• ຕະຫລາດກະສິກຳນາສະກາງ ເມືອງຊຳເໜືອ ຈະເປີດໃຫ້ບໍລິການຕົ້ນເດືອນ 6

ໂດຍ: ສີເປື້ອນມື 27 ພຶດສະພາ 2020 (14.03 ນ.) Read : 201

ຕາມການລາຍງານຈາກ ທ່ານ ຂຽນ ບຸນປະເສີດ ຜູ້ບໍລິຫານຕະຫລາດ ກະສິກຳນາສະກາງ ໄດ້ໃຫ້ຮູ້ວ່າ: ຕະຫລາດກະສິກຳນາສະກາງ ຕັ້ງຢູ່ບ້ານນາສະກາງ ເມືອງຊໍາເໜືອ ແຂວງຫົວພັນ ຈະເລີ່ມເປີດໃຫ້ບໍລິການຄ້າ-ຂາຍນັບແຕ່ວັນທີ 1 ມິຖຸນາ 2020 ນີ້ເປັນຕົ້ນໄປ ເພື່ອເປັນການຮັບໃຊ້ສັງຄົມທີ່ມາບໍລິການໃຫ້ມີຄວາມສະດວກ ແລະ ເປັນບ່ອນຊື້-ຂາຍ ແນ່ໃສ່ສ້າງໃຫ້ເສດຖະກິດແຂວງຫົວພັນມີຄວາມເຂັ້ມແຂງ, ປະຊາຊົນໄດ້ມີການແລກປ່ຽນສິນຄ້າ ແລະ ຜົນຜະລິດທາງດ້ານກະສິກຳ ເພື່ອປະກອບ ສ່ວນເຮັດໃຫ້ຊີວິດການເປັນຢູ່ຂອງພໍ່ແມ່ປະຊາຊົນ ໃຫ້ນັບມື້ດີຂຶ້ນເທື່ອລະກ້າວ ຕາມແນວທາງນະໂຍບາຍຂອງພັກ-ລັດວາງອອກ.
ຕະຫລາດກະສິກຳນາສະກາງ ໄດ້ເລີ່ມລົງມືກໍ່ສ້າງມາແຕ່ປີ 2017-ປີ 2020 ໄດ້ສຳເລັດ 100% ໃນມູນຄ່າການກໍ່ສ້າງທັງໝົດ 2,1 ຕື້ກວ່າກີບ ໂດຍແມ່ນຂອງບໍລິສັດ ພັດທະນາກະສິກຳຂາອອກ-ຂາເຂົ້າ ແລະ ຂົວທາງ ເປັນຜູ້ຮັບເໝົາກໍ່ສ້າງ, ໃນຕະຫລາດຈະມີ ໂຕະຂາຍປະເພດສັດ, ພືດ, ໝາກໄມ້, ສິນຄ້າໂອດັອບ, ເຄື່ອງແຫ້ງທົ່ວໄປ ແລະ ສິນຄ້າຕາມລະດູການ ທັງໝົດ 292 ໂຕະ; ໂຕະຂາຍຊີ້ນໝູ, ງົວ, ຄວາຍ ຈຳນວນ 16 ໂຕະ ແລະ ມີຫ້ອງໃຫ້ເຊົ່າຂາຍເຄື່ອງແຫ້ງ, ຮ້ານເສີມສວຍ ທັງໝົດ 45 ຫ້ອງ.
ຂ່າວ-ພາບ: ນິດຖະໜອມ

ທີ່ມາ: ປະເທດລາວ Pathedlao
  • ແທັກທີ່ກ່ຽວຂ້ອງ