• ເມືອງທ່າປາງທອງ ສະຫຼຸບການສັກວັກຊິນມະເຮັງປາກມົດລູກ

ໂດຍ: ສີເປື້ອນມື 27 ພຶດສະພາ 2020 (17.36 ນ.) Read : 174

ໃນຕອນເຊົ້າຂອງວັນທີ 27 ພຶດສະພາ 2020 ນີ້, ຢູ່ທີ່ຫ້ອງປະຊຸມຫ້ອງການສຶກສາທິການ ແລະ ກິລາ ເມືອງທ່າປາງທອງ ໄດ້ມີການສະຫຼຸບຖອດຖອນບົດຮຽນ ການສັກວັກຊິນກັນມະເຮັງປາກໝົດລູກ, ໂດຍການເຂົ້າຮ່ວມຂອງທ່ານ ວັນໄຊ ຕະວິນຍານ ຫົວໜ້າກົມນິຕິກຳ, ຄະນະກຳມະການສົ່ງເສີມຄວາມກ້າວໜ້າຂອງແມ່ຍິງແມ່ ແລະ ເດັກ, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ພ້ອມດ້ວຍຄະນະສູນການແພດ ແມ່ ແລະ ເດັກ ກະຊວງສາທາລະນະສຸກ ພະນັກງານແພດໝໍ ພ້ອມພາກສ່ວນທີ່ກ່ຽວຂ້ອງຫ້ອງການສາທາລະນະສຸກເມືອງ, ຫ້ອງການຖະແຫຼງຂ່າວ ວັດທະນະທຳ ແລະ ທ່ອງທ່ຽວເມືອງ, ຫ້ອງການສຶກສາທິການ ແລະ ກິລາເມືອງ ເຂົ້າຮ່ວມ.
ໂອກາດນີ້ ທ່ານ ບົວລະວົງ ສອນວິໄລ ຫົວໜ້າສັກຢາກັນພະຍາດເມືອງ ກໍໄດ້ຕາງໜ້າໃຫ້ຫ້ອງການສາທາລະນະສຸກໄດ້ລາຍງານກ່ຽວກັບການສັກວັກຊິນກັນມະເຮັງປາກມົດລູກ ໃຫ້ກັບເດັກຍິງໃນເກນອາຍຸ 10-14 ປີ ເຊິ່ງໃນທົ່ວເມືອງທ່າປາງທອງ ເພື່ອເປັນການໃຫ້ວັກຊິນມະເຮັງປາກມົດລູກປົກປ້ອງແກ່ເດັກຍິງ, ເພື່ອສ້າງພູມຄຸ້ມກັນຕໍ່ໄວຣັດ HPV ດີ ທີ່ສຸດກ່ອນອາຍຸ 15 ປີ ເຊິ່ງໃນທົ່ວເມືອງມີເປົ້າຫມາຍທີ່ຈະໄດ້ຮັບການສັກວັກຊິນທັງໝົດ 2.222 ຄົນ ທີ່ຈະໄດ້ໃຫ້ການບໍລິການຢູ່ໃນ 8 ສຸກສາລາທົ່ວເມືອງຄື: ສຸກສາລາຫ້ວຍໝື່ນມີ 237 ຄົນ, ສຸກສາລາພູມມະລີມີ 224 ຄົນ, ສຸກສາລາເຊກືມີ 260 ຄົນ, ສຸກສາລາກະທອງເໜືອ 240 ຄົນ, ສຸກສາລາເຊປ໋ອງມີ 198 ຄົນ, ສຸກສາລາທ່າພີ່ມີ 312 ຄົນ, ສຸກສາລາກະທອງໃຕ້ມີ 220 ຄົນ, ສຸກສາລາໂນນສະຫວ່າງມີ 153 ຄົນ. ນອກນນີ້ຍັງມີເຂດບໍລິການໂຮງໝໍເມືອງຈຳນວນ 2 ກຸ່ມບ້ານຄື: ກຸ່ມບ້ານໂນນຈານ 233 ຄົນ ແລະ ກຸ່ມບ້ານໜອງກັນ 145 ຄົນ, ມາຮອດປະຈຸບັນໄດ້ຮັບການສັກວັກຊິນໄດ້ທັງໝົດ 1,256 ຄົນ ເທົ່າກັບ 56,52% ຂອງເປົ້າໝາຍທັງໝົດ ໃນນີ້ ມີນັກຮຽນໃນເກນອາຍຸມີ 836 ຄົນ ແລະ ຢູ່ ບ້ານມີ 420 ຄົນ.
ຈາກນັ້ນ ບັນດາທ່ານທີ່ເຂົ້າຮ່ວມກອງປະຊຸມຍັງໄດ້ມີຄຳເຫັນແລກປ່ຽນ ຖອດຖອນບົດຮຽນ ຢ່າງກົງໄປກົງມາໃນການຈັດຕັ້ງປະຕິບັດວຽກງານ ການເຄື່ອນໄຫວການສັກວັກຊິນກັນມະເຮັງປາກມົດລູກ ໃຫ້ກັບບັນດາກຸ່ມເປົ້າໝາຍໃນທົ່ວເມືອງ ໃຫ້ໄດ້ຮັບວັກຊິນ ຕາມກຳນົດເວລາ ແລະ ຢ່າງທົ່ວເຖິງອີກດ້ວຍ.
ຂ່າວ-ຮູບໂດຍ: ວຽງໄຊ ແສນບຸດຕະລາດ

ທີ່ມາ: ປະເທດລາວ Pathedlao
  • ຮູບພາບ

  • ແທັກທີ່ກ່ຽວຂ້ອງ