• ອຸດົມໄຊ ຈັດກິດຈະກຳປູກຕົ້ນໄມ້ 850 ຕົ້ນ ໃນໂອກາດວັນປູກຕົ້ນໄມ້ແຫ່ງຊາດ

ໂດຍ: ສີເປື້ອນມື 02 ມິຖຸນາ 2020 (11.36 ນ.) Read : 191

ວັນທີ 1 ມິຖຸນາ 2020 ຢູ່ສຸສານນັກຮົບປະຕິວັດແຂວງອຸດົມໄຊ ໄດ້ມີພິທີປູກຕົ້ນໄມ້ ໃນໂອກາດວັນປູດຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ ຈຳນວນ850 ຕົ້ນ, ໃນນີ້ ມີຕົ້ນໄມ້ຝາງແດງ 50 ຕົ້ນ, ເບ້ຍໄມ້ດູ່ລາຍ 300 ຕົ້ນ ແລະ ໄມ້ແຕ້ຄ່າ 500 ຕົ້ນ ໂດຍມີທ່ານ ຄຳພັນ ເຜີຍຍະວົງ ເຈົ້າແຂວງອຸດົມໄຊ, ມີຄະນະພັກຄະນະບັນຊາການທະຫານ-ຕຳຫລວດ, ຄະນະພັກອົງການປົກຄອງແຂວງ, ພະນັກງານທະຫານ, ຕໍາຫລວດ, ອົງການປົກຄອງບ້ານ ຕະຫລອກຮອດ ພໍ່ແມ່ປະຊາຊົນ ແລະ ນ້ອງນ້ອຍເຍົາວະຊົນເຂົ້າຮ່ວມ.
ກິດຈະກຳດັ່ງກ່າວຈັດຂຶ້ນ ເພື່ອເປັນການປູກຝັງຈິດສຳນຶກ ແລະ ສ້າງສະຕິຊາດ ຮ່ວມກັນຢ່າງເປັນຂະບວນ, ໃຫ້ທຸກຊັ້ນຄົນໃນສັງຄົມຮັບຮູ້ເຖິງຄວາມສຳຄັນ ຂອງວັນປູກຕົ້ນໄມ້ແຫ່ງຊາດ ເຊິ່ງເປັນວັນດຽວກັນກັບວັນເດັກນ້ອຍສາກົນ ທັງເປັນການເປີດລະດູການປູກໄມ້ປະຈຳປີ 2020 ແລະ ເປັນການປົກປັກຮັກສາປ່າໄມ້ ປົກປັກຮັກສາທາງດ້ານສິ່ງແວດລ້ອມ ແລະ ຄືນຄວາມອຸດົມສົມບູນ ໃຫ້ແກ່ທຳມະຊາດ.
ທ່ານ ຄຳພອນ ມຸນລະໄມ ຫົວໜ້າພະແນກກະສິກຳ ປ່າໄມ້ ແລະ ພັດທະນາຊົນນະບົດ ແຂວງອຸດົມໄຊ ໄດ້ໃຫ້ຮູ້ວ່າ: ການປູກຕົ້ນໄມ້ແມ່ນມີຄວາມໝາຍສຳຄັນຢ່າງຍິງ ເພື່ອເຮັດປວງຊົນທຸກຊັ້ນຄົນຮັບຮູ້ ເຂົ້າໃຈ ກ່ຽວກັບຄວາມໝາຍ ຄວາມສຳຄັນຂອງການປູກໄມ້ ພ້ອມທັງໄດ້ຮຽກຮ້ອງມາທົ່ວສັງຄົມ ໃຫ້ມີນ້ຳໃຈປົກປັກຮັກສາປ່າໄມ້, ສ້າງຂະບວນການໃນການຄຸ້ມຄອງ ປັກປັກຮັກສາຊັບພະຍາກອນປ່າໄມ້ ອັນເປັນມໍລະດົກຂອງຊາດ ໃຫ້ມີຄວາມອຸດົມສົມບູນ ແລະ ສາມາດຕອບສະໜອງຄວາມຮຽກຮ້ອງຕ້ອງການ ວັດຖຸດິບດ້ານໄມ້ ແລະ ຜະລິດຕະພັນປ່າໄມ້ ໄດ້ຢ່າງຍືນນານ ພ້ອມກັນປູກຕົ້ນໄມ້ໃສ່ພື້ນທີ່ຂອງຕົນຕາມເງື່ອນໄຂ ເພື່ອໃຫ້ບັນລຸຄາດໝາຍສູ້ຊົນຂອງແຂວງໃນປີ 2020 ປູກໄມ້ໃຫ້ໄດ້ໃນເນື້ອທີ່ 256 ເຮັກຕາ ແລະ ຟື້ນຟູປ່າໄມ້ທຳມະຊາດໃຫ້ໄດ້ 3.000 ກວ່າເຮັກຕາ ເຮັດໃຫ້ຊັບພະຍາກອນປ່າໄມ້ ກາຍເປັນສ່ວນປະກອບອັນສຳຄັນໃນການພັດທະນາເສດຖະກິດຂອງຊາດ ກໍຄື ຂອງແຂວງອຸດົມໄຊ.
ຂ່າວ: ສີຈັນ ເກດວົງສາ

ທີ່ມາ: ປະເທດລາວ Pathedlao
  • ຮູບພາບ

  • ແທັກທີ່ກ່ຽວຂ້ອງ