• ລາວສະກາຍເວ ປະຕິບັດມາດຕະການປ້ອງກັນໂຄວິດ-19 ເຂັ້ມງວດ

ໂດຍ: ສີເປື້ອນມື 09 ກໍລະກົດ 2020 (14.05 ນ.) Read : 820

ບໍລິສັດ ລາວເດີນອາກາດ (ສະກາຍເວSkyWay), ໄດ້ສືບຕໍ່ປະຕິບັດ ບັນດາມາດຕະການປ້ອງກັນພະຍາດອັກເສບປອດຈາກເຊື້ອຈຸລາໂລກສາຍພັນໃໝ່ COVID-19 ຢ່າງເຂັ້ມງວດ, ພາຍຫລັງໄດ້ກັບມາເປີດໃຫ້ບໍລິການ ທຸກເສັ້ນບິນພາຍໃນ 7 ແຂວງ ທົ່ວປະເທດ. ຂະນະດຽວກັນກໍໄດ້ຈັບມືກັບຫົວໜ່ວຍທຸລະກິດທ່ອງທ່ຽວ ໃນຫລາຍແຂວງ ເພື່ອສົ່ງເສີມການທ່ອງທ່ຽວໃນປະເທດ ໃຫ້ມີບັນຍາກາດຟົດຟື້ນ.
ທ່ານ ສີວຽງທອງ ກອນນິວົງ ອໍານວຍການໃຫຍ່ບໍລິສັດ ລາວເດີນອາກາດ ໄດ້ໃຫ້ສໍາພາດ ໃນວັນທີ 8 ກໍລະກົດ 2020 ນີ້ວ່າ: ນັບແຕ່ເກີດການລະບາດຂອງພະຍາດໂຄວິດ-19 ແຕ່ທ້າຍປີ 2019 ມານີ້ ໄດ້ສົ່ງຜົນກະທົບຕໍ່ການດໍາເນີນທຸລະກິດ ຂອງບໍລິສັດຫລາຍສົມຄວນ, ເນື່ອງຈາກບໍລິສັດ ໄດ້ຢຸດໃຫ້ບໍລິການຊົ່ວຄາວໃນທຸກຖ້ຽວບິນ ນັບແຕ່ທ້າຍເດືອນເມສາ 2020. ຈົນມາຮອດທ້າຍເດືອນພຶດສະພາ 2020 ຈຶ່ງໄດ້ເລີ່ມກັບມາເປີດໃຫ້ບໍລິການຄືນ ໃນເສັ້ນທາງບິນຕ່າງໆ ໃນ 7 ແຂວງພາຍໃນປະເທດ, ໂດຍບໍລິສັດໄດ້ສືບຕໍ່ເອົາໃຈໃສ່ປະຕິບັດມາດຕະການຕ່າງໆ ຕາມການແນະນໍາຂອງກົມການບິນພົນລະເຮືອນ ກະຊວງໂຍທາທິການ ແລະ ຂົນສົ່ງ ກໍຄື ມາດຕະການຂອງສາກົນ ກໍານົດອອກຢ່າງເຂັ້ມງວດ ເຊັ່ນ: ຜູ້ໂດຍສານທີ່ເປັນຄົນຕ່າງປະເທດ ທີ່ຈະຊື້ປີ້ຍົນຕ້ອງໃຫ້ມີປະຫວັດການພັກເຊົາຢູ່ ສປປ ລາວ ຫລາຍກວ່າ 20 ມື້, ສ່ວນຄົນລາວ ແມ່ນສາມາດຊື້ປີ້ຍົນໄດ້ຕາມປົກກະຕິ ແລະ ກ່ອນຂຶ້ນຍົນຜູ້ໂດຍສານຕ້ອງຜ່ານການກວດວັດແທກອຸນຫະພູມຮ່າງກາຍ ບໍ່ໃຫ້ເກີນ 37 ອົງສາ, ລ້າງມືດ້ວຍນໍ້າຢາຂ້າເຊື້ອ ແລະ ໃສ່ຜ້າອັດປາກ-ດັງ ທຸກຄົນ. ນອກນີ້, ກໍໄດ້ພົ່ນຢາຂ້າເຊື້ອພາຍໃນຍົນທຸກຄັ້ງ ຫລັງຈາກທີ່ບິນກັບມາໃນແຕ່ລະຖ້ຽວ ເພື່ອໃຫ້ຮັບປະກັນຄວາມປອດໄພ ຈາກພະຍາດໂຄວິດ-19.
ທ່ານ ສີວຽງທອງ ກອນນິວົງ ກ່າວຕື່ມວ່າ: ການບໍລິການຂອງລາວສະກາຍເວ ພວກເຮົານີ້ຫລາຍກວ່າ 60% ແມ່ນຮູບແບບບໍລິການເຊົ່າເໝົາລໍາ. ນອກຈາກນີ້, ບໍລິສັດຍັງມີກິດຈະການໂຮງແຮມ ຢູ່ນະຄອນຫລວງວຽງຈັນ ແລະ ແຂວງຊຽງຂວາງ ເພື່ອຮອງຮັບການຂະຫຍາຍຕົວຂອງການທ່ອງທ່ຽວຢູ່ປະເທດເຮົາ. ພ້ອມນີ້, ຍັງໄດ້ຮ່ວມມືກັບບໍລິສັດທ່ອງທ່ຽວ, ຜູ້ປະກອບການໂຮງແຮມ ແລະ ບັນດາແຫລ່ງທ່ອງທ່ຽວຕ່າງໆໃນ 4 ແຂວງ ເພື່ອສ້າງລາຍການທ່ອງທ່ຽວໃນຮູບແບບໃໝ່ ທີ່ມີຄວາມສະດວກ ແລະ ຄຸ້ມຄ່າສໍາລັບລູກຄ້າທີ່ເດີນທາງດ້ວຍສາຍການບິນສະກາຍເວ ແລະອັນສໍາຄັນແມ່ນພວກເຮົາຈະສືບຕໍ່ພັດທະນາ ທຸລະກິດໃຫ້ບັນລຸວິໄສທັດທີ່ກໍານົດໄວ້ ຄື: ດໍາເນີນທຸລະກິດໃຫ້ຖືກຕາມລະບຽບກົດໝາຍ, ມີປະສິດ ທິພາບ, ສ້າງລາຍຮັບໃຫ້ລັດ ແລະ ຫັນການຄຸ້ມຄອງທຸລະກິດໃຫ້ທັນສະໄໝເທື່ອລະກ້າວ ເພື່ອແນໃສ່ຕອບສະໜອງການບໍລິການທີ່ດີ ແລະ ມີລາຄາເໝາະສົມຕາມຄໍາຂວັນທີວ່າ: ສະກາຍເວ ຢາກໃຫ້ທຸກຄົນໄດ້ບິນ.

ທີ່ມາ: ປະເທດລາວ Pathedlao
  • ແທັກທີ່ກ່ຽວຂ້ອງ