• ມອບ-ໂອນ ການຄຸ້ມຄອງນາຍ ແລະພົນທະຫານ-ຕຳຫລວດ ທີ່ໄດ້ຮັບນະໂຍບາຍອຸດໜູນບຳນານ

ໂດຍ: ສີເປື້ອນມື 29 ພຶດສະພາ 2020 (12.01 ນ.) Read : 462

ພະແນກແຮງງານ ແລະ ສະຫວັດດີການສັງຄົມ (ຮສສ) ນະຄອນຫລວງວຽງຈັນ, ຈັດພິທີມອບ-ໂອນ ການຄຸ້ມຄອງ ນາຍ ແລະ ພົນຕຳຫລວດ, ນາຍ ແລະ ພົນທະຫານ ທີ່ໄດ້ຮັບນະໂຍບາຍອຸດໜູນບຳນານ ເສຍອົງຄະຍ້ອນການສູ້ຮົບ ແລະ ຮັບໃຊ້ການສູ້ຮົບ ຢູ່ພະແນກ ຮສສ ນະຄອນຫລວງວຽງຈັນ ຄືນໃຫ້ກອງບັນຊາການປ້ອງກັນຄວາມສະຫງົບ ແລະ ກອງບັນຊາການທະຫານນະຄອນຫລວງວຽງຈັນ ໃນວັນທີ 29 ພຶດສະພາ 2020 ນີ້, ໂດຍມີ ທ່ານ ນາງ ລຳພອຍ ສີອັກຄະຈັນ ຫົວໜ້າພະແນກ ຮສສ ນະຄອນຫລວງວຽງຈັນ, ທ່ານ ພົນຈັດຕະວາ ສີພອນ ຈັນສົມວົງ ຫົວໜ້າການເມືອງ ກອງບັນຊາການທະຫານ ນະຄອນຫລວງວຽງຈັນ ແລະ ພາກສ່ວນກ່ຽວຂ້ອງເຂົ້າຮ່ວມ.
ໂອກາດນີ້, ທ່ານ ສົມຫວັງ ອິນທະວົງ ຫົວໜ້າສູນບໍລິການກອງທຶນປະກັນສັງຄົມ ນະຄອນຫລວງວຽງຈັນ ແຈ້ງໃຫ້ຮູ້ວ່າ: ທົ່ວນະຄອນຫລວງວຽງຈັນ ມີພະນັກງານອາວຸໂສບຳບານທັງໝົດ 6.500 ກວ່າຄົນ, ຍິງເກືອບ 3.000 ຄົນ, ໃນນັ້ນ ພະນັກງານບຳນານຝ່າຍຕຳຫລວດມີ 860 ກວ່າຄົນ, ຍິງ 320 ກວ່າຄົນ ແລະ ຝ່າຍທະຫານ 2.800 ກວ່າຄົນ, ຍິງ 1.000 ກວ່າຄົນ, ເຊິ່ງໄລຍະຜ່ານມາ ພະແນກແຮງງານ ແລະ ສະຫວັດດີການສັງຄົມນະຄອນຫລວງວຽງຈັນ ກໍໄດ້ເອົາໃຈໃສ່ໃນການຄຸ້ມຄອງ ແລະ ປະຕິບັດບັນ ດານະໂຍບາຍຕ່າງໆ ຕາມລະບຽບກົດໝາຍ. ພ້ອມນີ້, ຍັງໄດ້ເອົາໃຈໃສ່ໃນການເຊີນເອົາພະນັກງານອາວຸໂສບຳນານເຂົ້າຮ່ວມງານພົບປະສ້າງສັນ ແລກປ່ຽນຄວາມຄິດຄວາມເຫັນ ໃນວັນສຳຄັນຕ່າງໆຂອງຊາດ ແລະ ເຊີນເຂົ້າຮ່ວມກອງປະຊຸມ ເພື່ອແລກປ່ຽນບົດຮຽນເຊິ່ງກັນ ແລະ ກັນ ກັບພະນັກງານບຳນານຢູ່ຕ່າງແຂວງ ແລະ ອື່ນໆ.
ຂ່າວ: ຈັນທະລອນ

ທີ່ມາ: ປະເທດລາວ Pathedlao
  • ແທັກທີ່ກ່ຽວຂ້ອງ