• ທູດຍີ່ປຸ່ນ ປະຈຳລາວ ເຂົ້າພົບປະລັດຖະມົນຕີ ກະຊວງຍຸຕິທຳ

ໂດຍ: ສີເປື້ອນມື 29 ພຶດສະພາ 2020 (11.52 ນ.) Read : 177

ໃນວັນທີ 27 ພຶດສະພາ 2020, ທ່ານ ໄຊສີ ສັນຕິວົງ ລັດຖະມົນຕີ ກະຊວງຍຸຕິທຳ ແລະ ທ່ານ ທາເກວະກະ ເກອິໂຊະ ເອກອັກຄະລັດຖະທູດຍີ່ປຸ່ນ ປະຈຳ ສປປ ລາວ ພ້ອມດ້ວຍ ທ່ານ ໂຢເນຢະມະ ໂຢຊິຮາຣຸ ຜູ້ຕາງໜ້າອົງການໄຈກາປະຈຳລາວ ໄດ້ພົບປະເພື່ອປຶກສາຫາລືຮ່ວມກັນ, ເຊິ່ງເປັນມື້ປະມວນກົດໝາຍແພ່ງ ມີຜົນສັກສິດ ມີທັງໝົດ 630 ມາດຕາ ໂດຍຈະມີຮາກຖານເປັນກົດລະບຽບທີ່ສະໜັບສະໜູນ ການພັດທະນາປະເທດຊາດ ແລະ ເສດຖະກິດ-ສັງຄົມຂອງປະເທດລາວ ແລະ ປະກອບສ່ວນເຂົ້າໃນການປະຕິບັດສິດ ແລະ ຜົນປະໂຫຍດຂອງພົນລະເມືອງ ໃຫ້ປະກົດຜົນເປັນຈິງ.
ປະມວນກົດໝາຍແພ່ງດັ່ງກ່າວ, ແມ່ນໄດ້ຮັບການສະໜັບສະໜູນການຮ່າງ ຈາກອົງການໄຈກາ ຕັ້ງແຕ່ ປີ 2012 ເປັນຕົ້ນມາ ແລະ ໄດ້ຖືກຮັບຮອງຈາກສະພາແຫ່ງຊາດລາວ ໃນເດືອນທັນວາ ປີ 2018 ແລະ ໄດ້ຖືກນໍາໃຊ້ໃຫ້ມີຜົນສັກສິດ ໃນວັນທີ 27 ພຶດສະພາ 2020. ພາຍຫລັງມີຜົນບັງຄັບໃຊ້ ການເຂົ້າເຖິງປະມວນກົດໝາຍແພ່ງຢູ່ໃນສັງຄົມ ແລະ ປະຊາຊົນ ແມ່ນມີຄວາມສຳຄັນຫລາຍເພື່ອປະກອບສ່ວນເຮັດໃຫ້ ສິດຂອງປະຊາຊົນ ຖືກຮັບຮູ້ຢູ່ໃນສັງຄົມ ໄດ້ຢ່າງປະກົດຜົນເປັນຈິງ.
ການພົບປະຄັ້ງນີ້, ທ່ານ ໄຊສີ ສັນຕິວົງ ໄດ້ສະແດງຄວາມຍິນດີຕໍ່ການຊ່ວຍເຫລືອ ຈາກປະ ເທດຍີ່ປຸ່ນ ແລະ ຄາດວ່າຍີ່ປຸ່ນ ຈະສືບຕໍ່ຮ່ວມມື ໃນການເຜີຍແຜ່ປະມວນກົດໝາຍແພ່ງ, ເອກອັກຄະລັດຖະທູດຍີ່ປຸ່ນ ທ່ານ ທາເກວະກະ ໄດ້ຕີລາຄາໃຫ້ຄວາມເໝາະສົມ ທີ່ຜົນບັງຄັບໃຊ້ຂອງປະມວນກົດໝາຍແພ່ງ ເປັນໝາກຜົນຂອງການຮ່ວມມືທັງສອງປະເທດ ຕໍ່ສາຍພົວພັນການຮ່ວມມືທາງການທູດຍີ່ປຸ່ນ-ລາວ ຄົບຮອບ 65 ປີ ແລະ ຫວັງຢ່າງຍິ່ງວ່າ ຈະນໍາໄປສູ່ການພັດທະນາປັບປຸງສະພາບແວດລ້ອມ ທາງດ້ານເສດຖະກິດໃນຕໍ່ໜ້າອີກດ້ວຍ.
ຜູ້ຕາງໜ້າອົງການໄຈກາປະຈຳລາວ ກ່າວວ່າ: ໃນຕໍ່ໜ້າ, ອົງການໄຈກາ ຈະສືບຕໍ່ໃຫ້ການຊ່ວຍເຫລືອເພື່ອເຮັດໃຫ້ນັກກົດໝາຍ ຊຶ່ງເປັນຜູ້ນຳທີ່ເຂົ້າໃຈເຖິງສິດຂອງປະຊາຊົນ ສາມາດນຳໃຊ້ປະ ມວນກົດໝາຍແພ່ງ ໃຫ້ເປັນເຄື່ອງມືໃນການປ້ອງກັນ ແລະ ແກ້ໄຂຂໍ້ຂັດແຍ່ງໄດ້. ທັງນີ້, ກໍເພື່ອໃຫ້ບັນດາສະຖາບັນການສຶກສາ ແລະ ສະຖາບັນຄົ້ນຄວ້າ (ມະຫາວິທະຍາໄລ, ສະຖາບັນຍຸຕິທຳແຫ່ງຊາດ) ສາມາດສຶກສາ ແລະ ສິດສອນປະມວນກົດໝາຍແພ່ງໃຫ້ແກ່ນັກສຶກສາ. ພ້ອມກັນນີ້, ໄຈກາ ຍັງມີແຜນຈະໃຫ້ການຊ່ວຍເຫລືອ ໂດຍສຸມໃສ່ວຽກງານເຜີຍແຜ່ປະມວນກົດໝາຍແພ່ງ ໃຫ້ແກ່ພາກ ສ່ວນດັ່ງກ່າວ ເພື່ອເຜີຍແຜ່ຕໍ່ສາທາລະນະຊົນທົ່ວໄປພ້ອມໆກັນ.

ທີ່ມາ: ປະເທດລາວ Pathedlao
  • ແທັກທີ່ກ່ຽວຂ້ອງ