• ຖວທ ເຜີຍແຜ່ ວິທີວິທະຍາ ໃນການຄົ້ນຄວ້າແນວຄິດ ໄກສອນ ພົມວິຫານ

ໂດຍ: ສີເປື້ອນມື 19 ມິຖຸນາ 2020 (13.38 ນ.) Read : 2,236

ໃນວັນທີ 19 ມິຖຸນາ 2020 ນີ້, ກະຊວງຖະແຫລງຂ່າວ, ວັດທະນະທໍາ ແລະ ທ່ອງ ທ່ຽວ (ຖວທ) ໄດ້ຈັດຊຸດຝຶກອົບຮົມໃນຫົວຂໍ້ “ວິທີວິທະຍາໃນການຄົ້ນຄວ້າແນວຄິດໄກສອນ ພົມວິຫານ” ໂດຍມີ ທ່ານ ບົວເງິນ ຊາພູວົງ ຮອງລັດຖະມົນຕີກະຊວງ ຖວທ, ພ້ອມດ້ວຍ ສະມາຊິກພັກ ແລະ ພະນັກງານ-ລັດຖະກອນ ອ້ອມຂ້າງກະຊວງ ຖວທ ເຂົ້າຮ່ວມ.
ການຈັດຊຸດຝຶກອົບຮົມ ໃນຄັ້ງນີ້, ແນໃສ່ເພີ່ມຄວາມຮັບຮູ້ ໃຫ້ແກ່ສະມາຊິກພັກ, ພະນັກງານ-ລັດຖະກອນ ອ້ອມຂ້າງກະຊວງ ຖວທ ໄດ້ຮັບຮູ້ ແລະ ເຂົ້າໃຈກ່ຽວກັບວິທີວິທະຍາ ໃນການຄົ້ນຄວ້າ, ເກັບກຳ ແນວຄິດ ໄກສອນ ພົມວິຫານ ທີ່ພົວພັນເຖິງຂະ ແໜງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແຕ່ອະດີດຈົນເຖິງປັດຈຸບັນ, ເຊິ່ງໄດ້ຮັບຟັງການເຜີຍແຜ່ ບາງບັນຫາວິທີຄົ້ນຄ້ວາກ່ຽວກັບ ປະທານ ໄກສອນ ພົມວິຫານ ເປັນຕົ້ນ ບັນຫາທີ່ມີລັກສະນະເປັນຫລັກການໃນການຄົ້ນຄ້ວາ, ວິທີວິທະຍາໃນການຄົ້ນຄ້ວາ, ວິທີວິທະຍາຕົ້ນຕໍໃນການຄົ້ນຄ້ວາ, ວິທີໄຈ້ແຍກ, ສົມທຽບ, ວິທີສຳເນົາ, ຂຸດຄົ້ນແຫລ່ງຂໍ້ມູນ, ວິທີການຄົ້ນຄວ້າເອກະສານ, ບາດກ້າວ, ຂັ້ນຕອນ ດຳເນີນການຄົ້ນຄວ້າ, ວິທີການເກັບກໍາເອກະສານໃນການຄົ້ນຄວ້າແນວຄິດ ໄກສອນ ພົມວິຫານ ແລະ ອື່ນໆ.
ທ່ານ ດາວສະຫວັນ ເຄືອມີໄຊ ຮັກສາການຫົວໜ້າສູນຄົ້ນຄວ້າ ແນວຄິດໄກສອນ ພົມວິຫານ, ສະຖາບັນການເມືອງ ແລະ ການປົກຄອງແຫ່ງຊາດ ໄດ້ໃຫ້ຮູ້ວ່າ: ການຄົ້ນຄວ້າກ່ຽວກັບ ປະທານ ໄກສອນ ພົມວິຫານ ແມ່ນມີຄວາມຈຳເປັນ ແລະ ສຳຄັນທີ່ສຸດ, ເວລາໃດກໍເປັນກຽດສັກສີ ແລະ ຄວາມຮັບຜິດຊອບອັນໃຫຍ່ຫລວງ ຂອງວົງການຄົ້ນຄວ້າ ແລະ ເປັນວຽກງານທີ່ມີລັກສະນະປະຫວັດສາດ, ທັງມີຄວາມໝາຍການເມືອງເລິກເຊິ່ງ, ການຄົ້ນຄວ້າກ່ຽວກັບປະທານ ໄກສອນ ພົມວິຫານ ແມ່ນພາກ ສ່ວນໜຶ່ງທີ່ຂາດບໍ່ໄດ້ ຂອງການຄົ້ນຄວ້າປະຫວັດສາດພັກ ແລະ ປະຫວັດສາດການປະຕິວັດລາວ, ທັງຈະຊ່ວຍສ້າງຄວາມອຸດົມສົມບູນ, ຄວາມກະຈ່າງແຈ້ງໃນຫລາຍບັນຫາສຳຄັນ ຂອງປະຫວັດສາດພັກ ແລະ ປະຫວັດການປະຕິວັດລາວ, ການຄົ້ນຄວ້າກ່ຽວກັບ ປະທານ ໄກສອນ ພົມວິຫານ ໃນຫລາຍປີຜ່ານມາ ໄດ້ມີຜົນສຳເລັດໃນບາດກ້າວເລີ່ມຕົ້ນ ແລະ ສາມາດກັບກຳໄດ້ບັນດາບົດຮຽນອັນປະເສີດ ກ່ຽວກັບວິທີວິທະຍາ ແລະ ວິທີການຄົ້ນຄວ້າ.

ທີ່ມາ: ປະເທດລາວ Pathedlao
  • ຮູບພາບ

  • ແທັກທີ່ກ່ຽວຂ້ອງ