• ການບິນລາວ ພ້ອມແລ້ວທີ່ຈະເປີດສາຍການບິນຄືນໃໝ່

ໂດຍ: ສີເປື້ອນມື 22 ພຶດສະພາ 2020 (14.24 ນ.) Read : 395

ລັດວິສາຫະກິດການບິນລາວ ເລີ່ມເປີດສາຍການບິນຄືນໃໝ່ພາຍໃນປະເທດ ໃນວັນທີ 22 ພຶດສະພາ 2020 ພ້ອມລາຄາພິເສດ ເລີ່ມຕົ້ນພຽງ 390.000 ກີບ/ຖ້ຽວ, ເນັ້ນປະຕິບັດມາດຕະການປ້ອງກັນການຕິດເຊື້ອພະຍາດໂຄວິດ-19 ຢ່າງເຂັ້ມງວດ.
ທ່ານ ໜູແດງ ຈັນທະຜາສຸກ ຫົວໜ້າພະແນກການຄ້າ-ການຕະຫລາດ ລັດວິສາຫະກິດການບິນລາວ ໄດ້ໃຫ້ສຳພາດຕໍ່ນັກຂ່າວ ໃນວັນທີ 22 ພຶດສະພາ ນີ້ວ່າ: ພວກເຮົາເປີດສາຍການບິນຄືນໃໝ່ພາຍໃນປະເທດ ມີທັງໝົດ 6 ເສັ້ນທາງໄປກັບ ຄື: ວຽງຈັນ-ຫລວງພະບາງ, ວຽງຈັນ-ຫລວງນ້ຳທາ, ວຽງຈັນ-ຊຽງຂວາງ, ວຽງຈັນ-ອຸດົມໄຊ, ວຽງຈັນ-ສະຫວັນນະເຂດ ແລະ ວຽງຈັນ-ປາກເຊ ດ້ວຍລາຄາເລີ່ມຕົ້ນພຽງ 390.000 ກີບ/ຖ້ຽວ ທຸກເສັ້ນທາງ (ຍົກເວັ້ນພຽງເສັ້ນທາງດຽວຄື ວຽງຈັນ-ປາກເຊ), ທັງນີ້ ກໍແນໃສ່ເພື່ອດຶງດູດລູກຄ້າ ແລະ ລາຄາພິເສດນີ້ຈະດຳເນີນໄປຈົນຮອດເດືອນສິງຫາ 2020.
ສໍາລັບເສັ້ນທາງ ວຽງຈັນ-ຫລວງພະບາງ, ວຽງຈັນ-ຫລວງນ້ຳທາ ແລະ ວຽງຈັນ-ປາກເຊ ຈະບິນ 4 ຖ້ຽວຕໍ່ອາທິດ ຄື: ວັນຈັນ, ວັນພຸດ, ວັນສຸກ ແລະ ວັນອາທິດ, ສ່ວນເສັ້ນທາງ ວຽງຈັນ-ຊຽງຂວາງ, ວຽງຈັນ-ສະຫວັນ ແມ່ນບິນ 3 ຖ້ຽວຕໍ່ອາທິດ ຄື: ວັນຈັນ, ວັນພຸດ ແລະ ວັນສຸກ, ແລະ ສຳລັບເສັ້ນທາງ ວຽງຈັນ-ອຸດົມໄຊ ແມ່ນບິນ 3 ຖ້ຽວຕໍ່ອາທິດ ຄື: ວັນອັງຄານ, ວັນພະຫັດ ແລະ ວັນເສົາ.
ການບິນມື້ທຳອິດ ເຫັນວ່າມີຜູ້ໂດຍສານປະມານ 50-80% ຂອງຈຳນວນທີ່ນັ່ງໃນແຕ່ລະຖ້ຽວ.
ທ່ານ ໜູແດງ ຈັນທະຜາສຸກ ກ່າວຕື່ມວ່າ: ສຳລັບຖ້ຽວບິນຕ່າງປະເທດໃນຕອນນີ້ ແມ່ນເປີດສະເພາະ ວຽງຈັນ-ຄຸນໝິງ ຄື 1 ຖ້ຽວຕໍ່ອາທິດ (ວັນອາທິດ), ສ່ວນເສັ້ນທາງອື່ນແມ່ນບໍ່ທັນມີກຳນົດເທື່ອ.
ໃນຂະນະດຽວກັນ, ການບິນລາວ ຍັງໄດ້ປະຕິບັດຕາມມາດຕະການປ້ອງກັນການຕິດເຊື້ອຂອງຄະ ນະສະເພາະກິດ ກໍຄືຂະແໜງການທີ່ກ່ຽວຂ້ອງ ໄດ້ປະຕິບັດຢ່າງເຂັ້ມງວດ ເປັນຕົ້ນ: ຂ້າເຊື້ອພາຍໃນສະ ຖານທີ່ ແລະ ເຮືອບິນ, ມີການວັດແທກອຸນຫະພູມນັກບິນ, ພະນັງງານ ແລະ ຜູ້ໂດຍສານ, ໃຫ້ທຸກຄົນໃສ່ຜ້າອັດປາກ-ດັງ ແລະ ລ້າງມີດ້ວຍເຈວລ້າງມື ຫລື ສະບູ.

ທີ່ມາ: ປະເທດລາວ Pathedlao
  • ແທັກທີ່ກ່ຽວຂ້ອງ