• ມອບ-ຮັບອັດຖິທະຫານອາສາສະໝັກ ແລະ ຊ່ຽວຊານຫວຽດນາມ ຄືນສູ່ປະເທດ ໃນສົກປີ 2019-2020.

ໂດຍ: ສີເປື້ອນມື 05 ພຶດສະພາ 2020 (12.50 ນ.) Read : 311

ປະຕິບັດຕາມນະໂຍບາຍຂອງສອງພັກ, ສອງລັດ ລາວ-ຫວຽດນາມ ກ່ຽວກັບການຊອກຫາຂຸດຄົ້ນ ທ້ອນໂຮມອັດຖິທະຫານອາສາສະໝັກ ແລະ ຊ່ຽວຊານ ຫວຽດນາມ ທີ່ເສຍສະຫລະຊິວິດໃນປາງສົງຄາມຢູ່ພື້ນທີ່ຂອງແຂວງສະຫວັນະເຂດ ເພື່ອກັບຄືນປະເທດໃນລະດູແລ້ງ ສົກປີ 2019-2020 ໂດຍການເຂົ້າຮ່ວມພິທີມອບ-ຮັບອັດຖິ ຄັ້ງນີ້ມີ ສະຫາຍ ພົນຈັດຕະວາ ຈະເລີນ ວົງວິໄຊ ເລຂາຄະນະພັກ ຫົວໜ້າການເມືອງ ກອງບັນຊາການທະຫານແຂວງ ຮອງຄະນະປະຕິບັດງານພິເສດ ແຂວງສະຫວັນະເຂດ, ສະຫາຍ ພັນໂທ ຫງວຽນວັນຈ້ອງ ຫົວໜ້າການທະຫານກອງປະຕິບັດງານພິເສດ 584 ພ້ອມດ້ວຍຄະນະວິຊາການສອງຝາ່ຍເຂົ້າຮ່ວມ.
ໃນພິທີ ສະຫາຍ ພັນໂທ ຫງວຽນວັນຈ້ອງ ຫົວໜ້າກອງຂຸດຄົ້ນ 584 ໄດ້ຂື້ນຜ່ານບົດສະຫລຸບໃນການຊອກຫາ ຂຸດຄົ້ນ ທ້ອນໂຮມອັດຖິທະຫານອາສາສະໝັກ ແລະ ຊ່ຽວຊານ ຫວຽດນາມ ທີ່ເສຍສະຫລະຊິວິດໃນປາງສົງຄາມຢູພື້ນທີ່ຂອງແຂວງສະຫວັນະເຂດ ເຊີ່ງມີທັງຂໍ້ສະດວກ ແລະ ຂໍ້ຫຍຸ້ງຍາກແຕ່ກໍ່ສາມາດຊອກໄດ້ 21 ສົບໃນລະດູແລ້ງສົກ 2019-2020 ນີ້ ຍ້ອນຄະນະປະຕິບັດງານພິເສດ 2 ແຂວງສະຫວັນະເຂດ-ກວາງຈິ ໄດ້ເອົົາໃຈໃສ່ຊີ້ນຳຢ່າງໃກ້ຊິດໃນການຊອກຄົ້ນຕາມຕົວເມືອງທີ່ມີເປົ້າໝາຍ, ອຳນາດການປົກຄອງໃນແຕ່ລະເມືອງທີ່ລົງຊອກຄົ້ນແມ່ນໃຫ້ຄວາມຮ່ວມມື ແລະ ສະໜອງຂໍ້ມູນຂ່າວສານໄດ້ເປັນຢ່າງດີໂດຍສະເພາະແມ່ນກອງບັນຊາການທະຫານເມືອງໃນແຕ່ລະເມືອງ ໃນນັ້ນເມືອງອາດສະພັງທອງ ມີ 12 ອັດຖິ, ເມືອງຈຳພອນ 2 ອັດຖິ, ເມືອງອາດສະພອນ 7 ອັດຖິ ລວມເປັນ 21 ອັດຖິ. ຈາກນັ້ນ ສະຫາຍ ພົນຈັດຕະວາ ຈະເລີນ ວົງວິໄຊ ຫົວໜ້າກອງບັນຊາການທະຫານແຂວງ ຮອງຫົວໜ້າຄະນະສະເພາະກິດ ແຂວງສະຫວັນະເຂດ ໄດ້ມີຄຳຄິດຄຳເຫັນເຊິ່ງສະຫາຍ ໄດ້ກ່າວວ່າ ການມອບ-ຮັບອັດຖິທະຫານອາສາສະໝັກ ແລະ ຊ່ຽວຊານຫວຽດນາມ ໃນປີນີ້ແມ່ນບໍ່ໄດ້ເຮັດຄືເກົ່າເພາະອິງໃສ່ສະພາບການແພ່ລະບາດຂອງພະຍາດໂຄວິດ-19 ຢ່າງຮ້າຍແຮງໃນທົ່ວໂລກ ກໍ່ຄືໃນປະເທດເຮົາ ດັ່ງນັ້ນມາໃນວັນທີ 3 ພຶດສະພາ 2020 ຄະນະປະຕິບັດງານພິເສດ ສະຫວັນນະເຂດ - ກວາງຈິ ຈິ່ງໄດ້ຈັດພິທີມອບ-ຮັບຢ່າງເປັນທາງການຢູ່ທີ່ກອງຂຸດຄົ້ນ 584 ຕັ້ງຢູ່ບ້ານແກ້ງຄັນ ເມືອງວິລະບູ ແຂວງສະຫວັນນະເຂດ, ຕອນທ້າຍ ໄດ້ພ້ອມກັນເຊັນບົດບັນທຶກມອບຮັບອັດຖິ ແລະ ມອບຂອງຂວັນໃຫ້ກັນ ແລະ ກັນຕື່ມອີກ.
ໂດຍ: ບກ ທະຫານແຂວງ

ທີ່ມາ: ປະເທດລາວ Pathedlao
  • ຮູບພາບ

  • ແທັກທີ່ກ່ຽວຂ້ອງ