• ຫຼາຍພາກສ່ວນກະກຽມປູກຕົ້ນໄມ້ ໃນໂອກາດວັນປູກຕົ້ນໄມ້ແຫ່ງຊາດ

ໂດຍ: ສີເປື້ອນມື 27 ພຶດສະພາ 2020 (11.22 ນ.) Read : 177

ໃນໂອກາດວັນປູກຕົ້ນໄມ້ແຫ່ງຊາດ 1 ມິຖຸນາ 2020 ນີ້, ຫລາຍທ້ອງຖິ່ນໃນຂອບເຂດທົ່ວປະເທດຕ່າງກໍໄດ້ມີແຜນການກະກຽມປູກຕົ້ນໄມ້ ເພື່ອຟື້ນຟູປ່າ ໃຫ້ເປັນຂະບວນຟົດຟື້ນ ໂດຍອີງຕາມສະພາບເງື່ອນໄຂຂອງແຕ່ລະພາກສ່ວນ. ໃນນີ້, ຢູ່ເມືອງ ແກ່ນທ້າວ ແຂວງ ໄຊຍະບູລີ ມີແຜນປູກໄມ້ທັງໝົດ 14.000 ກວ່າເບ້ຍ ໃນເນື້ອທີ່ ທັງໝົດ 37 ເຮັກຕາກວ່າ ໂດຍຈະປູກໃນວັນທີ 1 ມິຖຸນາ ຢູ່ຫ້ວຍຕາດ ເຂດຮັບຜິດຊອບຂອງບ້ານປົ່ງແດງ, ເຊິ່ງເປັນປ່າສະຫງວນຂອງແຂວງ ຈໍານວນ 2.862 ເບ້ຍ ໃນເນື້ອທີ່ 7 ເຮັກຕາກວ່າ ໂດຍຫ້ອງການກະສິກະສິກໍາ ແລະ ປ່າໄມ້ເມືອງຈະສະໜອງສ່ວນເບ້ຍໄມ້ໃຫ້, ຈາກນັ້ນແມ່ນໄດ້ແບ່ງໃຫ້ແຕ່ລະບ້ານໃນທົ່ວເມືອງປູກ 11.800 ເບ້ຍ ເນື້ອທີ່ 30 ກວ່າເຮັກຕາ. ສ່ວນຊະນິດໄມ້ທີ່ຈະນໍາມາປູກ ແມ່ນໃຫ້ເກັບແກ່ນ, ກ້າແກ່ນ ຫລື ຈີ້ມເອົາເບ້ຍໄມ້ນ້ອຍທີ່ເກີດຕາມທໍາມະຊາດທີ່ຫາໄດ້ງ່າຍ ຕາມປ່າຂອງບ້ານ ເປັນຕົ້ນ ໄມ້ດູ່, ໄມ້ແຕ້ຂ່າ, ໄມ້ຂົມຝາດ ແລະ ໄມ້ ອື່ນໆທີ່ມີເງື່ອນໄຂ.
ສ່ວນຢູ່ແຂວງ ບໍລິຄຳໄຊ ມີແຜນປູກຕົ້ນໄມ້ ໃນເນື້ອທີ່ 4.972 ເຮັກຕາ ເຊິ່ງພາກລັດກະກຽມປູກຕົ້ນໄມ້ໃນວັນທີ 1 ມິຖຸນາ 2020 ນີ້ ຈໍານວນ 15.330 ເບ້ຍ ໃນເນື້ອທີ່ 19 ເຮັກຕາ ແລະ ແຕ່ລະເມືອງຈະໄດ້ຈັດພິທີປູກ ເຊິ່ງຈະປູກຕາມແຄມທາງ, ຫ້ອງການອ້ອມຂ້າງເມືອງ, ໂຮງຮຽນ ແລະ ສະຖານທີ່ ຕາມຄວາມເໝາະສົມ ໂດຍຈະເນັ້ນໃສ່ການປູກພັນໄມ້ດູ່, ໄມ້ຂະຍຸງ ແລະ ໄມ້ປະດັບຈຳນວນໜຶ່ງ. ສ່ວນພາກບໍລິສັດ ແມ່ນຈະປູກປະມານ 2.430 ເຮັກຕາ. ສຳລັບພິທີປູກໄມ້ຂອງແຂວງ ແມ່ນຈະໄດ້ຈັດຂຶ້ນໃນວັນທີ 1 ມິຖຸນາທີ່ຈະມາເຖິງນີ້ຢູ່ບ້ານຫ້ວຍຫອຍ ເມືອງວຽງທອງ (ບ້ານຈັດສັນຂອງໂຄງການກໍ່ສ້າງເຂື່ອນໄຟຟ້ານ້ຳເທີນ 1) ໂດຍເປົ້າໝາຍແມ່ນປູກເພື່ອເພີ່ມພື້ນທີ່ສີຂຽວຂອງໝູ່ບ້ານ, ເປັນຊະນິດພັນໄມ້ປະດັບຄື: ຕົ້ນຄູນ, ຕົ້ນກະເລົາ, ຝາງແດງ ແລະ ຕົ້ນໝາກໝໍ້ ລວມທັງໝົດ 3.000 ເບ້ຍ ໃນເນື້ອທີ 3 ເຮັກຕາ.
ມາໃນວັນທີ 26 ພຶດສະພາ 2020 ນີ້, ຢູ່ແຂວງຫົວພັນ ຄະນະບໍລິຫານງານຊາວໜຸ່ມແຂວງຫົວພັນ ຮ່ວມກັບ ພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວແຂວງ ກໍໄດ້ຈັດກິດຈະກຳປູກ ຕົ້ນດອກຄາຍປ່າ ຈຳນວນ 120 ຕົ້ນ ຢູ່ສູນວິຊາຊີບຄະນະບໍລິຫານງານຊາວໜຸ່ມແຂວງ ເພື່ອປູກທົດແທນຕົ້ນໄມ້ທີ່ຖືກທຳລາຍ, ສູນຫາຍໄປໃນເມື່ອກ່ອນ, ທັງເປັນການປຸກຈິດສຳນຶກໃຫ້ທຸກຄົນ ແລະ ເປັນການປົກປັກຮັກສາສິ່ງແວດລ້ອມ, ທັງເປັນຈຸດລິເລີ່ມໃນການສ້າງແຫລ່ງທ່ອງທ່ຽວທີ່ມີຕົ້ນໄມ້ປະດັບຢູ່ພາຍໃນແຂວງຫົວພັນ, ສາມາດດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ຽວຊົມແຂວງຫົວພັນ ໂດຍສະເພາະເມືອງຊໍາເໜືອໃຫ້ນັບມື້ຫລາຍຂຶ້ນ.

ທີ່ມາ: ປະເທດລາວ Pathedlao
  • ແທັກທີ່ກ່ຽວຂ້ອງ