈ້ງການ ແລະ ບົດແນະນຳຕ່າງໆຂອງຂັ້ນເທິງໃນການປ້ອງກັນ ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ຢ່າງເຂັ້ມງວດ.

ທີ່ມາ: ປະເທດລາວ Pathedlao
  • ແທັກທີ່ກ່ຽວຂ້ອງ