• ລັດຖະບານ ເນັ້ນຕ້ອງຮັບປະກັນໃຫ້ເດັກທຸກຄົນກັບຄືນໄປໂຮງຮຽນຢ່າງປອດໄພ

ໂດຍ: ສີເປື້ອນມື 05 ມິຖຸນາ 2020 (11.55 ນ.) Read : 345

ປັດຈຸບັນນີ້, ລັດຖະບານ ແຫ່ງ ສປປ ລາວ ກຳລັງເຮັດວຽກຮ່ວມກັບ ອົງການອຸຍນີເຊັບ ປະຈຳ ສປປ ລາວ ເພື່ອຮັບປະກັນໃຫ້ເດັກທຸກຄົນໃນ ສປປ ລາວ ໄດ້ກັບຄືນໄປໂຮງຮຽນຢ່າງປອດໄພ ຈາກພະຍາດໂຄວິດ-19 ພາຍຫລັງທີ່ລັດຖະບານໄດ້ອະນຸຍາດໃຫ້ເປີດໂຮງຮຽນຄືນໃໝ່ໃນວັນທີ 2 ມິຖຸນາ 2020 ແລະ ມາໃນວັນທີ 5 ມິຖຸນາ 2020 ນີ້, ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ຮ່ວມກັບກະຊວງສຶກສາທິການ ແລະ ກິລາ ແລະ ອົງການອຸຍນີເຊັບ ໄດ້ຈັດກອງປະຊຸມການມີສ່ວນຮ່ວມຂອງສື່ມວນຊົນໃນການໂຄສະນາ “ກັບເຂົ້າໂຮງຮຽນຢ່າງປອດໄພ” ເພື່ອໃຫ້ຂໍ້ມູນແກ່ສື່ມວນຊົນກ່ຽວກັບນະໂຍບາຍຂອງລັດຖະບານ ດ້ານວຽກງານສຶກສາໃນໄລຍະທີ່ມີການລະບາດຂອງພະຍາດໂຄວິດ-19 ແລະ ໂຄສະນາ “ປອດໄພກັບໄປໂຮງຮຽນ”.
ພ້ອມກັນນັ້ນ ກໍເພື່ອເປັນການໃຫ້ຂໍ້ມູນສື່ມວນຊົນ ກ່ຽວກັບການຊ່ວຍເຫລືອດ້ານສຸຂະພາບຈິດ ແລະ ການສະໜັບສະໜູນດ້ານຈິດໃຈ ແກ່ເດັກ ແລະ ນັກຮຽນ, ຄູອາຈານ ແລະ ພະນັກງານສຶກສາ ພ້ອມທັງພໍ່ແມ່ ແລະ ຜູ້ດູແລເດັກ, ທັງເປັນການປຸກລະດົມການມີສ່ວນຮ່ວມຂອງສື່ມວນຊົນໃນການສົ່ງເສີມການໂຄສະນາ “ປອດໄພກັບໄປໂຮງຮຽນ” ແລະ ຮັບປະກັນການເຂົ້າເຖິງການສະໜັບສະໜູນດ້ານຈິດໃຈແກ່ປວງຊົນຕາມຄວາມຈຳເປັນ.
ໂອກາດນີ້, ທ່ານ ສະຫວັນຄອນ ລາຊະມຸນຕີ ຮອງລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ກ່າວວ່າ: ສື່ມວນຊົນເຮົາໄດ້ເຮັດບົດບາດຂອງຕົນ ໂດຍຮ່ວມແຮງຮ່ວມໃຈກັນປະຕິບັດໜ້າທີ່ການໂຄສະນາຕິດຕາມສະພາບການການລະບາດຂອງພະຍາດໂຄວິດ ທັງພາຍໃນ ແລະ ຕ່າງປະເທດ, ຕິດຕາມ ແລະ ເຄື່ອນໄຫວເອົາຂ່າວທຸກເຫດການ, ກິດຈະກຳຕ່າງໆຂອງຄະນະສະເພາະກິດ ເພື່ອໂຄສະນາແນະນຳວິທີປ້ອງກັນພະຍາດອອກທຸກຊ່ອງທາງຄື: ສື່ໂທລະພາບ, ວິທະຍຸ, ໜັງສືພິມ, ສື່ອອນລາຍ ແລະ ໂທລະໂຄ່ງປະຈຳບ້ານ ເພື່ອໃຫ້ພໍ່ແມ່ປະຊາຊົນບັນດາເຜົ່າຮັບຮູ້ເຖິງຜົນອັນຕະລາຍຂອງພະຍາດດັ່ງກ່າວ ແລະ ຮູ້ເຖິງວິທີປ້ອງກັນຕົນເອງ ແລະ ຄວບຄົວ ຈາກພະຍາດໂຄວິດ-19.
ພ້ອມກັນນີ້, ທ່ານຮອງລັດຖະມົນຕີ ຍັງໄດ້ເນັ້ນໜັກວ່າ ໃນໄລະການກັບເຂົ້າໂຮງຮຽນນີ້ ຂໍໃຫ້ບັນດາສື່ມວນຊົນທຸກຂົງເຂດ ຈົ່ງນຳເອົາຂໍ້ມູນຂ່າວສານທີ່ໄດ້ຮັບໃນມື້ນີ້ໄປເຜີຍແຜ່ອອກທຸກຊ່ອງທາງຂອງສື່ ແລະ ສືບຕໍ່ໂຄສະນາເຜີຍແຜ່ຂໍ້ມູນຂ່າວສານທີ່ເປັນປະໂຫຍດແກ່ພໍ່ແມ່ປະຊາຊົນບັນດາເຜົ່າ ແລະ ນັກຮຽນນັກສຶກສາຕະຫລອດເຖິງເດັກນ້ອຍໃຫ້ຮັບຮູ້ ແລະ ເອົາໄປປະຕິບັດ.
ກອງປະຊຸມການມີສ່ວນຮ່ວມຂອງສື່ມວນຊົນໃນມື້ນີ້ ແມ່ນເນັ້ນໜັກການໃຫ້ຂໍ້ມູນຂ່າວສານແກ່ສື່ມວນຊົນ ດ້ານມາດຕະການຄວາມປອດໄພຕ່າງໆ ຕໍ່ການເປີດເຂົ້າຮຽນຄືນຂອງນັກຮຽນ, ນັກສຶກສາ ແລະ ເດັກກ່ອນໄວຮຽນ ອີງຕາມຄຳແນະນຳກ່ຽວກັບການປະຕິບັດງານຂອງໂຮງຮຽນປອດໄພໃນທົ່ວໂລກ, ເຊິ່ງໄດ້ດັດແກ້ໃຫ້ເຂົ້າກັບສະພາບການຂອງ ສປປ ລາວ.
ຂ່າວ: ສິງຄຳ

ທີ່ມາ: ປະເທດລາວ Pathedlao
  • ຮູບພາບ

  • ແທັກທີ່ກ່ຽວຂ້ອງ